1-  بەگشتی شێرپەنجەی پرۆستات نەخۆشییەكە لەسەرخۆ گەشەدەكات و زۆرینەی پیاوانی توشبو بەئاستی پلە نزمی نەخۆشییە ساڵانێك بێدەركەوتنی نیشانەكانی ژیان بەسەردەبەن، واتە بێ ئەوەی نەخۆشییەكە تەشەنەبكات و مەترسی بۆ سەر ژیانیان دروستبكات، بەڵام لە پلە ئاست بەرزەكانەوە بەخێرایی تەشەنە دەكات و كەسەكە دەكوژێت.

2- رژێنی پرۆستات بەشێكی كۆئەندامی زۆربونە لەپیاوان و ئەو شلە دەردەدات كە ئاوی پیاو دروستدەكات و پێویستی بەهۆڕمۆنی تێستیستیرۆنی پیاوەتییە بۆ گەشەكردن و كامڵبوونی، قەبارەی ئەو رژێنە بەقەد یەك دانە گوێزەو لەگەڵ بەتەمەنداچووندا گەورەتر دەبێت و رەنگە بەزەحمەت میزكردن دروستبكات، بەڵام ئەوە مانای توشبون بە شێرپەنجە نییە.

3- لە قۆناغەكانی سەرەتاییدا رەنگە نەخۆشییەكە هیچ نیشانەیەكی روونی نەبێت، بەڵام بە پێشكەوتنی نەخۆشییەكە چەند نیشانەیەكی سەرەتایی دیار دەكەوێت وەك، هەستكردنی لەناكاو و دوبارەبووەوە بۆ پێویستی میزكردن و بوونی ئازار لەكاتی میزكردن، هەروەها بوونی پەڵەی خوێن لەمیز یان تۆواودا، جیا لەبوونی ئازار لەخوارووی پشت و لەسەر سمت و ناوقەد، بەڵام لەگەڵ ئەوەیش دەركەوتنی ئەو نیشانانە مانای دوپاتبونەوەی توشبون بە شێرپەنجەی پرۆستات ناگەیەنن، بۆیە پێویستە سەردانی پزیشكی شارەزا بكرێت.