زیانەکانی خۆشتن دوای وەرزش کردن

وێستگە ستایل - سۆلین عوسمان

زۆرێک لە وەرزشەوانان دوای تەواوبوونی مەشقە قورسەکان، ڕاستەوخۆ پەنا دەبەنە بەر

گەرماو بۆ ئەوەی لە ئارەقە و ماندوێتی ڕزگاریان بێت، بەڵام ئەم کارە ئەگەر بەبێ

ڕەچاوکردنی کات و پلەی گەرمی بێت، ڕەنگە مەترسی بۆ سەر تەندروستی دڵ و ماسولکەکان

دروست بکات.

کاتێک وەرزش دەکەیت، پلەی گەرمی ناوەوەی جەستەت بەرز دەبێتەوە و لێدانی دڵت خێرا

دەبێت و دەمارەکانی خوێنت فراوان دەبن، چوونە ژێر ئاوی زۆر سارد یان زۆر گەرم بە

شێوەیەکی کتوپڕ، شۆکێکی گەورە بە کۆئەندامی دەمار و سوڕی خوێن دەگەیەنێت.

یەکێک لە زیانە سەرەکییەکان ئەوەیە کە گۆڕانکاری کتوپڕ لە پلەی گەرمیدا دەبێتە هۆی

گرژبوونی دەمارەکانی خوێن، ئەمەش دەبێتە هۆی بەرزبوونەوەی کتوپڕی پەستانی خوێن و

ڕەنگە لە هەندێک حاڵەتدا ببێتە هۆی تێکچوونی هاوسەنگی و سەرگێژخووردن یان تەنانەت

جەڵتەی دڵ بۆ ئەو کەسانەی کێشەی دڵیان هەیە.

لە لایەکی ترەوە، ماسولکەکان دوای وەرزش پێویستیان بە کات هەیە بۆ ئەوەی لەو

گەرمییە زیادەیەی هەیانە ڕزگاریان بێت، خۆشتن بە ئاوی گەرم ڕێگری دەکات لە

پرۆسەی چاکبوونەوەی ماسولکەکان (Recovery) و ڕەنگە ببێتە هۆی هەوکردنی زیاتری

شانەکان.

باشترین ڕێگە ئەوەیە کە وەرزشەوان ٢٠ بۆ ٣٠ خولەک چاوەڕێ بکات تا پلەی گەرمی جەستەی

دەگەڕێتەوە ئاستی ئاسایی و ئارەقەکردنەکەی دەوەستێت، پاشان بە ئاوێکی شلەتێن دەست

بە خۆشتن بکات بۆ ئەوەی جەستە بە هێواشی لەگەڵ ژینگەکە بگونجێت.

بە کورتی، پەلەکردن لە خۆشتن دوای وەرزش نەک تەنها سوودی نییە، بەڵکو ماندوێتییەکە

زیاتر دەکات و ئەگەری تووشبوون بە سەرمابوون و نەخۆشییەکانی دڵ زیاد دەکات، بۆیە

هەمیشە کاتی پێویست بە جەستەت بدە بۆ ساردبوونەوە.

سەرچاوە: ماڵپەڕی پزیشکی "Medical News Today".

PM:11:42:09/06/2026

ئه‌م بابه‌ته 36 جار خوێنراوه‌ته‌وه‌‌