له‌ ڕووداوێكی هاتووچۆدا دوو كه‌س گیانیان له‌ده‌ست دا

‌

وێستگه‌نیوز-
به‌ڕێوه‌به‌رایه‌تی‌ هاتووچۆی گه‌رمیان رایگه‌یاند كه‌ به‌هۆی پێكدادانی دوو ئۆتۆمبێل له‌سه‌ر ڕێگای گوندی كارێزه‌، دوو كه‌س گیانیان له‌ده‌ست دا و سێ كه‌سی تریش برینداربوون.

هاتووچۆی گه‌رمیان له‌ راگه‌یه‌ندراوێكدا ئاماژه‌ی‌ به‌وه‌دا كه‌ "كاتژمێر 1:30 خوله‌كی‌ به‌ره‌به‌یانی‌ ئه‌مڕۆ هه‌ینی‌، له‌سه‌ر ڕێگای گوندی كارێزه‌ له‌ نزیك ناحیه‌ی ڕزگاری دوو ئۆتۆمبێلی جۆری نیسان ئاڵتیما و نیسان ناڤارا پێكیاندا دا".

هاتووچۆی گه‌رمیان ده‌ڵێت: "له‌ ئه‌نجامدا دوو كه‌س گیانیان له‌ده‌ست دا و سێ كه‌سی تریش برینداربوون".

ئه‌وه‌شی‌ خستووه‌ته‌ڕوو كه‌ "ئه‌و كه‌سانه‌ی گیانیان له‌ده‌ستداوه‌ یه‌كێكیان لێخوڕی نیسان ئاڵتیماكه‌یه‌ له‌دایكبووی 1972ه‌و، به‌ئاراسته‌ی سه‌ر ڕێگای گشتی كه‌لار -كفری ڕۆیشتووه‌".

روونیشیكرده‌وه‌ كه‌ "ئه‌وه‌كه‌ی دیكه‌یان سه‌رنشینێكی نیسان ناڤاراكه‌یه‌ له‌ دایكبووی 1960ه‌ و سێ برینداره‌كه‌ش سه‌رنشینی نیسان ناڤاراكه‌بوون كه‌ به‌ ئاراسته‌ی گوندی كارێزه‌ ڕۆیشتوون".

هاتووچۆی‌ گه‌رمیان راشیگه‌یاند كه‌ "برینداره‌كان گه‌یه‌نراونه‌ته‌ نه‌خۆشخانه‌ و لێكۆڵینه‌وه‌ له‌لایه‌ن تیمی هاتووچۆوه‌ ده‌ستی پێكردووه‌، به‌مه‌به‌ستی زانینی هۆكار و چۆنیه‌تی ڕووداوه‌كه‌".

AM:09:21:08/03/2024