مەترسییەكانی سەر ھەرێمی كوردستان و ئامرازەکانی بەرەنگاربوونەوەی
ئەبوكاروان
لەم ڕۆژانەدا لەھەموو كاتێ زۆرترو زیاتر گفتوگۆ سەبارەت بە مەترسییەكانی سەر ھەرێم دەكرێت، چەندین پانێڵ و دیدار ، نووسین و وتار لەو ڕووەوە ئەنجامدراوە و بڵاوكراوەتەوە، ھێرش و بۆردومانەكانی وەڵاتانی ھەرێمایەتی ڕۆژانەیەو لەبەیانامەكانیاندا بەبێ پەردە ئاماژەی پێدەدەن. جگە لە ئامادەكارییەكانیان بۆھێرشی ئاشكرای زەمینی، زانیارییەكانیش پێمان دەڵێن ڕێككەوتن لەنێوان ئێران و توركیا كراوە بۆ پەلامارو تێکدانی سەقامگیری هەرێم، لە بەرانبەردا دەسەڵاتدارانی ھەرێم هێندە خەمساردن وەک ئەوەی ڕوودەدات لە کیشوەرێکی تر ڕووبدات، ئەم دەسەڵاتە خەریكی ململانێی بێ مانا ویەكتر تۆمەتبارکردنن، تا ئاستی ھەڕەشەی شەڕە گەڕەك لەگەل یەكتر، هاوکات دابەشبوونە بەسەر میحوەربەندییەكانی ھەرێمایەتی و جیهانیدا.
مەترسییەکانی سەر هەرێمی کوردستان مەترسیی جددین، ئەگەری جێنۆسایدکردنی گەلەکەمان و داگیرکردنی زیاتری خاکەکەمان ئەگەرێکی زیندووە، بگرە ڕژێمی توڕکیا لە هەندێ ناوچە دەیان کیلۆمەتر هاتۆتە پێشەوەو تەماحی داگیرکارانەی زیاتری هەیە،
لە كاتێكدا گەلی ئێمە گەلێکی ترسنۆك نەبووە، ھەمیشە توانای جەنگ و بەرەنگار بونەوەی ھەبووەو ھەیەتی بەڵام بەداخەوە بەردەوام بووەتە قوربانی هەڵەی کووشندەی سەركردە و ناعەقڵانی ڕێبەرەکانی.
لەدونیادا ئەو کۆمەڵ و نەتەوە و گەلانەی ڕووبەڕووی کۆمەڵکوژی و جینۆساید بوونەوە، دوای کارەساتەکان دەستیان بە خۆدروستکردنەوە و خۆڕێکخستنەوە کردوە، ئەو نەتەوانە جینۆساید نەک لەناوی نەبردن، بەڵکو کردیان بە ھەلێک بۆ نیشتمانسازی، خۆبەڕێوەبردن، شوناس بەھێزکردن و تەنانەت دروستکردنی دەوڵەت. ئەم گەلانە بە لۆبیکردن، دیپلۆماسیەتی زیرەکانە و پەیوەندی دروستکردن، بە ئەدەب و ھونەر ، توانییان جینۆسایدەکەیان بە جیهان بناسێنن و دەزگا نێودەوڵەتیەکان ناچار بکەن بە یاسا دان بە دۆسییەکەیاندا بنێت.
چی بکەین؟
بۆ ئەوەی بەرەنگاری ئەم دۆخە مەترسیدارە ببینەوە ، سەرەتا دەبێ لەسەر ھەموو ئاستەكان بەپێی بەرنامە پێکەوە كاربكەین، دەبێ ستراتیژێكمان ھەبێ، لە نێو ئەم ستراتیژەدا ئەركەكان و ئەولەویتەكان دابەش بكەین، وتارو دەنگمان بەڕوونی بگات بەجیهان.
ھەنگاوێکی تر بواری سەربازیە ،كەپێویستە ھێزێکی تۆكمەی یەکگرتووی بەدیسپلینمان ھەبێت، کە لەلایەن یەك ناوەندی بریارەوە فەرمانی پێبكرێت، بەداخەوە ئێمە تا ئێستا ھێزمان نییە بە مانا نیزامییەكەی، ئەوەی هەیە هێزی دووحیزبن و ملکەچی بڕیارو فەرمانی حیزبەکانیانن،جگەلەوە ئەوەی هەیە لەڕووی ڕاھێنان و چەكەوە کەمووکووڕی هەیەو بەپێی پێویست نین، پارتی و یەكێتی و حیزبەكانی دەسەڵات، بەهۆی سەرقاڵیانەوە بە شتی لاوەكیەوە ئەم بابەتە گرنگەیان پشتگوێ خستوە.
مادام ھەڕەشەمان لەسەرە،كەواتە مافی خۆمانەو پێویستە بەبەردەوامی خۆمان ئامادەبكەین، ئێستا تەكنەلۆجیای سەربازی ھاتوەتە پێشەوەو بەدەستھێنانی زەحمەت نییە، توانای دارایش بۆ ئەو مەبەستە هەیە، بۆنموونە درۆن كە لەم سەردەمەدا ڕۆڵێكی باڵای ھەیە لەیەكلاكردنەوەی جەنگدا. ماعقول نییە ڕێكخراوێكی تیرۆریستی وەك داعش بە ئاسانی دەستبەری بكات، كەچی حكومەتی ھەرێمی كوردستان نەیبێ؟ عەقڵیەتی سیاسیی و حوكمڕانی و دامەزراوەیی ئێمە بۆدەبێت وابێت؟ بۆهێندە خەمسارد و بێباکین سەبارەت بەو هەڕەشانەی لەسەرمانن؟
پێویستە لەم قۆناغەدا لە ھەموو كاتێك زیاتر ھەوڵبدەین بۆ ڕێکخستنەوەی پەیوەندییەكانمان لەگەڵ وڵاتانی دونیادا، تا بۆمان دەکرێت دابەش نەبین بەسەر میحوەر و جەمسەرەکاندا، وەک ئێستا هەیە، سوود لە سەنگ و قورسایی و كاریگەری نێودەوڵەتی وەربگرین، چونکە ئەوان لە مەیداندا و لە زۆر پرس و جێگادا ڕۆڵی یەكلاكەرەوەیان ھەبوەو دەبێ، با دەسەڵاتداران لەم بارودۆخە ئاڵۆزەدا خەمێک لە میللەت بخۆن و بیریش لە چارەنووسی ئەزموونە پڕ قەیرانەکەمان بکەنەوە و هەوڵی پاراستنی بدەن، دەوڵەتانی دوژمن پارتیی و یەکێتییان وەک تەکتیکی کاتی قبوڵە، بەڵام کە کاریان پێیان نەما ئەوانیش بەئامانج دەگرن، کاڵفامییەکی سیاسییە گەر وا بیربکرێتەوە کە هەڕەشە تەنها لەسەر لایەک یا پارچەیەک یاخود هێزێکی سیاسییە، دەبێ تێبگەین کە هەڕەشەکە لەسەر هەموومانە..
کاتی ئەوە هاتووە هەموومان لەسەر بەرنامەیەکی ستراتیژێکی نیشتیمانی، نەتەوەیی، پێشکەتووخواز کۆببینەوە، بۆ ڕووبەڕوونەوەی تەحەدا و هەڕەشە جدییەکانی سەر هەموو پارچە لەتکراوەکانی نیشتیمانە بریندارەکەمان.
PM:02:49:26/11/2022
ئه‌م بابه‌ته 824
جار خوێنراوه‌ته‌وه
هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی