لێدوانی فەرمیی ئێران سەبارەت بە هێرش بۆ سەر سەلمان روشدی
وێستگەنیوز-
ئێران لە یەکەم لێدوانی فەرمیی سەبارەت بە هێرشکردنە سەر سەلمان روشدی، نووسەر و رۆماننووسی بەریتانیی بە رەگەز هیندی، لۆمەی روشدی و لایەنگرانی کرد.
ناسر کەنعانی، وتەبێژ بەناوی وەزارەتی دەرەوەی ئێران، لە لێدوانێکی رۆژنامەوانیدا ئەمڕۆ رایگەیاند: "سەبارەت بە هێرشکردنە سەر سەلمان روشدی، جگە لە روشدی و لایەنگرانی، کەسیتر شک نابەین تا لۆمەی بکەین".
هەروەها وتیشی: "جگە لەوەی لە راگەیاندنەکانی ئەمریکادا هاتووە، هیچ شتێکیترمان سەبارەت بەو کەسە نەبینیوە، کە ئەو کارەی کردووە".
سەبارەت بە پەیوەندی ئێران بەو رووداوەوە، رایگەیاند: "بەتەواویی رەتی دەکەینەوە ئێران هیچ پەیوەندییەکی بە هێرشبەرەکەوە هەبێت".
جێگای بیرهێنانەوەیە دەسەڵاتدارانی ئەمریکی رایانگەیاند، ئەو کەسەیان دەستگیرکردووە، کە 12ی ئەم مانگە هێرشی کردە سەر روشدی. ئەو کەسە ناوی هادی مەتەرە و 24 ساڵە و خەڵکی ویلایەتی نیوجێرسییە.
لە ساڵی 1988ەوە، دوای بڵاوکردنەوەی رۆمانی (ئایاتە شەیتانییەکان)، هەڕەشەی کووشتن لە سەلمان روشدی کرا و لە زۆر وڵاتیش کتێبەکە قەدەغەکرا و ناڕەزایەتی لە دژی ئەو کتێبە بەڕێوەچوو. هەر لەو ساڵەشدا ئیمام خومەینی فەتوای کوشتنی بۆ دەرکرد.
AM:11:44:15/08/2022
ئه‌م بابه‌ته 1956
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت