‌کۆسەرەکە بۆ وەزیر!
PM:12:41:08/08/2018
ئاوات عەلی


لەدوای بڵاوبونەوەی گرتە ڤیدیۆیی بڕینەوەی شیشک بە کۆسەرە لەنێو هۆڵی نەشتەرگەری نەخۆشخانەی فریاکەوتنی ڕۆژهەڵات لە هەولێر، کاردانەوەی لێکەوتەوەو لەسەر داوای وەزیری تەندروستی و بەڕێوەبەری گشتی تەندروستی هەولێر کۆمەڵێک کارمەند سزادران لەسەر ئەوەی تایبەتمەندی نەخۆشیان نەپاراستووەو ڤیدیۆکەیان لە تۆڕە کۆمەڵایەتییەکان بڵاوکردووەتەوە. 

لێرەدا بابەتی کۆسەرەکە بۆ وەزیری تەندروستی و بەڕێوەبەری گشتی تەندروستی هەولێر جێدەهڵین و قسەی لەسەر ناکەین! بەڵام ئەوەی پێویستە زۆر قسەی لەسەر بکرێت لە کۆسەرەکە و تایبەتمەندی نەخۆش گەورەترە و مەترسیدارترە!

بەپێی نوسراوەکانی بەڕێوەبەرایەتی تەندروستی هەولێر ئەو شوێنە ڤیدیۆکەی تیادا تۆمارکراوە هۆڵی نەشتەرگەرییە، هەر لە گرتە ڤیدیۆیەکەشدا دەردەکەوێت کە ژمارەیەک مۆبایل لەنێو ئەو هۆڵەدایە، هەروەها یەکێک لەچکی خۆی بەسەریەوەیەتی و یەکێک شەش تاک بازنی گەورەی لە دەستدایە و یەکێک کاتژمێری لەدەستدایە. لەکاتێکدا وەزیری و بەڕێوەبەری گشتیش دەزانن کە نابێت ئەو شتانە لەنێو هۆڵی نەشتەرگەری دا بونیان هەبێت... چونکە بونی ئەو شتانە وەک (مۆبایل و بازن و کاتژمێر و لەچک و ....) کە بەشێک نین لە هۆڵی نەشتەرگەری و (تعقیم) خاوێننەکراونەتەوە، دەبێتە هۆی توشبونی نەخۆش بە ڤایرۆس و بەکتریا، چونکە جەستەی ئەو نەخۆشە کراوەتەوەو بەئاسانی توش دەبێت!

هۆڵی نەشتەرگەری ستانداری خۆی هەیە بۆ پاکوخاوێنی و پۆشاک و دەستکێش و کڵاو و تەنانەت پلەی گەرمییەکەشی دیاریکراوە، کە دەبێت وەزیری تەندروستی و بەڕێوەبەری گشتی تەندروستی هەولێر لەئێمە باشتر بیزانن!

کەس قسەی لەسەر ئەو مەترسییە نەکرد کە ئەمە نمونەی هۆڵەکانی نەشتەرگەریی یە لە هەرێمی کوردستان، جێبەجێکردنی ستانداردەکانی پاک و خاوێنی بەم جۆرەیە لەم هۆڵانەدا! بێ ئەوەی کەسیشی لەسەر سزا بدرێت و هیچ ئاماژەشی پێبدرێت لە نوسراوی سزاکاندا!

هەر باشە ئەم نەخۆشەشیان نەناردووە بۆ حەی سەناعەی هەولێر و بڵێن ئیشی ئێمە نییە و بڕۆ با لەوێ بۆت ببڕنەوە، چونکە پێشتر منداڵیکیان نارد بۆ ئەوێ بۆ ئەوەی واشەرێک لە پەنجەیدا ببڕنەوە!


ئه‌م بابه‌ته 1236 جار خوێنراوه‌ته‌وه‌‌
هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی



Copyright 2018. westganews.net. All Rights Reserved.