ژینا ئەمینی و توندوتیژی خیزانی

‌ئارام سەعید

لەدوای مەرگی ژینا ئەمینی هەرێمی کوردستان تەواو خرۆشاوە نەک بەمەرگی ئەو بەڵکو بە خۆخڵافاندن و گفتوگۆی هەمەلایەنەی مەسەلەی لەچک و پرۆژە یاسای بەرەنگاربونەوەی توندوتیژی دژبە خیزان و ئافرەت، ئالەم دۆخەدا کە جیهان سەرقاڵی کەیسەکەی ژینا ئەمینی و کاردانەوەکانیەتی لەسەر ئاستی ئیران و دونیا لەم هەرێمەی خۆمان لەباشور یاسایەکیان هێنایە پارلەمان و داوایان پێشکەشکرد بخرێتە بەرنامەی کاری کۆبونەوەی پارلەمان و دۆخەکەیان خرۆشاند.

لەکاتێکدا ئەوانەی یاساکەیان پێشنیارکردوە بۆ گفتوگۆ و خۆیان بەنوێنەری خەلک دەزانن خۆیان دژی وەستانەوەو بەشێوەیەک مرۆڤ لەلای تێکەڵ دەبێت کێ عیلمانیە و کێ ئیسلامیە، هەموو فراکسیۆنەکان بەیاننامە دەردەکەن و دژن،هەمویان دەڵێن نابێت یاسایەک دەربچێت دژی شەریعەت بێت، کەواتە بۆهاتە بەرباس ولێکۆڵینەوە؟ لەکاتێکدا چەندین ریکخراوی کۆمەڵی مەدەنی و یاساناس پێی راگەیاندون ئەو مەسەلەیە کاتی نیە. سەرەرای ئەوەی هەرێم دەرگیری دەیان قەیرانی قووڵ و مەینەتیە...

لەکاتێکدا زۆر لەسیاسیەکان دڵنەوایی خانەوادەی ژینا ئەمینی دەدەنەوە و بێدەنگن لەوهەموو ژن کوشتنەی هەرێمی کوردستان، یان بەرگری لە خاتوو ژینا دەکەن و ودەسەڵاتیان هەبێت هەموو باشور دەکەن بە لەچک بەسەر.

بەدیوێکی تردا بۆ پشتگیری لە ژینا ئەمینی جگە لەرۆژهەڵات تاران و شارە گەورەکانی تر خرۆشاوەو هەندێک دەیانەوێت بیکەنە دەستکەوتی کوردایەتی بێ ئاگا لەوەی ئەم هەژانەی ئیران بەتەنها لەچک نیە و تەنها کورد نیە کە خۆپیشاندان دەکات، زۆر لەوە گەورەترە ومەسەلەکە ئازادیە و دۆخی سەختی ئابوری خەلکە وپەیوەندی بەکۆی ئێرانەوە هەیە وخاتوو ژینا بوە سیمبولی ئەو بزوتنەوەیە. ئایا لەمێژوماندا لەبەغدا خۆپیشاندانێک کراوە بۆ پشتگیری یان هاوسۆزی لە ژنێک یان پێاویکی کورد کەغەدریکی لێ کرابێت؟

خویندنەوەی دروست ئەوەیە دوور لەبانگەشەی هەڵبژاردن هەر هێزو لایەنێک بە راشکاوی بۆچونی خۆی بخاتە روو نەک ئەوەی بەناوی دینەوە هێرش بکەیتە سەر چالاکوانانی ژنان و جوڵانەوەکەی ئێران بە دژی ئیسلام لەقەڵەم بەیت و لەولاشەوە فرمیسک بۆ ژینا خانم بڕێژیت، یان بەناوی عیلمانیەتەوە بەرگری سەرسەختانە بکەیت لە بۆچونی ئیسلامیەکان و لەژێرەوە دژی راو بۆچونەکانیان بیت، بۆئەوەی دروست لەو دۆخە تێبگەین دەبێت چیتر سیاسیەکان درۆ نەکەن و ئەوەی بڕواو بۆچونیانە راشکاوانە بیڵێن. ئەوەش لەئێستادا مەحاڵە چونکە وتنی حەقیقەت لە سیاسەتدا گەلێک سەختە..


PM:10:46:24/09/2022

ئه‌م بابه‌ته 424 جار خوێنراوه‌ته‌وه‌‌



هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی