فەیسبووک کابرا شۆڤێنییەکەی دا بەگرت!
ئاوات جەمال ساڵح
کەسێک کە 21 عەقاراتی خانوو و زەوی بەناوە بێت لە کەرکوک و چەندان کەیسی گەندەڵی لەسەر بێت، سەیرە بوترێ بە ئەکاونتێکی ساختەی فەیسبووک چاڵیان بۆ هەڵکەند و رەوانەیان بنکەی پۆلیسییان کردووە.
راکان جبوری، پارێزگارە سەرەخۆر و شۆڤێنییەکە کە تەواو دژی کورد و پێکهاتە دژبەرەکانی بوون لە کەرکوک، دوای ماوەیەک لە هێنانە خوارەوەی لەسەر کورسی کەسی یەکەم شارەکە لە بنکەی پۆلیسی ساڵحیەی بەغدا دەستگیرکرا، دەستگیرکردنی راکان پەیوەندی بە هەشت سکاڵا هەبوو، کە دادوەر دوو سکاڵایانی خستووە بەرباس، ئەوان لەناوخۆی خۆیان شەڕیانە لەگەڵ وەسفی عاسی و محەمەد تەمیم، دواجاریش ئەوان چاڵەکەیان بۆ هەڵکەند.
راکان گەرچی دەیان سکاڵای لەسەرە، وە تۆمەتبارە بە بەناوکردنی 21 عەقارات لە شارەکە و گلدانەوەی بڕی یەک ترلیۆن دینار لە پارەی پڕۆژە، بەڵام دەرکەوتووە برازایەکی راکان جبوری، پەیجی داناوەو هێرشی کردووەتە سەر وەسفی عاسی و محەمەد تەمیم، ئەوانیش لە ڕێگەی ئاسایشی نیشتمانی عێراقەوە دۆزیویانەتەوە کە برازای راکانە و بە فیتی ناوبراو کارەکەی کردووە، تا دەستگیرکرا.
ئەوەتا لە پەڕەی بەرەی عەرەبی یەکگرتوو کە هی وەسفی عاسییە، باسی پەیجە علوجەکەی راکان جبوری دەکات و بەفیتنە ناوی دەبات، ئەمەش دەریدەخات شەڕی ناوخۆی عەرەبی سونەیە، کەچی یەکێتی و نەوەی نوێ بۆ موزایەدە خەریکە شەڕەکە دەپێچنە کورد.
ئەوە لە کاتێکدایە کورد لە شارەکە 108 پۆستی ئیداریی و 27 پۆستی ئەمنی لە دەستداوە، تاکی کورد لە کەرکوک، دوزخورماتوو، مەخموور و دەیان ناوچەی دیکە لەبری شەڕی حزب و بەرژوەندی بەرپرسە کوردەکان چاویان لەوەیە، پارە دزراوەکان و ئەو داوانامانەی هەیانە بۆ دورخستنەوەی کێشە و ئاوەدانکردنەوەی ناوچەکان کاری سەربکرێ،
بەڵام، رێک بە پێچەوانەوە حزب و بەرپرسە کوردەکان، لەبری ئەوەی بزانن لەنێو خاک و ئیدارەیەکی عەرەبیدا چی دەکەن لە هەلی راپێچکردنی راکان جبوری بۆ بنکەی پۆلیس، کە لەسەردەمی ئەودا کورد لە کەرکوک چەوسێندرایەوە، کەچی خەریکی ئاهەنگ گێڕانن!
PM:11:42:22/04/2025
ئه‌م بابه‌ته 280
جار خوێنراوه‌ته‌وه
هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی