هەڵوێست (700 دینار)ی بڵاوكردەوە
وێستگە ستایل-
وێستگە نیوز- پشتیوان جەمال
هونەرمەند هەڵوێست نوێترین ئەلبومی بەناوی (700 دینار) بڵاوكردەوە و بەشداری فیلمێكی سینەماییش دەكات.
ئێوارەی 12ی ئابی 2018، هونەرمەند هەڵوێست لە مەراسیمێكی فراواندا لە كافێی (moka-more) بەئامادەبوونی ژمارەیەك لە هونەرمەند و هەوادارانی دەنگی ئەو هونەرمەندە، نوێترین ئەلبومی خۆی بڵاوكردەوە.
هەڵوێست لە لێدوانێكدا بۆ وێستگە نیوز رایگەیاند، هۆكاری ناونانی ئەلبومەكەی بۆ (700 دینار) ئەوەیە ساڵی 2011، خوشكەكەی 700 دیناری پێداوە و ئەویش چووە كارێكی هونەری پێكردووە، ئاماژەی بەوەشكرد بەرهەمەكەی 9 گۆرانی نوێ و سێ گۆرانیشی پێشتر وتراوە.
هەر لە مەراسیمەكەدا پەردە لەسەر پەیكەرێكی هەڵوێست لادرا كە لەلایەن هونەرمەند چێنەر نزار دروستكرابوو، لەو بارەیەوە هەڵوێست روونیكردەوە، لە منداڵییەوە هاوڕێی چێنەرە بۆیە بیرۆكەكە لەلایەن چێنەر بووە و ئەویش پێی باشبووە.
ئەم هونەرمەندە لە داهاتوویەكی نزیكدا ئەزموونێكی نوێ لە ژیانی هونەریی تاقی دەكاتەوە ئەویش بەشداریكردنە لە فیلمێكی سینەمایی لە نووسینی رۆژنامەنووس عەبدولغەفار عەبدوڵا و دەرهێنانی هونەرمەند شوان عەتوف.
لەو بارەیەوە هەڵوێست وتی "ئەمەش ئەزمونێكی نوێیە و هیوادارین بتوانین تێیدا سەركەوتوو بین و هەوڵ دەدەین تا كۆتایی ئەمساڵ تەواوی بكەین".
هەڵوێست لە رۆژانی رابردوودا نوێترین كلیپی بەنێوی (شێت) بڵاوكردەوە و بۆ جەژنی قوربانیش كلیپی (عەشق) بڵاودەكاتەوە.
AM:08:37:13/08/2018
ئه‌م بابه‌ته 3225
جار خوێنراوه‌ته‌وه