لە ئەمەریکا رێکاری نوێ دژ بە کۆچبەران دەگیرێتەبەر

وێستگەنیوز-

ئەمەریکا دوای رووداوی تەقەکردنەکەی رۆژی چوارشەممەی ڕابردوو کە ئەندامانی پاسەوانی نیشتمانی لە نزیک کۆشکی سپی کردە ئامانج کۆمەڵێک رێکاریی نوێی دژ بە کۆچبەران گرتەبەر.

جۆزێف ئێدلۆ، بەڕێوەبەری فەرمانگەی رەگەزنامە و کۆچبەری ئەمەریکا لە تۆڕی کۆمەڵایەتیی ئێکس رایگەیاندووە، "فەرمانگەکە هەموو بڕیارەکانی پەیوەست بە پەنابەرانی راگرت، تا ئەو کاتەی دڵنیا دەبنەوە کە هەموو بیانییەک لەژێر لێکۆڵینەوە و وردترین پشکنیندان".

بەڕێوەبەری فەرمانگەی رەگەزنامە و کۆچبەری ئەمەریکا جەختی لەوەشکردەوە، "هەمیشە سەلامەتی گەلی ئەمەریکا لە پێشینەی کارەکانمانە".

هەروەها مارکۆ رۆبیۆ، وەزیری دەرەوەی ئەمەریکا رایگەیاند، "وەزارەتی دەرەوەی ئەمەریکا بڕیاری راگرتنی پێدانی ڤیزای داوە بۆ هەموو ئەو کەسانەی کە بە پاسپۆرتی ئەفغانستان گەشت دەکەن".

ئاماژەی بەوەشکرد، "ئەمەریکا هیچ کارێکی لە پێشینەتری نییە لە پاراستنی نەتەوەکەمان و گەلەکەمان".

رۆژی چوارشەممەی رابردوو، تۆمەتبارێک لە نزیک کۆشکی سپی تەقەی لە ئەندامانی پاسەوانی نیشتمانی کرد و دوو پاسەوانی بریندار کرد، دواتر بریندارەکان گواستراونەوە بۆ نەخۆشخانە و تەقەکەرەکەش دەستگیرکرا.

AM:10:05:29/11/2025

ئه‌م بابه‌ته 236 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت