هاتووچۆی هەولێر بۆ ماتۆسوارەکان: نمایشی مەترسیدار ئەنجام بدەن ماتۆڕەکانتان دەستی بەسەردا دەگیرێت و خۆشتان دەدرێنە دادگا
وێستگەنیوز_
بەڕێوەبەرایەتیی هاتووچۆی هەولێر ماتۆڕسوارەکان ئاگادار دەکاتەوە لەوەی ئەگەر "لەسەر شەقامەکان نمایشی مەترسیدار ئەنجام بدەن، ئەوا ماتۆڕەکانتان دەستیان بەسەردا دەگیرێت و خۆشتان دەدرێنە دادگا."
ئەمرۆ هەینی 11ـی نیسانی 2025، بەڕێوەبەرایەتیی هاتووچۆی هەولێر، لە ڕاگەیەندراوێکدا ماتۆڕسوارەکان ئاگادار دەکاتەوە بۆ ئەوەی تووشی سزای پێبژاردن و دەست بەسەر داگرتنی ماتۆڕەکانیان نەبن.
لە ڕاگەیەندراوەکەدا هاتووە، ماتۆڕ هۆکارێکی گواستنەوەیە و لەیاسای هاتووچۆ ڕێگەیپێدراوە هاتووچۆ بکات، لەسەر شەقامەکان و ئێستاش بووتە یەکێک لە ئامرازەکانی کار و کەسابەت، بەڵام بەشێک لە ماتۆڕسوارەکان سەرپێچی یاساکانی هاتووچۆ دەکەن و مەترسی بۆ سەر ژیانی خۆیان و هاووڵاتیانی دیکەش دروست دەکەن.
ئاماژەی بەوەشکردووە، هەر ماتۆڕسوارێک پابەندیی یاسا و ڕێنماییەکانی هاتووچۆ نەبێت و مەترسی بخاتە سەر سیستەمی هاتووچۆ و هاووڵاتییان بێزار بکات، ئەوا لێپێچینەوەی لەگەڵ دەکرێت و سزاش دەدرێت.
بەڕێوەبەرایەتیی هاتووچۆی هەولێر، چەند ڕێنماییەکی خستووەتەڕوو، بۆ ئەوەی ماتۆڕسوارەکان هۆشیار بن و تووشی سزای دارایی و بەندکردن نەبن:
1- هەر ماتۆڕسوارێک لەسەر شەقامەکان سەرکێشی بکات و نمایشی مەترسیدار بکات، ئەوا ماتۆڕەکەی دەستی بەسەردا دەگیرێت و خۆشی دەدرێتە دادگا.
2- هەر ماتۆڕسوارێک لە ترافیکە لایتەکان نەوەستێ و بە خێرایی بە بەردەم کامێراکانی تۆمارکردنی تیژڕۆیی تێپەڕبێت، سزای دارایی دەدرێت، هەروەها ئەگەر ماتۆڕەکە تۆمارنەکراو بێت و لۆگۆی کۆمپانیاکانی دیلیڤەری پێوە بێت، کۆمپانیاکە مانگانە لیستی سزاکانی بۆ ڕەوانە دەکرێت.
3- هەر ماتۆڕسوارێک کڵاوی سەر، ئەژنۆ، مەچەکپارێزی، لەکاتی لێخورین بەکار نەهێنێت، ئەوا سزای دارایی دەدرێت.
4- هەر ماتۆڕسوارێک دەنگی ئەگزۆزی ماتۆڕەکەی بەرز بکاتەوە و هاووڵاتییان بێزار بکات، دەست بەسەر ماتۆڕەکەی دەگیرێت و خۆشی دەدرێتە دادگا.
هاتووچۆی هەولێر، ئاماژەی بەوەش کرد، هاوڵاتیان دەتوانن لە ڕێگەی پەیجی بەڕێوەبەرایەتیی هاتووچۆی هەولێرەوە، لە تۆڕی کۆمەڵایەتی فەیسبووک، زانیاری بدەنە پۆلیسی هاتوچوۆ ئەگەر لە گەڕەکەکانیان مانۆڕی ماتۆڕسواری بکرێت.
PM:06:57:11/04/2025
ئه‌م بابه‌ته 412
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت