محه‌مه‌د حه‌كیم: ئێمه ئاماده‌ین، به‌ڵام ڕه‌نگه هه‌ڵبژاردن نه‌كرێت
له‌نیا به‌ختیار - وێستگه نیوز - سلێمانی
وته‌بێژی كۆمه‌ڵی دادگه‌ری كوردستان، ئه‌مرۆ دووشه‌ممه، ڕایگه‌یاند كه ئه‌وان ئاماده‌ن بۆ به‌شداریكردن له‌هه‌ڵبژاردنی په‌رله‌مانی كوردستان، به‌ڵام ئه‌م هه‌ڵوێسته‌ی پارتی دیموكراتی كوردستان كاریگه‌ری ده‌بێت له‌ئه‌نجامدانی هه‌ڵبژاردن"ڕه‌نگه هه‌ڵبژاردن نه‌كرێت".
محمه‌د حه‌كیم وته‌بێژی كۆمه‌ڵ ، له‌لێدوانێكی تایبه‌ت به‌وێستگه‌نیوز، ڕاشیگه‌یاند كه سه‌رۆكایه‌تی هه‌رێمی كوردستان كاتی هه‌ڵبژاردنی په‌رله‌مانی كوردستانی دیاریكردووه، ئێمه‌ش ئاماده‌سازیمان كردووه تاوه‌كو به‌شداری هه‌ڵبژاردن بكه‌ین، ئه‌گه‌ر هه‌ڵبژاردن كرا ئێمه به‌شدار ده‌بین.
سه‌باره‌ت به هه‌ڵوێستی ئه‌مرۆی پارتی دیموكراتی كوردستان له‌سه‌ر بایكۆتكردنی هه‌ڵبژاردن ناوبراو وتی "پارتی ده‌سه‌ڵاتداره‌و له‌زۆنێكداو به‌ته‌واوی حكومڕانه ئه‌مه‌ش كاریگه‌ری هه‌یه‌و ڕه‌نگه هه‌ڵبژاردنه‌كه هه‌ر نه‌كرێ".
محه‌مه‌د حه‌كیم جه‌ختی له‌وه‌كرده‌وه كه له‌دوای پرۆسه‌ی كشانه‌وه‌ی پارتی له‌هه‌ڵبژاردن چاوه‌ڕوانی بڕیاری كۆمسیۆنی باڵای هه‌ڵبژاردنه‌كانی عێراق ده‌كه‌ن"ئه‌گه‌ر بێت و هه‌ڵبژاردن ئه‌نجامبدرێت، ئه‌وا ئه‌وان به‌شداری ده‌كه‌ن".
په‌یامنێری وێستگه نیوز پرسیاری له وته‌بێژی كۆمه‌ڵ كرد، پێتوایه ئه‌م هه‌ڵبژاردنه ئه‌گه‌ر بكرێت بێ گه‌رد ده‌بێت له‌چاو ئه‌وانه‌ی پێشووتری هه‌رێمی كوردستان؟ محه‌مه‌د حه‌كیم ووتی "تا ئێستا هه‌ڵبژاردنی بێ گه‌ردمان له‌كوردستان نه‌بینیوه، ئومێد ده‌كه‌ین هه‌ڵبژاردنی ئاینده بێ گه‌رد بێت".
ئەمڕۆ دووشەممە، 18-03-2024، مەکتەبی سیاسیی پارتی دیموکراتی کوردستان بەیاننامەیەکی لەبارەی دۆخی ئێستای عێراق، پەیوەندییەکانی هەولێر و بەغدا، هەڵبژاردنی پەرلەمانی کوردستان، بڕیارەکانی دادگای فیدراڵی و چەند پرسێکی دیکە بڵاوکردەوە.
له‌به‌یاننامه‌كه‌دا هاتووه " هاوپەیمانی ئیدارەی دەوڵەت دەخەینە بەردەم بەڕپرسیارێتیی نیشتمانی لە جێبەجێنەکردنی دەستوور و تەواوی خالەکانی رێککەوتنی سیاسی و ئیداریی پێکهێنانی کابینەی ئێستای حکومەتی عێراق بە سەرۆکایەتیی محەممەد شیاع سوودانی، بەپێچەوانەشەوە ناتوانین بەردەوام بین لە پڕۆسەی سیاسی دا".
PM:05:00:18/03/2024
ئه‌م بابه‌ته 1412
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت