مامۆستایانی نارازی په‌یامێك بۆ زۆنی سه‌وز و زه‌رد ده‌نێرن
وێستگه نیوزـ
ئەنجومەنی مامۆستایانی نارازی كۆنگره‌یه‌كی رۆژنامه‌وانییان سازكرد و داوای راگرتنی هه‌ژماری من ده‌كه‌ن، له په‌یامێكیشدا بۆ ده‌سه‌ڵاتدارانی زۆرنی سه‌وز، ئه‌و مامۆستایانه ده‌ڵێن: پێویستە یەکێتی و دەسەڵاتی سنووری زۆنی سەوز کارەکانی هەژماری من لە سلێمانی و هەڵەبجە و ئیدارەکانی ڕاپەڕین و گەرمیان و قەزای کۆیە ڕابگرن و ڕاستەوخۆ لیستی مووچەخۆران بۆ وەزارەتی دارایی حکومەتی فیدراڵ بنێرن.
له كۆنگره رۆژنامه‌وانییه‌كه‌دا كه ئێواره‌ی ئه‌مڕۆ دووشه‌ممه 18ی ئازاری 2024 سازیكرد، ئه‌نجومه‌نی مامۆستایانی نارازی چوار خاڵیان راگه‌یاندو و له یه‌كێكیاندا، پشتیوانیی خۆیان لەبایکۆتی خۆرسکانەی مامۆستایان و فەرمانبەران ده‌ربری و داواشیان له مامۆستایان و فەرمانبەران كرد بایکۆتی هەژماری من و فەرمانگە وه‌خوێندنگەکانیان بکەن ، بەتایبەتی ئەو فەرمانگانەی داهات بۆ حکومەت کۆدەکەنەوە.
له خاڵێكی دیكه‌شدا ئه‌نجومه‌نه‌كه داوا ده‌كات: "دەستبەسراگرتن و بە بارمتەگرتنی مووچەی مامۆستایان و فەرمانبەرانی مەدەنی کۆتایی پێ بێت و بەزووترین کات دابەشکردنی مووچەی مانگی دوو دەست پێبکات."
دەقی پەیامەکەی ئەنجومەنی مامۆستایانی نارازی:
بەناوی خوای گەورە
مامۆستایان، فەرمانبەران
سەرجەم چین و توێژەکان
هاوڵاتیانی هەرێمی کوردستان
پاش بڕیارەکانی دادگای فیدراڵیی لە بەرژەوەندی مووچەخوراوانی هەرێمی کوردستان، چاوەڕێمان ئەکرد دەسەڵات واز لە چەوساندنەوەی خەڵکی کوردستان بهێنێت و ئاسانکاریی بۆ جێبەجێکردنی بڕیارەکان بکات، بەڵام بەداخەوە وەک دەبینین دەسەڵات سوورە لەسەر سزادان و برسیکردنی مامۆستایان و فەرمانبەران.
لە ئێستاشدا جارێکی تر، دەسەڵات بەپاساوی گاڵتەجاڕانەی دروستکردنی "هەژماری من" و نەناردنی لیستی ناوی هێزە سەربازییەکان، دەیەوێت خۆی لە پابەندیی بە بڕیارەکانی دادگای فیدراڵیی بدزێتەوە و بەردەوام قەیرانی نوێ بۆ هاوڵاتیانی هەرێمی کوردستان دروست دەکەن کە تەنها ئامانجیشیان پەردەپۆش کردنی دزی و گەندەڵیەکانیان و ستەمی بە بارمتە گرتنی موچەی مامۆستایان و فەرمانبەرانی مەدەنیە .
ئەم خۆدزینەوە و پابەند نەبوونە تەنها لەسنوری پارێزگاکانی هەولێر و دهۆکدا نییە و دەسەڵاتدارانی سنوری پارێزگاکانی سلێمانی و هەڵەبجەش بەهەمان شێوەی دەسەڵاتدارانی سنوری پارێزگاکانی هەولێر و دهۆک خەمساردانە مامەڵە دەکەن و باکیان به بێ مووچەیی خەڵک نییە و دەستیان کردووه بە کردنەوەی هەژماری من ی زۆرەملی بۆ مامۆستایان و فەرمانبەران .
بۆیه ڕایدەگەیەنین
١ــ پێویستە یەکێتی و دەسەڵاتی سنووری زۆنی سەوز بۆئەوەی بیسەلمێنن ڕاستگۆن لەگەڵ ڕاگەیەنراوی خۆیان و خەڵکی ئەم سنورە و پابەندن بە بڕیارەکانی دادگای فیدراڵیی، ئەوا کارەکانی هەژماری من لە سلێمانی و هەڵەبجە و ئیدارەکانی ڕاپەڕین و گەرمیان و قەزای کۆیە ڕابگرن ، وە ڕاستەوخۆ لیستی مووچەخۆران بنێرن بۆ وەزارەتی دارایی حکومەتی فیدراڵیی و ڕێگەبدەن بەزوویی لە ڕێی یەکێک لە بانکەکانی ڕەشید و ڕافیدەینەوە کارتی بانکی بۆ مووچەخۆرانی ئەم سنورە دروستبکرێت و مامەڵەی ڕاستەوخۆ لەگەڵ وەزارەتی دارایی عێراق دا بکەن.
٢ــ پشتیوانی لەبایکۆتی خۆرسکانەی مامۆستایان و فەرمانبەران دەکەین هاوکات داواکاین مامۆستایان و فەرمانبەران بایکۆتی هەژماری من و فەرمانگە وخوێندنگەکانیان بکەن ، بەتایبەتی ئەو فەرمانگانەی داهات بۆ حکومەت کۆدەکەنەوە.
٣ــ دەستبەسراگرتن و بە بارمتەگرتنی مووچەی مامۆستایان و فەرمانبەرانی مەدەنی کۆتایی پێ بێت و بەزووترین کات دابەشکردنی مووچەی مانگی دوو دەست پێبکات.
٤ــ حیزب و هێزە ئۆپزیسۆنەکان و زانایانی ئاینی و ڕێکخراوەکان لەئاست سەختی دۆخەکەدا بن و هەڵویستی ڕوون و ڕاشکاوانەیان بەرامبەر بەبارمتەگرتنی مووچەی مامۆستایان و فەرمانبەرانی مەدەنی و هەژماری من ی زۆرەملی ڕابگەیەنین .
لە کۆتاییدا ڕایدەگەیەنین
چیتر خۆپیشاندانەکان لەبەردەم پەروەردەکان نامێنن و لە ئایندەیەکی نزیکدا بەهاوکاری مامۆستایان و فەرمانبەرانی سەرجەم شارو شارۆچکەکان خۆپیشاندانی بەرفراوان بەرەو ناوەندی بڕیاری دەسەڵاتی سنوری ئیدارەی سلێمانی و هەولێر دەستپێدەکەینەوە .
هاوکات داوا لە سەرجەم مامۆستایان و فەرمانبەرانی هەرێمی کوردستان و چین و توێژە جیاوازەکان ئەکەین، بە یەکدەنگیی لەگەڵمان بن تا گەیشتن بە ئامانجەکان و کۆتاییهێنان بە ستەمی دەسەڵاتدارانی هەرێمی کوردستان
ئەنجومەنی مامۆستایانی ناڕازی
١٨ -٣ - ٢٠٢٤
PM:05:04:18/03/2024
ئه‌م بابه‌ته 1212
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت