لە زامی دێرین بۆ عەزمی مەتین

‌ستران عەبدوڵا

لە قەتلوعامی موکریانەوە. تا راگوێزانی عوسمانلی.لە کوشتار و گەمارۆی دەرسیم بۆ راگوێزانی ستالینی بەرەو سەحرای ئاسیای ناوەڕاست. کتێبە زبر وزەرد و روشاوەکانی مێژوو قەید و تۆماری خوێنی بە مەرەکەب سپاردووە.

لە خنکانی ھەڵەبجە و سەردەشت بەرێگای جینوساید ، بەرەو ئەنفالی ١٨٢ ھەزار زامی سەحرای سەماوە.لە وێستگەی بێسەروشوێنکردنی بارزانییەکان بۆ وێستگەی قاچاخی رۆبۆسکی. دیرۆکێکی  ترس و برسی لە پشتمانەوە و یەکی دی لەتەنیشت و دەوروبەر. یەکی دی نزیکە لە شەنگال و یەکی دی ،خوا نەکەران ، رووی لێمان دەبێت ئەگەر بە ژیری و سیاسەت و سەبر تەداروکی نەتەوەیی بۆ نەکەین .

ئەلبومە رەشەکە نووسیویەتی :ئەگەر ماشێنی جەنگی سوپای دەوڵەت پشوو بدات و سیاسەتی رەسمی لەسەدەی بیستویەك شەرم لە پەلاماری مۆدێرن بکات ، ئەوا دەسرێژی شەقاوەکانی تیرۆر و داعش لەسەر خەتن تا وەکالەتی ئەرکی دۆزەخی جێبەجێ بکەن.
شەنگال فەرمانی ژمارە ٧٣ یە و  پەرتی و کەرتی نیشتمان و نەتەوەش  زامێکی قووڵ و دەردێکی بۆماوەییە کە «توبی شەعبی» نەیتوانی چارەی بکات ، بەڵام زانستی ھاوچەرخ چارەی دەکات ئەگەر رەچەتەکەی پەیڕەو بکەین کە دەنکێ حەپی برایەتی و کەوچکێ دەرمانی تێفکرینی جەماعییە لە دوارۆژی وڵاتی نیشتەنی نێوان دووزێی ئەنفال و قەتلوعام.

شەنگال بۆیە قەوما چونکە جوگرافیای فەراغی ئەمنی وایە کەس خۆی ناکاتە خاوەنی، تەعریب وراگوێزانی میراتی نەفرەتی بۆیە ماوە چونکە فەراغی دەستوری لە عەھدی دەستوری موئەقەتەوە بۆ ئەمرۆی دەستوری جێبەجێنەکراوی غەزەبلێگیراوی بەر ھەوای شەعبەویەت ناھێڵێ داد و ھەق و چەکوشی ئینساف بریار بدات .

ئەنفال بۆیە وەك قەدەری ئەزەلی لێھاتووە چونکە  تەماحی دونیای زائیل نامانپەرژێنێتە سەر مەحکەم کردنی دینگەی نەتەوەییمان.
ھیچ ناخۆشی و نەخۆشی و تەنگانەیەك وا دیزاین نەکراوە کە بۆ بەرگی کوردی لێقەوماو و کوردستانی گەمارۆدراو پەراوەکرابێت و دوورابێت. گشتی ئەم دەرد و خەمە ڕاست نییە و ھەمووی دەستکردی زوڵموزۆری بەشەری تەماعکار و غەوارە  و قەوماوی بندەستی و شپرزەیی و دەستەوەستانییە. راپسکانی ژیری و رابوونی زەین روونی و   تەگبیری پێکەوەیی لێکدانەوە و را و رێگا جیاوەزەکانی گەرەکە. ئەوە تاقە دەرمانە تا نەزیفی بەسەرھاتەکانی زام و خەم رابگرین و لە نوقتەیەك بیپێچینەوە. تا تەقویمی یادی مەرگەساتی لە شوێنێ بوەستێ و  چیتر مۆنۆمێنت و یادنامە و ئەمنەسورەکان و تازێخانەکانمان فراوانکردن و گەورەکردنیان نەوێت.
یادەکان بۆ ئەوە باشن دوای کوڵی گریان دەستەیەك ئیرادە و دەسکێك وزەی  بەتینی بۆ بخوازین


PM:01:10:03/08/2022

ئه‌م بابه‌ته 320 جار خوێنراوه‌ته‌وه‌‌



هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی