کۆتایی ئۆپۆزیسیۆنی بێچارە لە کوردستان

بەردەوام جەختمکردۆتەوە نابێ کەسمان لێ زیادبێت و ناشێت شکست بێتە فەرهەنکی گەلی ئێمە لە بەستێنی سیاسەت و کاری ڕکابەریدا ئەوەی بە ئۆپۆزسێۆن ناوی دەبەین، بەڵام ئەمە لەو ڕاستییە کەمناکاتەوە کە زیاتر لە دوو دەیەیە ئۆپۆزسیۆنی سیاسی لە هەرێمی کوردستانی عێراق لە بازنەی بێپلانی و هەلپەرستی و سیاسەتی کاردانەوەدا چەقیوە.  ئەم ئۆپۆزسیۆنە دوورە لە داڕشتنی دیدێکی یەکگرتوو بۆ حوکمڕانی، لەسەر قەیران دروستکردن و پشت بەستن بە بەغدا لە کاتی گونجاودا و ئیستغلالکردنی دروشمە پۆپۆلیستیەکان بێ ئەوەی بەرپرسیارێتی ئیدارە لە ئەستۆ بگرێت، ماوەتەوە.  دوایین پێشهاتەکان تەنیا لاوازی ستراکچەرەکەیی و پارچەپارچەبوونی ئەولایەنانەی بەهێزتر کردووە.

جوڵانەوەی نەوەی نوێ کە سەرەتا خۆی وەک هێزێکی تازەی چاکسازی پیشاندا، ئێستا چاوەڕوانی چارەنوسێکە کە بۆی دیاری دەکرێت.  نەیوێرا تەنانەت دانوستانی پێشوەختەش سەبارەت بە ئەگەری پێکهێنانی کابینەی دەیەمی حکومەتی هەرێمی کوردستان بکاتەوە.  بەڵکو سەرکردەکەی، شاسوار عەبدولواحید، لە زینداندایە.

هاوتەریب لەگەڵ ئەوەشدا، لاهور جەنگی کە سەردەمانێک دەسەڵاتدار بوو، ئێستا سەرۆکی بەرەی گەل، لەلایەن هێزە ئەمنییەکانی بافڵ تاڵەبانییەوە بە زۆر دەزیندان خزێنراوە،  لایەنە ئیسلامییەکانیش لە شانۆی بەغدادا بوونەتە بینەر و پشتگیری لە ئەجێنداکانی حکومەتی ناوەندی دەکەن نەک پڕۆژەیەکی سیاسی ڕەسەنی کوردی بخەنە ڕوو.

کەواتە پرسیاری جەوهەری دێتە ئاراوە: ئایا ئەم دژایەتییە سووڕی خۆی تەواو کردووە؟  وەڵامەکە تادێت ئاماژە بە بەڵێ دەکات. حەفتەیەک پێش لێدانی لاهورو لالەزار لە بەرنامەیەکی nrt بە پێشکەشکاری سیاسی کارزان عوسمانم گوت، کاتێک خۆم دەخەمە جێی پارتی و یەکێتی دەزانم کە ئیتر ئەم تایپە لە ئۆپۆزسێۆن لە هەرێمی کوردستان نامێنێ. (تەنانەت لە 15ی تەمووزی لە واڵی فەیسبووکی خۆم نوسیم لە وانەیە ئەم زەمینەیەیان نەمێنێت) دوای ساڵانێک لە ناعاقڵانییەت و کاردانەوەو گرەوکردن لەسەر فاکتەری بەغداد،  ئەم بزوتنەوانە ئیتر توانای داڕشتنەوەی مەیدانی سیاسی لە کوردستاندا لەدەست دەدەن.  بنکەی کۆمەڵایەتییان نەماوەو، سەرکردایەتییان کەوتۆتە مەترسییەوە و ستراتیژییەکانیان لە ئاستەنگدا کورتکراوەتەوە نەک گۆڕانکاری.

 هاوکات ڕەهەندی چەکداری سیاسەتی کوردیش لە گۆڕاندایە.  داڕمانی میلیشیا سێبەرەکان و وەرینی کوتلە چەکدارەکانی ئۆپۆزسیۆن پێشنیاری چەسپاندنی وردە وردە بەڵام بەدیقەتی ئاسایش لە ژێر دوو پایەی دامەزراوی دەسەڵاتدا دەکات، پارتی دیموکراتی کوردستان و یەکێتی نیشتمانی کوردستان. ئەم دوو حیزبە سەرەڕای گرژییە ناوخۆییەکانیان، سەرکەوتوو بوون لە بەدامەزراوەییکردنی هەژموونی خۆیان.

 ئەمەش بەو مانایە نییە کە دیمەنی سیاسی حکومەتی هەرێم هاوئاهەنگ بێت، نە ڕکابەرییەکانی نێوان پارتی و یەکێتی لەناو دەچن، نە ستراتیژیەتی یەکگرتووی ئیدارەدانی سیاسەتی کوردستانیان دەبێت، لەگەڵ ئەوەشدا ئاراستەی ستراتیژی ڕوونە، سەردەمی ئۆپۆزسیۆنی پارچەپارچە، پشتیوانی میلیشیا و وابەستە بە بەغدا، خەریکە دادەخرێت.  لە شوێنی ئەو واقیعێکی دیفاکتۆی دوو حزبی سەرهەڵدەدات، کە دەسەڵات لە چوارچێوەی دامەزراوی هەژموونی پارتی دیموکراتی کوردستان و یەکێتیدا کێبڕکێی لەسەر دەکرێت نەک بە ڕەوتی پشێوی پۆپۆلیستی.

 دەرئەنجامەکانی ئەم گواستنەوەیە قووڵن.  لە لایەکەوە ئاماژەیە بۆ دابەزینی فرەیی سیاسی لە فۆڕمی خام و ئۆپۆزسیۆنی خۆیدا.  لە لایەکی ترەوە ڕەنگە ڕێگا بۆ سەقامگیری زیاتر و کۆتایی هاتنی توندوتیژی سیاسی لەلایەن میلیشیا بە وەکالەت و پێگەیشتنی وردە وردەی پێکهاتەکانی حوکمڕانی بکاتەوە.  دەنگدەرانی کوردستان  کە لەسوڕانەوەی بێ کۆتایی خولگەی ئۆپۆزسێۆنێکی ناواقعی و بەربەستەکان ماندوو بوون، تادێت چاویان لەو دوو حزبە باڵادەستە دەبێت نەک لەبەر ئەوەی بێ کەموکوڕین، بەڵکو لەبەر ئەوەی ئەوان وەک تاکە پارێزەری بژاردەی بەردەوامی سیاسی کورد دەمێننەوە.

 بەم شێوەیە ئۆپۆزسیۆن بەڕاستی گەیشتووەتە کۆتایی خولی بێچارەیی خۆی. تا هێزێکی سیاسی نوێ و دیسپلینکراوی ڕاستەقینە سەرهەڵبدات، هێزێک کە بتوانێت بە دیدگاوە تەحەدای دووئیدارەی بکات.

PM:05:57:23/08/2025

ئه‌م بابه‌ته 2272 جار خوێنراوه‌ته‌وه‌‌

هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی