هیچ منداڵێک بەدەر نابێت لەوەی کە جارێک لە جاران تووشی تا ببێت و زۆر گرنگە بە شێوەیەکی درووست و زانستی لەگەڵ ئەم حاڵەتەدا هەڵسووکەوت بکرێت و لەم نووسینەدا ڕێنمایی پێویست وەربگرە سەبارەت بەو بابەتە و دكتۆر زانیار پسپۆڕی نەخۆشییەکانی منداڵان له‌م بابه‌ته‌دا ڕونكردنه‌وه‌ی‌ ته‌واویداوه‌.

1- پشوودان و خۆماندوو نەکردن چونکە چالاکی زۆر دەبێتە هۆی زیاتر بڵندبوونی پلەی گەرمی.

2- لە کاتی هەبوونی تادا حەز بۆ خواردنی ژەمەکانی ڕۆژانە کەم دەبێتەوە و ئەوەی گرنگە تەنها بایەخ بە خواردنەوەی ڕێژەیەکی زۆری شلەمەنی وەک ئاو، شەربەت، شیر و شۆربا بدرێت.

3- پێویستە لە کاتی بەکارهێنانی پەڕۆی تەڕدا بۆ دابەزاندنی تا تەنها شوێنە دیارەکانی جەستەی وەک ناوچاوان و قۆڵ و قاچی پێ بسڕدرێتەوە و نابێت لەسەری بەجێبهێڵرێت چونکە بەم جۆرەی دواتر پلەی گەرمی زیاتر بەرز دەبێتەوە.

4-  تەڕکردنی هەموو جەستەو حەمام پێکردن هیچ سوودێکی نییە.

5- با جلەکانی بەری کەم و تەنک بن، لە کاتی هەبوونی لەرزدا بەتانی زۆری پێدا مەدە چونکە بەم جۆرە پلەی گەرمی لەشی زیاتر بەرز دەبێتەوە.

6- کۆتا ڕێکار لە کاتی هەبوونی تادا بریتییە لە بەکارهێنانی دەرمان، بێگوومان ئەمەش بۆ هەموو حاڵەتێک پێویست نییە و دەتوانن بۆ بەرچاوڕوونی سەیری نووسینەکانی پێشترم بکەن.

دوو دەرمان هەن کە هەمووان بە ناوەکانیان ئاشنان بەڵام زۆر گرنگە کە زانیاری ووردت لەسەریان هەبێت و هەوڵ بدە لێرەدا بەدەستیان بێنیت ئەوانیش پاراسیتۆڵ و ئیبوپرۆفینن.

تکایە چاوەڕێ مەبە تەنها بە جارێک پێدانی دەرمانەکە کە پلەی گەرمی دابەزی ئیترجارێکی تر بەرز نەبێتەوە، کاریگەری دەرمانی دژەتا کاتییە و هەر کاتێک کە تایەکەی دەستی پێ کردەوە دەبێت دیسان دەرمانەکەی پێ بدەیتەوه‌،  تکایە ئەمە ئاساییە و دوودڵ مەبن لەم کاتانەدا، پەنا بۆ گۆڕینی مەبەن و بڵێن سوودی نییە چونکە سرووشتی دەرمانی دژەتا وایە و خۆی هەر بۆ ماوەیەکی دیاری کراو ئیش دەکات و پاشان دەبێت دووبارە پێی بدەیتەوە.

پزیشکەکەت یاخود دەرمانسازەکەت لە دەرمانخانە پێت دەڵێن چەند لەم دژەتایانە بەکار بهێنیت، بەڵام وا باشترە لێیان بپرسیت کە زۆرترین و کەمترین ڕێژەی ڕێگەپێدراوی دەرمانەکە چەندە بۆ منداڵەکەم بۆ هەر جارێک کە پێی دەدەم؟ ئەم پرسیارە زۆر گرنگە هەتاکو لە خۆتەوە ڕێژەکەی بۆ زیاد نەکەیت لە کاتی دانەبەزینی تایەکەیدا.

- پاراسیتۆڵ بۆ هەموو تەمەنێک بەکاردێت بەڵام ئیبوپرۆفین لە دوای ٦ مانگییەوە بەکاردێت.

- تەنها یەک جۆر دەرمانی دژەتا بەکاربێنە مەگەر پزیشکەکەت ڕێنماییەکی ترت پێ بدات.

- لەگەڵ هەر جارێک بەکارهێنانی هەر کامێکیان ۱,۵ پلەی گەرمی لەشی منداڵەکە دێنێتە خوارەوە, وەهەروەها دوای یەک کاتژمێر کاریگەرییان بە تەواوی دەردەکەوێت.

پاراسیتۆڵ دەتوانیت هەتا ڕۆژی ٦ جاریش بەکاری بهێنیت واتا ٤ کاتژمێر جارێک بەڵام تەنها لەو کاتانەدا دەرمانەکەی پێ بدە کە پلەی گەرمی دیسان بەرز دەبێتەوە, ئەم گووتەیە بۆ ئیبوپرۆفینیش ڕاستە بەڵام ئەمەیان ڕۆژی ٤ جار واتا ٦ کاتژمێر جارێک بەکاردێت.