روانگای نێچیرڤان بارزانی لە نێوان دێڕەكانی راپۆرتەكەی ( پلاسخارت)دا

‌ئاریان فەرەج

جینین پلاسخارتی نێردەی تایبەتی سكرتێری گشتیی نەتەوە یەكگرتووەكان لە عێراق، كە هێندە و بگرە زیاتر لە زۆربەی سیاسەتكارە عێراقییەكان لە واقعی ووڵاتەكە تێگەیشتووە و نموونەی نمایندەیەكی ئەكتیف و مەیدانی و بەئاگای نێودەوڵەتییە، دۆستێكی پەرۆشی سەرخستنی پرۆسەی سیاسییە لە عێراق و كوردستاندا و هەر ئەو پەرۆشییەشە بۆتە مایەی ئەوەی، هەندێك لایەنی عێراقی كەیفیان پێ نەیەت و بە دەستێوەردەروخۆهەڵقورتێنەر خەتاباری دەكەن.

خانمی پلاسخارت لە دوایین راپۆرتیدا دەربارەی دۆخی تەپوتۆزاوی سیاسی و ژینگەیی عێراق، هەر بەو راشكارییەی پێی ناسراوە، لەبەردەم نوێنەرانی كۆمەڵگەی نێودەوڵەتیدا، بە نوخبەی سیاسیی عێراقی گووت: ووڵاتەكەتان روو لە كارەساتە، قۆڵهەڵماڵین و دەست یەكدی گرتنی دەوێت، نەك قوڵی یەكدی بادان و دەست یەكدی شكاندن. گەر بەخۆدانەچنەوە، بۆ یەكدی دانەشكێنن و نەرمی نەنوێنن و پێكنەیەن، نەك هەر تەپوتۆزی غەزەبی ژینگە، غەزەبی خەڵك و تەپوتۆزی فەوزای میلیشیایی و دەخاڵەتی دەرەكیی تێكدەرانە و هەراشبوونەوەی تیرۆریش چاوەڕوانتانە.

دەربارەی كوردستانیش، زەنگی مەترسییەكەی پارساڵی بەبیرهێناینەوە كە لە زانكۆی كوردستان و لە حزوری سیاسییەكاندا، نەیشاردەوە و ووتی: ئەگەر نەیپارێزن و چاكی نەكەن و لە پێناویدا دەست نەخەنە دەستی یەكتر، هیچ گەرەنتییەك نییە ئەم هەرێمەی هەتانە، لەم جۆگرافیا سیاسییە بێ ئامانەدا، تا ئەبەد بۆتان بمێنێ.

لەم راپۆرتەشدا بە ئەسەفێكی دۆستانەوە ووتی: دوای تێپەڕینی ساڵێك بەسەر ئەو دیدارەی زانكۆی كوردستاندا، نەك ئەوەی دەبوا بكرێ، نەكرا، بەڵكو دۆخی هەرێم بەرەو گرژی وناتەباییەكی ئەوتۆهەڵكشاوە كە ئەو ناوی نا دابەشبوونی ناوچەی زەرد و سەوز. لەو باوەرەشدا بوو كە ئەگەر ئەو دابەشبوونە بەردەوام بێ كە هاوكاتە لەگەڵ موشەكباران و شەڕفرۆشتن بە هەولێر و هاوكاتیشە لەگەڵ نەگەیشتن بە چارەسەرێكی بنەڕەتیی پتەو لەگەڵ بەغدا، ئەوا بەدیكردنی داهاتوویەكی گەش بۆ خەڵكی هەرێمی كوردستان، زەحمەتە. لە خستنەڕووی رێگەچارەشدا، بێ سێ و دوو ووتی: سەرەتای هەنگاو كۆتاییهێنانە بە ناكۆكی و گرژییەكانی نێوان هەولێر و سلێمانی، تیكگەیشتنی جدییە لەگەڵ بەغدا و زەمینەسازییە بۆ هەڵبژاردنێكی ئازاد لە فەزایەكی كراوەدا بۆ هەموان.  

ئەوەی جێی سەرنج و مایەی دركپێكردن بوو بەلای هەر چاودێر و بەدواداچوویەكی بەئاگاوە، هێڵە گشتییەكانی دید  و تێڕوانینەكانی سەرۆكی هەرێمی كوردستان بوو كە لە نێوان دێڕەكانی راپۆرتەكەی پلاسخارتدا بە روونی دەبینران. لە نێوان ئەو دێڕانەدا ئەو دەنگە دەبیسترا كە سێ ساڵە دەڵێت: عێراق ووڵاتێكی ماندووە و گەلەكەی گەیشتۆتە لوتكەی بێزاری و نائومێدبوون لە پرۆسەی سیاسی، ئەگەر بەخۆداچوونەوە نەبێت، هەموان دان بە هەڵەكانیاندا نەنێن، بنەمایەكی نوێ بۆ لێكگەیشتن فەراهەم نەكرێ، ئومێد نەدرێتەوە بە نەوەی نوێ، هەموو پێكەوە بەرەنگاری ئاڵانگارییەكان نەبنەوە، ئەگەر عێراق لە جیاتی گۆڕەپانی بەریەككەوتنی ئەجیندا و ئیرادە  ئیقلیمی و دەرەكییەكان، نەكرێتە سەرزەمینی بەیەكگەیشتنی بەرژەوەندییەكان، ئەگەر سیاسەت و عەقڵیەتی یەكدی نەفی كردن نەپێچرێتەوە، ئەگەر هەموان نەسازێن و لە سەر خاڵە هاوكۆییەكان پێكنەیەن، لەوە زیاتر گەلی عێراق ناتوانێ قەناعەت بەخۆی بكات كە لە ووڵاتێكی پڕخێروبێردا هەردەبێ بەو كولەمەرگییە بژی.

لە نێوان دێڕەكانی راپۆرتەكەی پلاسخارتدا، ئەو پەیامەی سەرۆك نێچیرڤان بارزانی بە فۆنتێكی رۆشن دەخوێندرایەوە كە دەڵێ: هێزە سیاسییەكانی كوردستان گەر یەكدەنگ و پێكەوە نەبن، گەر ئیرادەی یەكتر بشكێنن، نە دەتوانن بەسەر گرفت و قەیرانەكانی نێوخۆدا زاڵبن. نە لە بەغداش دەتوانن ئەو سەنگ و قورسایی و هێزە یەكگرتووەیان هەبێ كە مافە دەستورییەكانی گەلی كوردستانی پێ دەپارێزرێ.

لە نێوان دێڕەكانی راپۆرتەكەی پلاسخارتدا، دەنگی سەرۆكی هەرێمی كوردستان دەبیسترا كە دەیگووت: هەر لێكترازانێك بە ئاڕاستەی دوو زۆن و دوو ئیدارە، یەكسانە بە گەیشتنی هەموومان بە سفر ئیدارە.


PM:08:00:18/05/2022

ئه‌م بابه‌ته 1428 جار خوێنراوه‌ته‌وه‌‌



هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی