گه‌وره‌ مافیایه‌كی‌ عیراق ده‌ستگیر كرا


وێستگه‌ نیوز -
به‌ڕێوه‌به‌رایه‌تی ئاسایشی حه‌شدی شه‌عبی رایگه‌یاند كه‌ له‌ به‌غدا هه‌ڵمه‌تێكیان بۆ سه‌ر قومارخانه‌كان و ئه‌و شوێنانه‌ی كڕین و فرۆشتن به‌ مادده‌ی هۆشبه‌ر و ئافره‌ته‌وه‌ ده‌كه‌ن ئه‌نجامداوه‌ و توانیویانه‌ سه‌رۆكی‌ گه‌وره‌ترین مافیای عیراقی ده‌ستگیربكه‌ن.

به‌ڕێوه‌به‌رایه‌تی ئاسایشی حه‌شدی شه‌عبی له‌ راگه‌یه‌ندراوێكدا كه‌ وێنه‌یه‌كی ده‌ست وێستگه‌ نیوز كه‌وتووه‌، رایگه‌یاند كه‌ هه‌ڵمه‌تێكیان بۆسه‌ر مافیاكانی‌ قومار و هۆڵه‌كانی‌ قوماركردن و بازرگانانی‌ ماده‌ هۆشبه‌ره‌كان و ئافره‌ت له‌ به‌غدای‌ پایته‌خت ئه‌نجام داوه‌.

ئاسایشی حه‌شدی‌ شه‌عبی‌ ده‌ڵێت: "له‌ هه‌ڵمه‌ته‌كه‌دا توانیمان حاجی حه‌مزه‌ شممه‌ری، گه‌وره‌ مافیای عیراق كه‌ له‌لایه‌ن دادگاوه‌ داواكراو بووه‌، ده‌ستگیر بكه‌ین و ده‌ستبه‌سه‌ر هه‌موو شوێنه‌كانی‌ قوماركردن و له‌شفرۆشی‌ و بازرگانی‌ به‌ ماده‌ی‌ هۆشبه‌ر بگرین".

ئاماژه‌شی‌ به‌وه‌دا كه‌ "له‌ هه‌ڵمه‌ته‌كه‌ 25 كه‌سی دیكه‌دا ده‌ستگیركراون، كه‌ سه‌ر به‌و گه‌وره‌ مافیایه‌ن و رایانگه‌یاندووه‌ كه‌ سه‌ر به‌ حه‌شدی‌ شه‌عبین و ناسنامه‌ی‌ ساخته‌یان پێبووه‌ و سه‌رپه‌رشتی‌ به‌شێكی زۆر له‌ قومارخانه‌كانیان كردووه‌ و مادده‌ی هۆشبه‌رییان به‌ گه‌نجه‌كان فرۆشتووه‌ بازرگانییان به‌ ئافره‌تانه‌وه‌ كردووه‌ بۆ ئه‌وه‌ی‌ رۆژانه‌ ملیۆنان دۆلاریان ده‌ستبكه‌وێت".

ئاسایشی حه‌شدی‌ شه‌عبی‌ راشیگه‌یاندووه‌ كه‌ "له‌ هه‌ڵمه‌ته‌كه‌دا ده‌ستگیراوه‌ به‌سه‌ر ژماره‌یه‌كی‌ زۆر ئامێری‌ قوماركردن و بڕێكی زۆر مادده‌ی هۆشبه‌ردا".


AM:10:58:06/08/2019










ئه‌م بابه‌ته 3824 جار خوێنراوه‌ته‌وه‌‌



لێرەوە کۆمێنت بنوسە لە فەیسبوک دەردەکەوێت