مەرگ لە نیشتماندا یان لەدنیای سەرمایەداردا

‌عوسمان زیندانی‌

ئەوکاتەی کرێکاران لەناو نیشتمانی خۆیاندا کاریان دەست ناکەوێ و دەکەونە بەرمەترسی هەژاری و برسێتی ودەکەونە ناو لەشکری بێکاریەوە بەناچاری بۆ بژێوی ژیانیان کۆچ دەکەن بۆ شوێنێکی تر٫ زۆر جار بۆیان دەبێت بە نیشتمانی دووەم٫ یان نیشتمانی سێیەم و بۆ هەندێکی تر دەبێت بە دوا مەنزڵگایی ژیان و بۆ هەتاهەتایە ناگەڕێنەوە بۆنیشتمانی دایک وجارێکی تر شاد نابنەوە بەدیداری ئازیزانیان هەرلەوێ ئەسپەردە دەکرێن بەخاک و لەنامۆیدا سەردەنێنەوە ٫جا کرێکارێکی کۆچبەر لەهەرکوێیەکی دنیادا لەسایەی سیستەمی سەرمایەداریدا سەربنێتەوە ئیتر ئەوێ دەبێت بەنیشمانی کۆتایی ٫ 

ئەگەر بەباشی لەتابلۆی ژیانی کرێکارانی کۆچبەر بڕوانین و بزانیین ماف و ژیانیان چۆن دابینکراوە دەبێت ڕەچاوی سیستەمی گشتی جیهان بکەین٫ کە بەپێی رێکەوتننامە و یاسا و پەیماننامە نێودەوڵەتیەکان جیاوازی ناکرێت لەنێوان مافی کرێکاری بیانی و کرێکاری ناوخۆی بەدیارکراوی( لەپەیماننامەی نیودەوڵەتی پاراستنی مافەکانی کرێکاری کۆچبەر و ئەندامانی خێزانەکەی) بەبریاری کۆمەڵەی گشتی نەتەوە یەکگرتووەکان ژمارە(٤٥/۱٥۸) لەساڵی ۱۹۹۰دا ولەماددەی (۲٥) دیاریکراوەنابێ هیچ جۆرە جیاوازیەک بکرێت لەنێوان کرێکاری بیانی و ناوخۆی دا٫ پێوویستە هەمان فرسەتی کارو مامەڵەیان لەگەڵدا بکرێت لەسەرجەم مافەکانی وەک (کرێ و دەرماڵەو ژینگەی کارو سەلامەتی و گریبەستی کار و مافی کاری سەندیکایی و دەستەبەری کۆمەڵایەتی زۆر مافی تر ) ٫ بەڵام ئەوەی لەواقیع و ژینگەی کاردا هەیە جیاوازیەکە بەڕوونی دەبینرێت و ڕۆژانە خاوەنکار پێشێلکاری زەق ئەنجام دەدان بەرامبەر ماف و داخوازی ڕەواو یاسایی کرێکارانی بیانی چ لەهەرێمی کوردستاندابێ یان لە عێراقدا بێت ٫ سەرباری بوونی یاسای کاری عێراقی ژمارە (۳۷)ی ساڵی ۲۰۱۵ کەتایبەتە بەماف و ئەرکی کرێکاری بیانی و حکومەتی هەرێمیش ڕێنمایی ژمارە (۲)ساڵی ۲۰۰۷ دەرکردووە بەڵام ئەم یاسا ورێنماییانە زیاتر ئەرکی کرێکاری بیانیان دیاری کردووە و هەردوو یاسایی وەبەرهێنانی ژمارە (۱۳) ساڵی ۲۰۰٦ عێراق و یاسایی ژمارە (٤) ساڵی ۲۰۰٦ هەرێمی کوردستان دەستی وەبەرهێنەرانی واڵا کردووە بۆ هێنان وبەکارهێنانی کرێکاری بیانی ٫ بێ ئەوەی لە واقیع و ژینگەی کاردا هەمان مامەڵەی کرێکارێکی ناوخۆیان لەگەڵ بکرێت لەزۆر ناوەندی کاردا کرێ کەم دەدرێت پێیان ٫ زیاتر لە ۸ ّسەعات کاریان پێ دەکرێت ٫ لەهەلومەرجێکی سەختی کاردا دەژین و پاسپۆرتەکانیان لێ وەردەگیرێت و وەک کۆیلەی کاری سەردەم مامەڵەیان لەگەڵ دەکرێت.

بۆیە پێوویستە کاربکەین بۆگۆڕین و هەموارکردنەوەی ئەم یاساو رێنماییانەی حکومەتی هەرێم و عێراق و تا کو سەرەتا بەچەکی یاسا داکۆکیان لێ بکرێت و پاشان بەدروشمی (کرێکارانی جیهان یەکگرن ) پێشوازیان لێ بکەین و ئەم دروشمە بدەینە بە گوێی سەرجەم کرێکاراندا و نەیەڵین خاوەنکار درزی نێوان چینی کرێکاران فراوان بکات و یەکڕیزی و یەک هەڵوێستیان تێک بدات چونکە وانەکانی مێژوو پێمان دەڵێ زۆر جار سەرمایەداران لەکاتی بەرزکردنەوەی داواکاری کرێکارانی ناوخۆی ووڵاتێکدا بەدروست کردنی ناکۆکی نێوان کرێکاری بیانی و ناوخۆی دەیەوێ خەباتی کرێکاران ڕابووەستێنێت ووەئەو نموناەی ئێستا لەهەرێمی کوردستان ڕوو دەدەن ٫ دەچێت نرخی کەمتر دەدات بە کرێکارێکی بیانی و پێشێلی زۆر مافی تریان دەکات بۆ ئەوەی کاری نەوەستێت و کەمترین تێچووش بەکار بێنێت لەپرۆسەی بەرهەمهێناندا بێ بەکارهێنانی دەستی کاری ناوخۆی ٫ئالێرەدا ئەگەر کار بکەین و هەوڵی چەسپاندنی یاسای بێ جیاوازی کردن بدەین سەرمایەدار ناتوانێت لەم ململانێیەدا سەرکەوتوو بێت٫ چونکە ئەو قازانج ئامانجیەتی هەمیشە هێزی سەرمایەدار دەیەوێ لەئاستی جیهانیدا پەل وپۆی بهاوێت و کار بۆ کۆنترۆڵی جیهان دەکات ٫دەبێت کرێکاران و سەندیکا ڕاستەقینەکانی کرێکاران و هێزە شیوعی و کۆمەنیستەکان باشترو لەچوارچێوەی رێکخرابوونی چینی کرێکاراندا ئاڵاهەڵگری خەباتی چینایەتی بن تاکو لەئاستی ئەم ململانێ ناوخۆی و جیهانییەدابن .