نێچیرڤان بارزانی پەیوەندی بە خانەوادەی هەردوو پێشمه‌رگه شەهیدەکەی چیای قەرەچووغەوە کرد
نێچیرڤان بارزانی، سەرۆکی هەرێمی کوردستان
وێستگه‌نیوزـ
نێچیرڤان بارزانی، سەرۆکی هەرێمی کوردستان پەیوەندی بە خانەوادەی هەردوو شەهیدەکەی چیای قەرەچووغەوە کرد و سەرەخۆشی لێکردن.
ماڵپەڕی فەرمی سەرۆکایەتی هەرێمی کوردستان رایگەیاند: ئەمڕۆ سێشەممە 24ی تشرینی یه‌كه‌می 2023، نێچیرڤان بارزانی، سەرۆكی هەرێمی كوردستان، لە پەیوەندییەكی تەلەفۆنیدا لەگەڵ خانەوادەی هەردوو شەهید قەهار جەوهەر قەهار و هاوڕێ جەوهەر رەحمان كە رۆژی یەكشەممە لە چیای قەرەچووغ لە سنووری مەخموور شەهید بوون، پرسە و سەرەخۆشیی قووڵی خۆی پێشكەش بە خانەوادەی هەردوو شەهید و كەسوكاریان كرد و هاوسۆزی و هاوخەمی لەگەڵیاندا دەربڕی.
ئەوەش خراوەتەڕوو، نێچیرڤان بارزانی هیوای خواست خوای مەزن گیانی شەهیدان بە بەزەیی و میهرەبانیی خۆی شاد بكات و ئارامی و دڵنەوایی بە خانەوادە و كەسوكاریان ببەخشێت.
وەک ماڵپەڕی فەرمی سەرۆکایەتیی هەرێمی کوردستان ئاماژەی پێداوە، لای خۆیانەوە خانەوادەی هەردوو شەهید، سوپاس و پێزانینیی خۆیان و كەسوكاریان بۆ پەیوەندی و هاوخەمی و هاوسۆزیی سەرۆكی هەرێمی كوردستان دووپات کرده‌وه.
ئێوارەی رۆژی 22ی تشرینی یەکەمی 2023، بەهۆی هەڵە تێگەیشتنێک بۆ ماوەی چەند خولەکێک شەڕە تەقە لەنێوان هێزی پێشمەرگە و سوپای عێراق لە قەرەچووغ روویدا و، دوو پێشمه‌رگه‌ی كوردستان شه‌هیدبوون و ژماره‌یه‌كی دیكه‌ش برینداربوون و دواتر دۆخەکە کۆنترۆڵکرایه‌وه.
PM:02:32:24/10/2023
ئه‌م بابه‌ته 872
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت