مێژووی دروست بوونی ڕێد بوڵ

وێستگە ستایل - سۆلین عوسمان

خواردنەوەی "ڕێد بوڵ" کە ئێستا باوترین خواردنەوەی وزەبەخشە لە جیهاندا، مێژووەکەی

بۆ چیرۆکێکی سەرنجڕاکێشی نێوان تایلەند و نەمسا دەگەڕێتەوە، کە چۆن تێکەڵەیەکی

سادە گۆڕا بۆ ئیمپراتۆریەتێکی ملیار دۆلاری.

هەموو شتێک لە ساڵی ١٩٧٦ دەستی پێکرد، کاتێک بازرگانێکی تایلەندی بە ناوی "شالیۆ

یوڤیدیا" خواردنەوەیەکی بە ناوی "کراتینگ داینگ" (Krating Daeng) دروست کرد، کە

بە واتای "گای سوور" دێت، ئەم خواردنەوەیە لە ناو شۆفێری بارهەڵگرەکان و کرێکارانی

تایلەنددا زۆر باو بوو بۆ ئەوەی خەویان نەبێتەوە.

لە ساڵی ١٩٨٢دا، بازرگانێکی نەمساوی بە ناوی "دیتریچ ماتێشیتز" سەردانی تایلەندی

کرد و بە ڕێکەوت خواردنەوەکەی تاقی کردەوە، هەستی کرد کە ماندوێتی گەشتەکەی (Jet

lag) نەماوە، لێرەوە بیرۆکەی ئەوەی بۆ هات کە ئەم بەرهەمە بباتە بازاڕەکانی ئەوروپا

و جیهانەوە.

ماتێشیتز و یوڤیدیا ڕێککەوتن و کۆمپانیای ڕێد بوڵیان لە ساڵی ١٩٨٤ دامەزراند، بەڵام

سێ ساڵیان پێچوو تا پێکهاتەکەیان کەمێک گۆڕی و گازیان تێکرد و تامیان بۆ گونجاند

لەگەڵ مەزاجی ڕۆژئاواییەکان، دواجار لە ساڵی ١٩٨٧ یەکەم قتووی ڕێد بوڵ لە نەمسا

فرۆشرا.

ئەوەی ڕێد بوڵی کردە براندێکی جیهانی، شێوازی بازاڕکردنە ناوازەکەی بوو، ئەوان

تەنها وەک خواردنەوەیەک خۆیان نەناساند، بەڵکو سپۆنسەری وەرزشە مەترسیدارەکان

و پێشبڕکێکانی فۆرمولا وەنیان کرد، ئەمەش وایکرد ناوی ڕێد بوڵ ببێتە هاواتای وزە و

سەرکێشی.

ئەمڕۆ ڕێد بوڵ ساڵانە ملیارەها قتوو دەفرۆشێت و لە زیاتر لە ١٧٠ وڵاتدا بوونی هەیە،

چیرۆکەکەی وانەیەکە لەوەی چۆن بیرۆکەیەکی لۆکاڵی دەکرێت بەهۆی داهێنان لە

بازاڕکردندا ببێتە دیاردەیەکی جیهانی کە هەمووان پێی سەرسام بن.

سەرچاوە: ماڵپەڕی فەرمی کۆمپانیای "Red Bull" و گۆڤاری "Forbes".

PM:11:44:09/06/2026

ئه‌م بابه‌ته 48 جار خوێنراوه‌ته‌وه‌‌