وته‌بێژی ته‌ندروستیی سلێمانی داوایه‌كی به‌په‌له‌ ئاراسته‌ی هاوڵاتیان ده‌كات


وێستگه‌ نیوزـ

دوای تۆماركردنی ژماره‌یه‌كی زۆری توشبوو به‌ ڤایرۆسی كۆرۆنا له‌ سنوری پارێزگای سلێمانی، وته‌بێژی ته‌ندروستیی سلێمانی داوای پابه‌ندبوون به‌ رێنماییه‌ ته‌ندروستییه‌كان ده‌كات و ده‌ڵێت "با پارێزگای سلێمانی باجی كۆرۆنا نه‌دات".

یاد نه‌قشبه‌ندی، وته‌بێژی ته‌ندروستیی سلێمانی له‌ هه‌ژماری خۆی له‌ تۆڕی كۆمه‌ڵایه‌تیی فه‌یسبوك داوایه‌كی ئاراسته‌ی هاوڵاتیانی سلێمانی كرد و ده‌ڵێت:"هاوڵاتیانی خۆشەویست ئێستاش درەنگ نیە، داواتان لێ ئەکەم خود( تاک)پارێزی جێبەجێ بکەن با پارێزگای سلێمانی باجی کۆرۆنا نەدات."

ئه‌وه‌ش له‌كاتێكدایه‌ كه‌ ئه‌مشه‌و وه‌زاره‌تی ته‌ندروستیی هه‌رێم زۆرترین ژمارەی توشبوانی کۆرۆنا رایگه‌یاند و ئاشكرایكرد كه‌ لە بەردەوامی پشکنینەکان و گەڕان بەدوای گومانلێکراوان و توشووان، 101 توشبوی دیکەی ڤایرۆسی کۆرۆنای نوێ COVID-19 لە پارێزگای سلێمانی دەستنیشانکران.

وه‌زاره‌تی ته‌ندروستی ئاشكرایكرد كه‌ توشبوه‌كان  پیاو و ئافرەت و کچ و کوڕی گەنجن بە ھەموو تەمەنەکانەوە، شەش توشبوو بەرکەوتوی توشبوانی پێشوون و دوو توشبوو پێشینەی گەشتیان ھەیە و 93 توشبوش نیشانەی نەخۆشیەکەیان ھەبووە و پشکنینیان بۆکراوە و پۆزەتیڤ دەرچووە.

سه‌باره‌ت به‌ شوێنی نیشته‌جێبونی توشبوه‌كانیش، وه‌زاره‌تی ته‌ندروستیی هه‌رێمی كوردستان رایگه‌یاندوه‌ كه‌ به‌مجۆره‌یه‌:

51 دانیشتوی قەزای پێنجوین
42 دانیشتوی ناو شاری سلێمانی
3 دانیشتوی وارماوە
1 دانیشتوی قەزای کەلار
1 دانێشتوی قەزای کفری
1 دانیشتوی قەزای خانەقین
1 دانیشتوی پارێزگای ھەڵەبجە
1 دنیشتوی شاری به‌غدا

بەپێی دوایین ئامار تائێستا 710 کەس لە هەرێمی كوردستاندا توشی ڤایرۆسی کۆرۆنا بوون، لەو ژمارەیەش 420 کەسیان چاکبونەتەوە و هه‌ر ئه‌مڕۆش توشبویه‌ك له‌ سلێمانی گیانی له‌ده‌ستدا و له‌گه‌ڵ گیانله‌ده‌ستدانی توشبویه‌كی دوێنێش ژماره‌ی مردوان به‌و ڤایرۆسه‌ بۆ 7 كه‌س زیادی كرد.


PM:11:18:31/05/2020


ئه‌م بابه‌ته 7812 جار خوێنراوه‌ته‌وه‌‌



لێرەوە کۆمێنت بنوسە لە فەیسبوک دەردەکەوێت