پەرلەمانتارێک: پرساندنی سەرۆکی حکومەت، جێگرەکەیی و وەزیری دارایی بەبێ ئامادەبونی خۆیان بەڕێوەدەچێت

‌ئامادەبوونی سەرۆکی حکومەت، جێگرەکەی و وەزیری دارایی لە پەرلەمانی کوردستان (تشرینی یەکەمی 2020)

دابان محەمەد، ئەندامی فراکسیۆنی گۆڕان لە پەرلەمانی کوردستان لە راگەیەنراوێکدا رایگەیاند، دانیشتنى پەرلەمان، بۆ دەنگدان لەسەر پرساندنى سەرۆکى حکومەت، جێگرەکەى و وەزیرى دارایى بەڕێوە دەچێت، بە بێ ئامادەبونى خۆیان و بە خوێندنەوەى چەند ڕاپۆرتێک "پرۆسەکەش لە نمایش دەچێت، بۆ پوچەڵکردنەوەى هەمو ئەو قسە و ڕەخنانەى بە درێژایى ئەم کابینەیە کراون و گیراون، پاساودانى ئەمو ئەو کارانەیە، کە شانى خەڵکیان قورس کردوە، بە بڕینى موچەشەوە، بۆیە بەشدارى لە دانیشتنێکدا ناکەین زیاتر لە نمایش بچێت و ئێمەش بینەر بین، بەشێک نابین لە متمانە دانەوە بەم کابینەیە".

ئاماژەی بەوەشکردوە، "تا ئێستا، ئەم کابینەیە وەڵامى بۆ ئەنجام نەدانى چاکسازى گشتگیر و جێبەجێنەکردنى چاکسازى، کۆرۆنا و تۆمەتبارکردنى خەڵک و لایەنى ترە. وەڵامى بۆ پێنەدانى موچە و دواکەوتنى بە 60 ڕۆژ جارێک، حکومەتى عێراق و پارەکەى بەغدایە. وەڵامى بۆ کۆنەکردنەوەى پارە و داهاتى خۆى، دروستبونەوەى شەڕى ناوخۆیە".

دابان محەمەد ئەوەشی خستوەتەڕو، وەڵامى حکومەت بۆ قاچاغچێتى سنورەکان، بونى دوو ئیدارەیى و نەبونى دەسەڵاتى حکومەتە بەسەر هەندێک کەس و ناوچەدا، وەڵامى بۆ ناڕەزایى و خۆپیشاندان، "چاوسورکردنەوە" و گرتن زیندانى کردنى ڕۆژنامەنوسان و چالاکانە، لەگەڵ داخستن و سانسۆرى دەزگاکانى ڕاگەیاندن.