بگەرێرەوە بۆ وڵاتە بەرازەکەت، پۆلیسێک بە وشەی نەژادپەرستیی سوکایەتیی بە بێگانەیەک دەکات

‌بارزان شيخ عوسمان


فەرماندەی پۆلیس :” بۆتان دوپاتدەکەمەوە  ئەو گرتە ڤیدیۆیە کاری تێکردم .

دوێنێ دوای بڵاو بونەوەی گرتەیەکی ڤیدیۆیی ،کە نازانرێت چ کات و رۆژێکە و ئەفسەرێکی پۆلیس لە شاری گیسن (   Gießen)سەر بە هەرێمی  هیسن  Hessen ی دۆیچلاند(ئەڵمانیا)، بە وشەی نەژاد پەرستیی سوکایەتی بە پیاوێکی  بێگانە دەکات  و پێی دەڵێت "بڕۆ لاچۆ و  بۆ دەرەوە ،دەنا خۆم ناگرم ،بڕۆرەوە بۆ وڵاتە بەرازەکەت” ، بێرند پاول  فەرماندەی  پۆلیسیش لەگەڵ بێزاریی خۆیدا. لە ئاست ئەو قسانە ، رایگەیاند "ئەو گرتە ڤیدیۆیە کاری تێکردم ".

ئێستا پۆلیس ئەفسەرەکەی ناسیوەتەوە و بەدوای ئەو هاوڵاتییەدا دەگەڕێت  تا سکاڵا تۆمار بکات ،پۆلیسیش ئەرکە قانونییەکانی خۆی بەرامبەر ئەفسەرەکە جێبەجێ بکات .
پاول ئەوەیشی رونکردەوە بارودۆخەکە هەرچۆنێک بوبێت ،  ئەو جۆرە قسانەبەهیچ جۆرێک قبوڵ و پەسەند نییە، دیارە دواتریش راستییەکان بە جوانیی روندەکرێنەوە .  
تا ئێرە هەواڵەکە بو .

کۆمێنتەکە ئەوەیە ، ئەو ئەفسەری پۆلیسە  تەنیا بەقسەیەک کە بۆنی رایسسیزمی لێ دێت  ،کەوتۆتە ئەو گێژاوەوە ، دامەزراوەی پۆلیس بەدوای کەسەکەدا دەگەڕێت تا سکاڵا تۆمار بکات ،بۆ ئەوەی پۆلیس کاری  قانونی  خۆی بکات ،تادەستور و قانونەکان پێشێل نەکرێن .

من ناڵێم با عێراق و هەرێمی کوردستان  وەک دۆیچلاند بن ،بەڵام با لانی کەم شتێکی زۆر کەم لە فەرهەنگ و کلتوری پۆلیس ، ئاسایش وهێزە ئەمنییەکانی تر لەوان بچن .تا روداوی شەق و تێهەڵدانەکەی رۆژی دوشەممەی دادگای  گەورەی سلێمانی و ئەوانی رابردو دوبارە نەبنەوە  .

 بەهۆی دیمەنی قێزەونی لەو جۆرە و رەفتاری ئەفسەر و پۆلیس و ئاسایشێک هەمو ئەو هێزانە بەراورد نەکرێن بە سەربازانی سەدام حسێن و جاش و جەیشی شەعبییەکان  ،لە هێزێکی قانون چەسپێنەرەوە نەبنە سەرکوتکەر و داپڵۆسێنەر .

با ئەو هێزانە قانون بە حوکمی جلوبەرگی رەسمییان ،بە حوکمی رەفتار و هەڵسو کەوتی قانونیی و رەسمیی  ئەرکی خۆیان جێبەجێ بکەن ،نەک بە ئارەزو و میزاجی خۆیان کە توڕە کران ئیتر  کۆنترۆڵ لەدەست بدەن . تەنانەت لە ئێران و تورکیای دراوسێش پۆلیس زۆر بە ئەعسابی ساردەوە مامەڵە لەگەڵ بارودۆخەکان دەکەن ، بەندە  هەڵس وکەوتی پۆلیسی هەردو وڵاتم بینیوە کە هیچ خۆیان تێک نادەن بە (نەمیشیە ،ئۆڵماس) کۆنترۆڵی بارودۆخەکە دەکەن .لە کاتی ئاشوب و پاشاگەردانییەکانیشدا لە چوار چێوەی ئەو قانونەی بۆیان دانراوە  و رێگەیان پێدراوە،بەگژ ئەو کەسانەدا ئەچنەوە کە هێرش دەکەنە سەریان یا رێگەی هاتوچۆی خەڵک و جادەکان دەگرن .

لە ئەوروپا و ئەمریکای شارستانیی و مەدەنییەتیش ئەوە هەموان دەزانین کە چۆن بە وردیی ودیقەت پۆلیس  قانون ئەچەسپێنن(دیارە لەوێش شت روئەدات بەڵام زۆر کەم) .
لەو روداوی شەق تێهەڵدانە لە مرۆڤێک  لە بینای دادگا زۆر نیگەرانیی تر بەبیرمان هاتەوە ، هەمو بەتوندی  مامەڵە لەگەڵ روداو و حاڵەتەکاندا دەکەین .

دادوەرەکان بە توڕەو تڕۆکی و بەفیزەوە قسە دەکەن تەنانەت لەگەڵ شایەتەکانیشدا چ جای تۆمەتبار .

پیاوانی ئاینیی سەر بە مەدرەسە جیاجیاکانی هێزە ئیسلامییەکان بە توندی قسە بە ژیانی مەدەنیەت ئەڵێن ،مێرد و باوک  و برای ژنان و کچانی بێحیجاب،بەر نەفرەت و جنێوی ناشرین دەدەن تا رادەی فتوا دان بۆ کوشتنیان ،بێ ئەوەی کەس بوێریی هەبێت رایان بگرێت!

لەسەرەی نان وەرگرتندا یەکتر دەکوژن !،لە رێگەو بان  بەتیژڕەوی و بە مێشکی گەرم و توڕەییەوە ئۆتۆمبیل لێدەخوڕین !، ئەوەش لەوێ بوەستێت کە پێشنیاز بۆ حکومەت و پەرلەمان دەکرێت هەر بە زمانی شەق و توڕەیی وەڵام دەدەنەوە!خۆ حزبەکان هەر هیچ کەس ناتوانێت بڵێت فڵانە حزب و فیسارە جوڵانەوە  گەردو تۆزی گەندەڵیی ،نادیمکراسیی،کەللەرەقیی ،موزایەدە لە خۆتان بتەکێنن!

هەموان بەزمانی شەق و توندوتیژیی و توڕەیی مامەڵە لەگەڵ یەکتر دا،مامەڵە لەگەڵ  پێشهات و بارودۆخەکاندا دەکەن ،با کەمێک بەخۆدا و بە مامەڵەی پۆلیس و ئاسایش یشدا بچینەوە ،تا ئابڕو بردنی تر نەبینینەوە  . 


AM:11:46:15/06/2022

ئه‌م بابه‌ته 1252 جار خوێنراوه‌ته‌وه‌‌



هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی