‌بەوێنە...دەرون گێژەن لەسەر كچە چوار ساڵە كوژراوەكە قسەی هەیە

وێستگە ستایل-

لێكۆڵینەوە پزیشكیەكانی دادی كەركوك دوێنێ چوار شەممە 22 ی 11 ی 2017 ئەوەیان ڕاگەیاند كچێكی تەمەن چوار ساڵ لە سنوری ناحیەی ڕێدار ( شوان) بەهۆی ئەشكەنجەدانی لە لایەن باوكیەوە گیانی لە دەست داوە.

دوای بڵاوبوونەوەی هەواڵی كوشتنی ئەم منداڵە ئەم بابەتە بووە جێگەی باسی بەكارهێنەرانی تۆڕە كۆمەڵایەتیەكان و هەموان كاری باوكی ئەم منداڵەیان بە نەشیاو و دڕندانە وەسف كردوە.

دەرون گێژەن لەڕێی هەژمارە تایبەتەكەی لە تۆڕی كۆمەڵایەتی ئینستگرام لەسەر وێنەی ئەم منداڵە كوژراوە خەم و بێزاری خۆی دەربڕیوە و دەڵێت"بەر لەوەی بەبێ دەنگی ئەم تاوانەش بنێژن، توخوا بۆیەو نینۆکی پەنجە گەورەکەیمان بۆ جێھێڵن، سەیرکەن ئەوە رەنگی خەیاڵی شینی خۆیەتی بە پەنجەیەوەو نایەوێت بمرێت" 


ئەمە دوای ئەوە دێت لە لێكۆڵینه‌وه‌ی پزیشكی دادی كه‌ركوك، ده‌ركه‌وتووه‌ مه‌هنازی ته‌مه‌ن چوار ساڵان، ئه‌شكه‌نجه‌یه‌كی زۆر دراوه‌ و نه‌یتوانیوه‌ به‌رگه‌ی ئه‌و لێدانه‌ توندانه‌ بگرێت بۆیه‌ گیانی له‌ ده‌ستداوه‌.

ئه‌و كه‌سانه‌ی له‌ نزیكه‌وه‌ ئاگاداری كێشه‌كه‌ن ده‌ڵێن شه‌وی دووشه‌ممه‌ی رابردوو دایك و باوكی مه‌هناز شه‌ڕ و ناكۆكیان هه‌بووه‌ و دایكی ویستوویه‌تی له‌گه‌ڵ كچه‌كه‌یدا ماڵه‌وه‌ به‌جێ بهێڵن، به‌ڵام شه‌وی دواتر دایكی هه‌ڵاتووه‌ و مه‌هنازی به‌جێهێشتووه‌.

دوای ئه‌وه‌ی باوكی ده‌زانێ كه‌ دایكی هه‌ڵاتووه‌، ده‌ست ده‌كات به‌ ئه‌شكه‌نجه‌دانی كچه‌ ته‌مه‌ن چوار ساڵانه‌كه‌ی.

باوكی مه‌هناز دوو ژنی هه‌یه‌، زڕدایكی مه‌هناز لای پۆلیس وتوویه‌تی: ئه‌و كچه‌ به‌هۆی نه‌خۆشییه‌وه‌ گیانی له‌ ده‌ست داوه‌"، به‌ڵام دواتر كه‌ راستی رووداوه‌كه‌ ده‌ركه‌وتووه‌، ئه‌و ژنه‌ ده‌ستگیركراوه‌.

شایه‌تحاڵێك كه‌ له‌ نزیكه‌وه‌ ئاگاداری ژیانی مه‌هناز بووه‌، ده‌ڵێت: "زڕدایكی هه‌میشه‌ باوكی مه‌هنازی هانداوه‌ تا له‌ كچه‌كه‌ی بدات و دایكیشی نه‌یتوانیوه‌ به‌رگریی له‌ كچه‌كه‌ی بكات".

له لێكۆڵینه‌وه‌كانی پۆلیسدا ده‌ركه‌وتوه‌ باوكی مه‌هناز بۆ خۆی كورده‌، به‌ڵام ئه‌و دوو ژنه‌ی كه‌ بوونه‌ته‌ هاوسه‌ری هه‌ردووكی عه‌ره‌بن و ئێستا له‌ ماڵێكدا پێكه‌وه‌ ده‌ژین.

هێزه‌كانی پۆلیس بۆ ده‌ستگیركردنی باوكی مه‌هناز چوونه‌ته‌ گوندی دووبزنی له‌ سنووری ناحیه‌ی شوان له‌ پارێزگای كه‌ركوك، به‌ڵام باوكی مه‌هناز هه‌ڵاتووه‌ و تائێستا ده‌ستگیر نه‌كراوه‌.


AM:08:59:23/11/2017


ئه‌م بابه‌ته 54760 جار خوێنراوه‌ته‌وه‌‌

ستایل