با د. فوئاد حسێن پێمان بڵێ خەتای بەغدایە یان هەرێم، نەك بەرپرسانی هەرێم

- د. فوئاد حسێن ئەندامی مەكتەبی سیاسی پارتیە
- جێگری سەرۆك وەزیرانی عێراقە
- وەزیری دەرەوەی عێراقە
- سەرۆكی ئەنجومەنی وزاری عێراق بۆ ئابورییە، کە ئەنجومەنەكە پێکدێت (وەزیری دارایی عێراق، وەزیری پلاندانان، وەزیری بازرگانی ، وەزیری پیشەسازی، وەزیری كاروباری كۆمەڵایەتی، پارێزگاری بانكی ناوەندی عێراق، ئەمینداری ئەنجومەنی وەزیرانی عێراق، راوێژكاری سەرۆك وەزیران بۆ كاروباری ئابوری، یاریدەدەری وەزیری نەوتی عێراق) لەناو ئەو ئەنجومەنەدان كە فوئاد حسێن سەرۆكیەتی، واتا ئابوری و دارایی و بانك و بازرگانی و پیشەسازی و پلاندانانی عێراق هەر پرۆژەو بڕیارێك بدەن واژۆی كۆتایی دەبێت فوئاد حسێن بیكات..!!!

ماوەی چوار ساڵە د. فوئاد حسێن كە ئەندامی مەكتەبی سیاسی پارتیە ئەم پۆستانەی هەیە لەبەغداد،(بە نزیكەی بەقەد سودانی پۆست و دەسەڵاتی هەیە) ئەگەر نەناردنی موچە خەتای بەغدایە، بۆ یەكجار ئەم برادەرە بابێتە سەر شاشەكانی خۆتان و بۆمان رونبكاتەوە كە چۆن خەتای بەغدایە، بۆ ئەوەی قەناعەت بكەین، ئەگەر نا بێدەنگی فوئاد حسێن و وەزیر و بەرپرسە باڵاكانی كورد لە عێراق سەلمێنەری ئەوەیە كە خەتاكە حكومەتی هەرێمە نەك بەغداد؟

بۆ یەك جار من لە فوئاد حسێنم نە بیستووە بڵێ خەتای بەغدایەو هەرێم پابەند بووەو بەغداد پابەند نابێت..!!

نوێنەران و بەرپرسانی باڵای كورد لە بەغداد، یاخود دەزانن خەتای هەرێمەو نایانەوێت قسە بكەن، یاخود جورئەتیان نیەو سەرقاڵی بەرژەوەندی و كاری شەخسی خۆیانن..؟؟

ئیتر باكەس قسە نەكات لەبەرپرسانی هەرێم، فوئاد حسێن نوێنەری حزبێكە كە سەرۆكی حكومەت و سەرۆكی هەرێم و بڕیاری نەوت و بودجەو ئەمن و ئاسایشی لایە، دەبێت ئەو قسە بكات و روونی بكاتەوە، لەپرسی موچەدا هەرێم پابەند نیە، یان بەغداد؟ لەم تەنگانەیەدا قسە نەكات، ئیتر كەی قسە دەكەن؟

PM:06:10:03/07/2025

ئه‌م بابه‌ته 368 جار خوێنراوه‌ته‌وه‌‌

هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی