نامەیەكی بێناونیشان!

‌محەمەد فاتیح حامید

بۆچی دەڕۆن بۆچی كۆچ دەكەن؟، بۆچی ئەم كوردستانە جوانە بەجێدەهێڵن؟، ئەوەنیە نیشتیمانمان هەیە؟ ئەوەنیە ئاڵامان هەیە؟!

ئەوەنیە حكومەتی هەرێمی كوردستان هەمو مافەكانمانی دەستەبەركردوە؟ بە ئازادی دەژین و یەكسانی و دادپەروەری پەیڕەوكراوە؟!

بۆچی دەچن بۆ ئەوروپا قاپ و زەویتان پێبشۆن؟ لێرە لەچیتان كەمە؟ ئەوەنیە بەرپرسەكانیشمان تەنانەت گەشتێكی ئەوروپاش ناكەن و كەنەخۆش كەوتن پەنا دەبەن بۆ نەخۆشخانەكانی كوردستان!

ئەوەنیە هەمویان پاسپۆرتی وڵاتانی دەرەوە رەتەكەنەوە و شانازی بە كوردستانی بونی خۆیان دەكەن و كوردستانیان بۆكردوین بەبەهەشت!

ئەوەنیە بەرپرسەكانیشمان وەكو ئێمە بیر لەنەبونی دەكەنەوە و بیر لەكڕینی نەوت و غاز و نەهێنانەدی ئاواتی رۆڵەكانیان دەكەنەوە!

ئەوەنیە ئەوانیش هاوبەشی نەبونی و هەژاریمانن و ئەو رۆژانەیان هەر بیرە كە بەجوتێ‌ پیڵاوی لاسیكەوە ئەم گوند و ئەو گوند و ئەم ماڵە و ماڵیان دەكرد و سەروەت و سامانەكانیان لەگەڵ ئێمە بەش دەكەن!

ئێوە لەوە زیاتر چیتان دەوێت هاونیشتیمانیان؟ ئەوەنیە بەرپرسەكانی هەرێمی كوردستان، نەهامەتی ئێوە لەبەرچاو دەگرن و یەكەی نیشتەجێبونتان بۆ دابین دەكەن؟!

ئێوە ئاژاوەگێڕن و بەهیچ شتێك رازی نابن و هەر خەریكی نارەزایەتی دەربڕین و خۆپیشاندانن!، یان كۆچ دەكەن بۆ دەرەوەی وڵات!

ئەوەنیە ئازادی رۆژنامەوانیمان هەیە و هەمو رۆژنامەنوسەكان ئازادن و یان لەبەر خەفەتی نەبونی سەردەنێنەوە یانیش لەپێناو ئازادی لەناودەچن!

ئەونیە جیاوازی لەنێوان رۆڵەكانی خۆیان و ئێمە ناكەن و ژیانی خانەوادەكانیان وەكو ژیانی خانەوادەكانی خۆمانن!

ئەوەنیە شەوانە بەخەمی ئێمەوە سەر دەنێنە سەر سەرین و دەرگاكانیان بۆمان واڵایە و گوێ‌ لە گلەیی و گازندە و
كێشەكانمان دەگرن و بۆمانی چارەسەر دەكەن!

ئەوەنیە شەریكیان كردوین لەبیرە نەوتەكان و مانگانە شیرینیەكەی وەردەگرین و خۆیشیان هەر تاڵی دەچێژن!
رۆژانی گرانیتان لەبیرچو؟ ئەو رۆژانەتان لەبیرچو روبعە موچەیەكتان وەردەگرت، ئێستا موچەی تەواو وەردەگرن و كارەبا و ئاوی نیشتیمانیان بۆ كردون بە 24 كاتژمێر!

دانیشن بەدەردی خۆتانەوە باچیتر لەوەزیاتر دڵی پاك و بێگەرد و جوانی بەرپرسەكانمان ئازار نەدەین و نەشێوێنین!

ئەوان ساڵانێكی دوور و درێژە لەپێناو ئێمە جەنگاون، تاوەكو ئاواتەكانمان بهێننە دی، خۆدەبێت ئێمەش لێیان گەڕێین پشویەك بدەن، تا تێر ناوگەڵ و تێر گیرفانی پڕ و تێر لە خواردنی خۆش و تێر لەگەڕان و تێر لەژیان و تێر لەناپاكی دەبن!


PM:07:06:21/11/2021

ئه‌م بابه‌ته 228 جار خوێنراوه‌ته‌وه‌‌



هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی