پارێزگاری سلێمانی په‌یامێك ئاراسته‌ی موسڵمانان و باوه‌ڕداران ده‌كات

‌

ئه‌مڕۆ هه‌ینی 10ی نیسانی 2020، د.هه‌ڤاڵ ئه‌بوبه‌كر، پارێزگاری سلێمانی په‌یامێكی ئاراسته‌ی زاناو داناو مامۆستاو كەسایەتییە باوەڕدارە ئاینییەكانی ئاینی پیرۆزی ئیسلام و هەموو ئایین‌و ئایینزاو باوەڕو مەزهەب‌و مەدرەسەو تەریقەتەكان و بەناوی پارێزگای سلێمانییەوە ڕۆژی هەینی (موسڵمانان و باوەڕداران)ی لێ پیرۆز كردن.

له‌ په‌یامه‌كه‌یدا پارێزگاری سلێمانی ده‌ڵێت "لەبەرامبەر پشتیوانیی‌و بەشداریی كارایانەتان لە بەرەنگاربوونەوەی پەتای كۆرۆنادا، سوپاس‌و ستایش‌و پێزانینی خەڵك‌و خۆمانتان پێشكەش دەكەین، پابەندیی ‌و خۆڕاگریی ‌و خۆپارێزیی ئێوەی پێشەوایانی مزگەوت ‌و مینبەر و میحراب‌ و كڵێساو پەرستگاكان، وتار و ئامۆژگاریی ‌و ڕێنمایی‌ و ڕێبەرییەكانتان بۆ هاونیشتمانانی كوردستان‌ و ئاگاداركردنەوەی خەڵك لە مەترسییەكانی ئەم پەتایە، ڕۆڵێكی دیارو شایستەی بینی لەو ئەنجامە سەركەوتووانەی كە بە پشتیوانیی خودای مەزن‌و پابەندیی هاوڵاتیان و بەشداریی كارایانەی ئێوەی بەڕێزو ئیرادە و كار و هیممەتی دامودەزگا نیشتمانیی‌و دەوڵەتییەكان بەدەست هاتوون."

له‌ به‌شێكی دیكه‌ی په‌یامه‌كه‌یدا، د.هه‌ڤاڵ ئه‌بوبه‌كر داوای لە هەموو دەزگاو كەناڵەكانی ڕاگەیاندن‌ و تۆڕە كۆمەڵایەتییەكان كردوه‌ كە ئەوانیش وەك بەشێكی كاریگەری دامەزراوە نیشتمانییەكان ڕۆڵی شایەنانەی خۆیانیان بینیوە، دەرفەت‌ و كات ‌و بەرنامەی پێویست بۆ زانا ئایینییەكانمان بڕەخسێنن بۆئەوەی هەموو بەیەكەوە بتوانن كاروانی تەندروستیی بە سەركەوتن بگەیەنین.

له‌ كۆتایی په‌یامه‌كه‌شیدا ده‌ڵێت "سوپاس كە لە هەموو بەرنامە و هەوڵ ‌و هەنگاوێكدا لەگەڵماندابون، سوپاس كە لە بانگی مینبەری مزگەوت‌و زەنگی كڵێساو ناوەندە ئایینییەكانی ترەوە بەشداربوون لە ئاگاداركردنەوەی خەڵك بۆ پابەندبوون بە ڕاگرتنی هاتووچۆو تێكەڵاونەبوون‌ و خۆپارێزیی و تاكپارێزیی."