مارک ساڤایا: دوورخستنەوەی چەک لە سیاسەت تاکە رێگەی بنیاتنانی عێراقێکی بەهێزە

وێستگەنیوز-

نێردەی ئەمریکا بۆ عێراق رایدەگەیەنێت، دوورخستنەوەی چەک لە سیاسەت تاکە رێگەی بنیاتنانی عێراقێکی بەهێزە، ئاماژە بەوەشدەکات، عێراق دەتوانێت رۆڵێکی گەورەتر لە ناوچەکە ببینێت، "بە مەرجێک پرسی چەکی دەرەوەی دەسەڵاتی دەوڵەت بە تەواوی چارەسەر بکرێت.

ئەمڕۆ شەممە 29ی تشرینی دووەمی 2025، مارک ساڤایا، نێردەی تایبەتی ئەمریکا بۆ عێراق لە ئێکس نووسیویەتی، "ئەمڕۆ جیهان عێراق وەک وڵاتێک دەبینێت کە توانای هەیە رۆڵێکی گەورەتر و کاریگەرتر لە ناوچەکەدا بگێڕێت، بە مەرجێک پرسی چەکی دەرەوەی دەسەڵاتی دەوڵەت بە تەواوی چارەسەر بکرێت و شکۆی دامەزراوە فەرمییەکان بپارێزرێت".

مارک ساڤایا دەڵێت، "هیچ ئابوورییەک گەشە ناکات و هیچ هاوبەشییەکی نێودەوڵەتی سەرکەوتوو نابێت لە ژینگەیەکدا کە سیاسەت تێکەڵ بە هێزی نافەرمی بووبێت. ئێستا عێراق دەرفەتێکی مێژوویی لەبەردەمدایە بۆ داخستنی ئەم پەڕەیە و چەسپاندنی وێنەکەی وەک دەوڵەتێک کە لەسەر بنەمای سەروەریی یاسا بونیاد نراوە، نەک هێزی چەک".

دەشڵێت، "بە هەمان ئەندازە، چەسپاندنی پرەنسیپی جیاکردنەوەی دەسەڵاتەکان، ڕێزگرتن لە چوارچێوە دەستوورییەکان، و رێگریکردن لە هەر دەستێوەردانێک کە بڕیاری سیاسی بشێوێنێت یان سەربەخۆیی دەوڵەت لاواز بکات، گرنگە، نەتەوە بەهێزەکان کاتێک بونیاد دەنرێن کە دەسەڵاتەکانی جێبەجێکردن، یاسادانان و دادوەری لە چوارچێوەی سنوورە دیاریکراوەکانی خۆیاندا کار بکەن و لە رێگەی میکانیزمە یاساییە روونەکانەوە لێپرسینەوەیان لەگەڵ بکرێت، نەک لە ڕێگەی فشارەوە".

ئاماژە بەوەدەکات، "عێراق لەبەردەم دووڕیانێکی هەستیاردایە، دەتوانێت بەرەو دامەزراوەی سەربەخۆ هەنگاو بنێت کە توانای جێبەجێکردنی یاسا و راکێشانی وەبەرهێنانیان هەیە، یان دەکرێت بگەڕێتەوە بۆ ناو بازنەی ئاڵۆزییەکان کە بارێکی گرانی خستووەتە سەر شانی هەمووان".

ئەوەشی خستەڕوو، "ئەوەی ئەمڕۆ پێویستە بریتییە لە پشتیوانیکردن لە رێڕەوی وڵات، رێزگرتن لە دەستوور، بەهێزکردنی جیاکردنەوەی دەسەڵاتەکان، و پابەندبوونێکی تووند کە کرداری بەرچاوی لەگەڵدا بێت بۆ دوورخستنەوەی چەک لە سیاسەت، ئەمە تاکە رێگەیە بۆ بونیادنانی عێراقێکی بەهێز کە رێزی جیهان بەدەست دەهێنێت".

PM:09:22:29/11/2025

ئه‌م بابه‌ته 212 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت