هاوپه‌یمانی 19: لێكۆڵینه‌وه‌ی جدی له‌سه‌ر كوژرانی كه‌سێكی سڤیل له به‌رده‌م كۆمپانیای لاناز بكرێت
وێستگه‌نیوز -
تۆڕی هاوپه‌یمانی 19 رایده‌گه‌یه‌نێت هه‌موو رواڵه‌تێكی توندوتیژی ئیدانه ده‌كات، داواش له‌ده‌زگا ئه‌منییه‌كانی پارێزگای هه‌ولێر ده‌كات لێكۆڵینه‌وه‌ی جدی له‌سه‌ر كوژرانی كه‌سێكی سڤیل له به‌رده‌م كۆمپانیای لاناز بكات و مافی هاوڵاتیان له رێكخستنی خۆپیشاندان و گردبونه‌وه بپارێزێت و رێگر نه‌بن له روماڵی رۆژنامه‌نووسان.
له راگه‌یه‌ندراوێكدا تۆڕی هاوپه‌یمانی 19دا هاتووه كه "دوا نیوه‌ڕۆی ئه‌مڕۆ رێكه‌وتی 29ی تشرینی دووه‌می 2025، له‌كاتی خۆپیشاندانی به‌شێك له هاوڵاتیانی گوندی لاجانی سه‌ر به پارێزگای هه‌ولێر، له‌به‌رده‌م كۆمپانیایه‌ك كه داوای دامه‌زراندنیان ده‌كرد، شه‌ڕو ئاڵۆزی رووده‌دات و له‌ئه‌نجامدا كه‌سێك ده‌كوژرێت و چه‌ند كه‌سێكیتر بریندار ده‌بێت".
ئاماژه‌شی به‌وه‌داوه كه "هه‌روه‌ها رێگری له‌به‌شێك له ده‌زگاكانی راگه‌یاندن ده‌كرێت روماڵی روداوه‌كه بكه‌ن و كه‌ل و په‌لی رۆژنامه‌وانیش ده‌شكێندرێت. شه‌یما ئه‌حمه‌د په‌یامنێری كه‌ناڵ 8 به تۆِری 19 ی راگه‌یاند، له‌كاتی روماڵی راسته‌وخۆدا بووم له‌سه‌ر روداوه‌كه له‌لایه‌ن چه‌ند كه‌سێك به به‌رگی سه‌ربازییه‌وه، هێرشكرایه سه‌رمان و په‌خشه‌كه‌یان وه‌ستاندین، هه‌روه‌ها به‌شێك له كه‌لوپه‌لی رۆژنامه‌وانییه‌كه‌یشمانیان شكاند".
تۆڕی هاوپه‌یمانی 19 ئیدانه‌ی كوژرانی خه‌ڵكی سڤیل ده‌كات و داوا له‌ده‌زگا ئه‌منییه‌كانی پارێزگای هه‌ولێر ده‌كات لێكۆڵینه‌وه‌ی جدی له‌سه‌ر كوژران و برینداربوون بكات.
راشیگه‌یاندووه كه "ده‌بێت مافی هاوڵاتیان له ئه‌نجامدانی خۆپیشاندان و گردبونه‌وه پارێزراو بێت و رۆژنامه‌نوسانیش ئازادانه بتوانن روماڵی روداوه‌كان بكه‌ن".
PM:03:49:29/11/2025
ئه‌م بابه‌ته 228
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت