لە هەڵەبجە، دیسان ئاگربارانە

خاکی هەڵەبجە لێوان لێوە لە یادەوەریی خوێن و مەرگ. هەر بایەک لەهەر لایەکەوە هەڵدەکات، بۆنی سێوو زریکەو هاواری ١٦ ی سێی هەڵگرتووە، ئەوا دیسان شاڵاوی مەرگ هەڵیکردووەو  داستانێکی تری شەهیدبوون دەنووسێتەوە. 

یەکشەممەی ، ١٧ی ئابی ٢٠٢٥ ، ئاگرێکی بێ ئامان و بێ ویژدان، وەک ئەوەی لە قووڵایی ناخی داگیرکەرو نەیارەوە هەڵیکردبێت، هات و بە پڕتاو دوو گیانی پاکی بەرگریکار لە ژیان و لە هەڵەبجەی هەڵلووشی.

کاکە ئاری؛ کرێکارێکی سادەی ژینگەپارێز ، نە سەرباز بوو  نە فەرماندە و نە خاوەن پلەو پایەی حکومی و حیزبی.  ئاری پیاوێکی ئاسایی خاوەن دڵێکی گەورەی لەخۆبوردوو بوو ، بەخاوێنیی ڕاگرتنی هەڵەبجە بۆ ئەو کارێکی پیرۆزبوو .  

شیخ محەمەد ؛ پۆلیسێکی پاراستنی دارستان بوو، سوێندی خواردبوو سەوزایی دەشت و چیا و گەڵا و سێبەری درەختی هەڵەبجە ، خەونی پەمەیی منداڵان، لە شاڵاوی ئاگر و مەرگ بپارێزێ . ئەم دوو نیشتمانپەروەرە دڵنیا بوون دەیانزانی زۆرانبازی لەگەڵ ئاگردا زۆر مەترسیدارە ، بەڵام دڵسۆزییان بۆ خاک و خەڵکی قوربانیدەری هەڵەبجە ، شەهیدبوونی لە ژیان لا خۆشەویستترکردن.

پاشەکشێنەکردن و وەستانەوە بە ڕووی مەرگدا، کاری هەموو کەسێک نیە ، ئەوە تەنها لە قارەمانەکان دەوەشێتەوە . ئەو دوو شەهیدەی وڵات، چاونەترسانە چوونە ناو جەرگەی ئاگرەوە، بەو ئومێدەی هەرچییەکیان کەوتە بەردەست و چاو ، لە شاڵاوی مەرگ ڕزگاری بکەن ، بەڵام  ئاگری دڵ پڕ لە قین ناپاکیی لێکردن و بەناهەق ڕۆحی ماندووی هەردووکیانی ڕفاند .

ئەمڕۆ، هەڵەبجە دیسان  تازیەباری ڕۆڵە بە ئەمەکەکانێتی . پرسەی گێڕاوە بۆ کاکە ئاریی کە خاکی نیشتمان، بۆ ئەو دایک بوو !  بۆ کاکە شێخ محەمەد  کە درەخت و دارستانی یەکسانکردبوو  بە ژیان.  ئەمڕۆ دوو قارەمانی تر چوونە ڕیزی هەزاران شەهیدی هەڵەبجەی شاری شەهیدانەوەو  پرسیارێکی ناخهەژێنیش لەناو ئەو چڕە دووکەڵەدا وەک دەنگی شڤان پەروەر  دنیا دێنێتە لەرزە :  خودایە ! تاکەی ؟  خودایە  ! کەی پشوویەکی ئاسوودەیی بەم  وڵاتە ڕەوا دەبینی ؟

PM:02:53:19/08/2025

ئه‌م بابه‌ته 684 جار خوێنراوه‌ته‌وه‌‌

هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی