سەڵاح رەشید: ئێستا یه‌كێتی نه سه‌ركردایه‌تی هه‌یه نه‌مه‌كته‌بی سیاسی یه‌ك كه‌س ده‌یبات به‌ڕێوه كه بافڵ تاڵەبانییە
سەڵاح رەشید
وێستگه نیوز ـ
هه‌ڵسووڕاوێکی پێشووی بزووتنەوەی گۆڕان رایده‌گه‌یه‌نێت، یەکێتی ئێستا یەک کەس دەیبات بەڕێوه، ئەویش بافڵ تاڵەبانییە، نەسەرکردایەتی هەیە نە مەکتەبی سیاسی، ده‌شڵێت: "ناو بەناو ئەوانە دادەنیشن لەگەڵیدا لە نێوان دوو کەوانە پێیان دەڵێن جەمەعەتی ئەشهەدوما بیلا".
سەڵاح رەشید، هه‌ڵسووڕاوی پێشووی گۆڕان و به‌رپرسی پێشووتری یه‌كێتی نیشتمانی كوردستان بۆ ده‌نگی ئه‌مریكا، چه‌ند پرسێكی تایبه‌ت به دۆخی عیراق و هه‌رێمی كوردستان ده‌خاته‌ڕوو.
سەڵاح رەشید پێی وایە بەو بودجەو داهاتانەی هەرێم خستوییەتە روو، داهاتی هه‌رێم زیاترە لە بودجەی وڵاتێکی وەک ئەردەن، دەشڵێت، "نەوەی کورد لەو هەرێمە دەبێت چەندین ساڵی تر قەرزی حکومەتی هەرێم بدەنەوە، چۆن و بۆچی قەرزارە، قەرزاری کێیە؟ نەوت بەکێ دەفرۆشن؟ چەندین گریمانەو ناروونی هەن کە دۆخی ئابوری هەرێمەکەی بەو چەشنە گەیاندووە، وای لێهاتووە دەبێت بەردەوام چاوەروانی ئەو 200 ملیارەی بەغدا دەکەن بینێرێت، یاخود نەینێریت".
ده‌شڵێت: "بینیمان لە چەند رۆژی رابردوو، ئەو هەموو شەڕە جنێوەی نێوان ئەندام پەرلەمانی پارتی و یەکێتی لەسەر داهاتی دەروازە سنوورییەکان، کە کەس نازانێت داهاتەکانیان چەندەو بۆ کوێ دەروات".
سەڵاح رەشید، هۆکاری ئەو تەنگەژە ئابووریانەو راکێشانی پەنجەی تاوان بۆ یەکتری لەناو پەرلەمان و لە میدیاکاندا، زادەی نەبوونی شەفافیەتە، لەو بارەیەوە دەڵێت: "لە دنیادا نییە پەرلەمان ئاگای لە بودجەی حکومەتەکەی نەبێت، ئەوە تەنها لە کوردستان روویداوە، لە هەموو دنیادا، پەرلەمان بودجە پەسەند دەکات، نەوەک ئاگادار نەبێت".
لە دوای پەسەند کردنی دوا ئەنجامی هەڵبژاردنەکانی پەرلەمانی عیراق، گەڕی دروست کردنی کابینەی نوێ دەست پێدەکات، کوردیش لەو پرۆسەیە چاوەروانی ئەو پۆستانە دەکات کە لە حکومەتی ئایندەی عیراقدا بەریان دەکەوێت، لەو بارەیەوە سەڵاح رەشید دەڵێت: "لایەنە کوردییەکان ناچارن کە لە بەغدا پێکەوە کار بکەن، بەڵام بەو هەموو گرژ و ئاڵۆزی و ململانێیەی هەیانە، زەحمەتە بتوانن کاری هاوبەش بکەن، ئەو برادەرانەش کە لە رابردوو وەزیر بوبن یان بەرپرسیار لە بەغدا نەیان توانیوە سودێکی باش بە هەرێمی کوردستان بگەیەنن، تەنانەت کە مادەی 140ی دەستوور کە بۆ کورد دانراو کێشەی ناوچە دابڕاوەکان دەگرێتەوە، بەدەست کوردەوەبووە، هیچ بەرەو پێش چونێکی بەخۆوە نەدیوە، بەڵکو پاشەکشێی کردووە، بە ڕوای من رۆڵی کوردیش ئەو گرنگییەی جارانی نەماوە، ئەوەش هۆکارێکی زۆری لە پشتە".
سه‌ڵاح ره‌شید له باره‌ی یه‌كێتیه‌وه وتی: "یەکێتی ئێستا یەک کەس دەیبات بەڕێوه، ئەویش بافڵ تاڵەبانییە، دەنا نەسەرکردایەتی هەیە نە مەکتەبی سیاسی، ناو بەناو ئەوانە دادەنیشن لەگەڵیدا لە نێوان دوو کەوانە پێیان دەڵێن جەمەعەتی ئەشهەدوما بیلا، نەڕۆڵیان هەیە نە کەسیشیان دەوێرن لە قسەی بافڵ دەربچن".
دەڵێت: "یەکێتی ئێستا وەک گەڕەکەکانی مەڵکەندی و سەرشەقامی لێ هاتووە، ئەوەندە گۆڕاوە هەر نایان ناسیتەوە، هیچ کەسێک حەز بەوە ناکات ئەو شوێنەی کاری تیا کردووە بڕوخێت، بڕوام وایە کە بەدیلی یەکێتی لە گۆرەپانەکەدا نییە، هەرچەندە، چەند یەکێتی لاوازبێت لە سودی پارتی دیموکراتە کە خەڵکی ئەم ناوچەیە ئەوەیان پێ خۆش نییە، لە لایەکی ترەوە یەکێتی جاران و یەکێتی ئێستا ئەرزو ئاسمانی فەرقە، هەرکێرڤی دەنگەکانیشی هاتوه‌تە خوارەوە لە هەولێردا، جاران دەنگی زیاتری نەهێنایە لە چاو لایەنی دی، هەر بە یەکێتی دانەدەنرا، کەچی لەم هەڵبژاردنە بەهەزارحاڵ کورسییەک یان دوو کورسی هێناوە".
لەدرێژەی گفتوگۆکەدا باس لەوەش دەکات کە هۆکاری شکستی حزبەکانە بەگشتی کە خەڵک بەو رێژە زۆرە بەشداری هەڵبژاردنیان نەکردووە، یاخود دەنگەکانیان سوتاندووە، ئەو رێژەیە لە سەدا 60 یان 70 لە دنیادا دەگمەنە، لەو بارەیەوە دەڵێت، "ئەو حیزبە سیاسیانە یەکێتی و پارتی و ئەوانی دیکەش، پارتی و یەکێتی بە تایبەتی، بوون بە کۆمپانیای بازرگانی، حزبی سیاسی دەست وەرناداتە شتی رۆژانەی کۆمەڵگا، ئەو ئامانجی هەیە دەنگدەر رازی بکات کە دەنگی پێ بدەن، تا دەسەڵات لەو وڵاتە بگرێتە دەست، ئەمانە ئەوەی کە نایکەن، کاری حزبایەتییە و خەمی وڵاتە، بیر لەوە دەکەنەوە رۆژانە لەو سەرسنورانە چەند پارەیان دەست دەکەوێت، ئێستا حزبەکان بوونەتە ناوەندی بازرگانی گەورە، سەدەها کۆمپانیای ئاشکراو نهێنی بازرگانیان هەیە، دەستیان خستوه‌تە بازاڕو بینەقاقای بازرگانی کورد، بافڵ تاڵەبانی بەدەنگی خۆی بڵاو بووەتەوە لە کۆبونەوەکەی لەگەڵ خوێندکارە خۆپیشاندەرەکاندا کە دەڵێت (خەڵک رقی لە مەکتەب سیاسییەکانی ئێمەیە، کە لە تەلەفزیۆن نیشان دەدرێن خەڵک کەناڵەکە دەگۆڕێت) سەرۆکی حزبەکە وادەڵێت، ئەی ئێمەی هاوڵاتی ئاسایی بڵێین چی؟ پێویستە سیستمی حزبایەتی بگۆڕن نەوەک دەموچاوەکان".
AM:08:46:04/12/2021
ئه‌م بابه‌ته 5464
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت