واز لە هەڵەبجە بهێنن با هەناسەی خۆشی بدات
چرۆ شەهاب
وازیان لێ بهێنن با خۆشی و شادی بگێڕن.
وازیان لێ بهێنن با فێستیڤاڵی جوان و دڵخۆشی بگێڕن، وازیان لێ بهێنن با بوژانەوەی
ژیان و ژینگەیەکی تەندروست بۆ خۆیان دروست بکەن. وازیان لێ بهێنن هەرچییەک پێیان
جوان و خۆش و جیاوازە بیکەن.
وازیان لێ بهێنن با فێستیڤاڵی کڵاش و فەرەنجی
و سەروبەست و کۆڵوانە و گوێز و سیاچەمانەش بکەن، با ئەوان دڵخۆش بن و بەشدار بن بۆ
خەندە و خۆشی خۆیان و ئێمەش.
جوانی و خۆشییەکانیانم لە تۆڕە کۆمەڵایەتییەکانەوە
بینی، لە ئاهەنگی گۆرانییەکانی پەیوەند جاف، پیر و گەنج و منداڵ و خاوەن پێداویستی
تایبەت، حیجاب و بێ حیجاب، تەنانەت مونەقەبەشم بینی، پێکەوە ڕیزیان بەستبوو، گوێیان
لە گۆرانییەکان دەگرت و بەشداری ئاهەنگ و میوزیک و خۆشییەکان بوون. ئەمە هەڵەبجەی ڕاستەقینەیە،
شارێک کە هەموو جیاوازییەکانی لە یەک ڕیزدا کۆدەکاتەوە و بە یەکەوە خەندە دەکەن.
ئیتر بەسە تانە و توانج لە خۆشییەکانیان.
سەیرە لە پشت شاشەیەکەوە هەر خەریکی بێڕێزی بین بە خۆشییەکانیان، بۆ دەبێت هەمیشە
بەدوای برینی قوڵ بگەڕێین و مشتێک خوێی بەسەردا بڕێژین؟ ئەوەی ئازاری چەشتووە مافی
ئەوەی هەیە ئاسوودە بێت، و ئەوەی لە دوورەوە تەماشا دەکات مافی ئەوەی نییە دیاری
بکات ئەو خەڵکە کەی بخەندێت و کەی بگری.
ڕێزگرتن لە قوربانییان تەنها بە گوڵ لەسەر
یادگارەکان نییە، بەڵکو بەوەیە ئەوانەی ماون بژین، نەخۆشخانەیەکی باش، ڕێگایەکی ڕێکوپێک،
پارکێک بۆ منداڵان، هەلی کار بۆ گەنجان، گەشتیاری و کەلتوور و فێستیڤاڵ، ئەمانە هەموو
شێوازێکی زیندوون بۆ مانەوە و بەردەوام بوون، شار نابێت بە ئەلبومی ئازار بمێنێتەوە، با ئازارەکەی ببێتە هێز و ئاوەدانی و خۆشگوزەرانی، نەک کۆت و زنجیر.
هەڵەبجە سروشتێکی جوانی هەیە، چیاکانی
هەورامان، شاخ و دۆڵ و خاکێکی ئارام. شارێکی جواندەتوانێت ببێتە شوێنی گەشتیاری کوردستان. هەر فێستیڤاڵێک، هەر ئاهەنگێک و هەر
گەشتیارێک کە دێت، بازاڕێک زیندوو دەکاتەوە، دوکانێک دەکاتەوە و گەنجێک هەلی کار دەبینێتەوە.
ئەمە ئابووری یاد و بۆنەیە، بەو مانایەی کە بۆنەو فیستیڤاڵ و کۆنسێرت و خۆشییەکان
دەبنە هۆی ژیان، بۆیە بەڕاستی و بە دڵ دووبارەی دەکەمەوە،
واز لە هەڵەبجە بهێنن، با هەناسەی خۆشی بدات.
PM:04:00:30/10/2026
ئه‌م بابه‌ته 120
جار خوێنراوه‌ته‌وه
هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی