نهێنی ئەو پارچە دارەی جاک و ڕۆزی لە تایتانیکدا لێک جیا کردەوە

وێستگە ستایل - سۆلین عوسمان

دیمەنی کۆتایی فیلمی تایتانیک یەکێکە لە کاریگەرترین و پڕگۆتوبێژترین ساتەکانی مێژووی سینەما. ئەو پارچە دارەی کە ڕۆزی لە مردن ڕزگار کرد و جاکی لە سەرمادا جێهێشت، تەنها پارچە دیکۆرێکی خەیاڵی نەبوو، بەڵکو پەیوەندییەکی ڕاستەوخۆی بە مێژووی ڕاستەقینەی کەشتییەکەوە هەیە.

ئەو دارەی لە فیلمەکەدا بینرا، کۆپییەکی وردی پارچەیەکی ڕاستەقینەی پاشماوەی کەشتیی تایتانیکە کە لە ساڵی ١٩١٢دا لەسەر ئاوی زەریای ئەتڵەسی دۆزراوەتەوە. ئەم پارچەیە لە ڕاستیدا دەرگا نەبووە، بەڵکو بەشێک بووە لە چوارچێوەی دەرگایەکی نەخشێنراوی سەرەوەی هۆڵی پلە یەکی (First Class Lounge) کەشتییەکە، کە بە شێوازێکی هونەریی دەگمەن تاشراوە.

بۆ چەندین دەیەیە مشتومڕێکی زۆر هەیە کە ئایا جاک دەیتوانی لەسەر دارەکە جێگەی ببێتەوە یان نا. جەیمس کامیرۆنی دەرهێنەر، بۆ وەڵامدانەوەی ئەم گومانانە، تاقیکردنەوەیەکی زانستیی لەژێر چاودێری پزیشکیدا ئەنجامدا و دەرکەوت کە کێشی هەردووکیان پێکەوە دەبووە هۆی نقومبوونی دارەکە بۆ ناو ئاوە سەهۆڵبەندانەکە. جێی ئاماژەیە، لە مەزادێکی ئاشکرای ئەمساڵدا، ئەو دارەی لە فیلمەکەدا بەکارهات بە بڕی

٧١٨ هەزار دۆلار فرۆشرا.

پارچە دارە ڕاستەقینە و مێژووییەکە ئێستا لە "مۆزەخانەی دەریایی ئەتڵەسی" لە شاری هالیفاکسی وڵاتی کەنەدا پارێزراوە. ئەم پارچەیە لە داری بەڕوو (Oak) دروستکراوە و وەک بەڵگەیەکی زیندووی ئەو کارەساتە گەورەیە ماوەتەوە، کە دەرهێنەری فیلمەکەش ویستوویەتی لە ڕێگەیەوە بینەر بباتەوە ناو کەشە ڕاستەقینەکەی کەشتییەکە.

لە کۆتاییدا، هەرچەندە لە ڕووی زانستییەوە ئەگەرێکی زۆر کەم هەبوو بۆ ڕزگاربوونی هەردووکیان، بەڵام جەیمس کامیرۆن پێداگرە لەوەی کە "جاک دەبوو بمرێت"؛ چونکە فیلمەکە تەنها گێڕانەوەی ڕووداوێکی مێژوویی نییە، بەڵکو چیرۆکێکی تراژیدییە دەربارەی قوربانیدان و عەشق، کە مردنی جاک مانایەکی ئەبەدی بە چیرۆکەکە بەخشیوە.

سەرچاوە: مۆزەخانەی دەریایی ئەتڵەسی لە کەنەدا، دۆکیۆمێنتاری (Titanic: 25 Years

Later with James Cameron).

PM:08:46:02/09/2026

ئه‌م بابه‌ته 308 جار خوێنراوه‌ته‌وه‌‌