سەردانی پاپا بۆ سەرزەمینی ئیبراهیم خەلیل
ئاریان فەرەج
سەردانی پاپا بۆ عێراق و هەرێمی كوردستان،
یەكەمین سەردانی یەكەم پاپای فاتیكانە بۆ ئەم ووڵاتە، بۆیە بە سەردانێكی مێژویی
دێتە ژماردن و جگە لە رەهەندە ئایینییەكەی، رەهەندی سیاسی و پەیامگەلێكی دیكەش
لەخۆ دەگرێ.
عێراق
تەنها ووڵاتی شەڕوشۆر و كوشتوبڕوقەیران نییە. میزۆپۆتامیای مێژوویی، نیشتمان و
زایینگەی نەبی ئیبراهیم خەلیلە، بابی پەیامبەرانی یەكتاپەرستی و پیرۆز لەلای هەرسێ
ئایینی ئیبراهیمی(ئیسلام و كریستیان و جوو)، هەربۆیەش هەڵبژاردنی وەك رووگەیەك بۆ
گەیاندنی پەیامی ئاشتەوایی نێوان ئایینەكان، هەلبژاردنێكی دروستە.
ئەم
سەرزەمینە بە درێژایی مێژوو، ژینگەی پێكەوەیی ئایینەكان و بەرجەستەكاری ئەو
راستییە بووە كە پەیڕەوانی ئایینە جیاجیاكان دەتوانن پێكەوە هەلبكەن، كوردستان لەو
نێوەندەدا بەڵگەیەكی بەرچاوە كە ئەو پێكەوەژیانە ئیدامەی پێدەدەرێ و دەچەسپێ و ئەو
نەرێت و كەلەپورە دەكرێ قەت نەشێوێ.
شاڵاوی
ستەم و راونان و كۆچپێكردن و كوشتوبڕی چەند سالی رابردوو، كە نەك تەنها كریستیان،
بەڵكو زۆربەی پەیڕەوانی ئایین و ئایینزاكانی عێراقی گرتەوە، دەستدرێژی بوو بۆ سەر
ئەو تەجسیمە میژووییە جوانەی كە نەك تەنها بۆ عێراق، بەڵكو بۆ هەموو مرۆڤایەتی میراتێكی
شارستانیی پڕبەهایە و نابێ لەنێوبچێ، ناشبێ ئەو ووڵاتەی كە لانكی ئەو بەها
شارستانییە مەزنەیە، دەستی لێبشۆردرێ و لە نێو قەیراندا بۆ چارەنووسی رەش
بەجیبهێڵرێ.
پاپا،
بەربەدوو ساڵ، لەگەل شێخی ئەزهەری شەریف، وەك مەرجەعی موسڵمانانی سوننە مەزهەب،
پەیماننامەی( برایەتیی مرۆڤایەتی) ئیمزا كرد، دیداری پاپا و سەید عەلی سیستانی و
زیادكردنی ئیمزای گەورە مەرجەعی موسڵمانانی شیعە بۆ سەر پەیماننامەكە، كریستیان و
ئیسلام بەهەردوو مەزهەبەكەیەوە لە ئەركی پیرۆزی لێكنزیككردنەوەی ئایینەكان و
رێگریی لە توندرۆیی و ململانیی ئایینیدا، دەكاتە شەریك.
سەردانی
كوردستان لە لایەن مەرجەعی كریستانییانی جیهان وهەڵبژاردنی هەولێر بۆ رێوڕەسمی
گەورەی سەردانەكە.
جگە لە متمانەپێبوون، نیشاندانی پێزانینی جیهانی
مەسیحی و كۆمەڵگەی نێودەوڵەتییە بە گشتی بۆ رۆڵ و هەڵوێستە سیاسی و ئینسانی و
كولتورییەكانی گەلی كوردستان لە روداوە تاڵەكانی ساڵانی رابردوودا: رێزنانە لە رۆڵی پێشەنگانەی گەلی كوردستان لە تێكشكاندنی داعشدا كە
بەرلەوەی هەڕەشە بێت بۆ سەر پێكەوەژیان و بۆ سەر ئایین و ئایینزا و میللەتانی دیكە
و خەڵكی بەلەنگاز و بێ دیفاع، هەڕەشە بوو بۆ سەر خودی ئیسلام و بۆ ناوبانگی ئیسلام
كە ئایینی زۆرینەی خەڵكی كوردستانە.
رێزلێنان
وهاندان و پشتگیرییە لەو فرە رەنگی و پێكەوەژیانە ئایینی و ئایینزایی و نەتەوەییەی
لە كوردستاندا بەرقەرارە، رێزنانە لەو نەرێتەی كە لە هیچ دەور و زەمانێكدا گەلی
كوردستانی زۆرینە موسڵمان دەستی لێبەرنەداوە وهەر ئەوەش رێبازی دروستی ئایینی
پیرۆزولێبوردەی ئیسلامە.
پێزانینی
ئەو باوەشكردنەوە وداڵدەدان و بەهاناوەچوونەیە كە گەلی كوردستان لە رۆژە سەختەكانی
كوشتوبر و تۆڵەكاریی مەزهەبی و لە شاڵاوی رەشی داعشدا بۆ كۆی ئەوانەی دابین كرد كە
بەرهەڕەشە كەوتن و ماڵ و حاڵیان لێشێوا.
ئامادەیی
سەرۆكایەتی هەرێمی كوردستان و دامەزراوە باڵاكانی هەرێم و پیاوانی ئایینی هەموو
ئایینەكان و نوێنەرانی پێكهاتەكانی كوردستان بۆ پیشوازیی گەرم و شایستە لە سەردانە
چاوەڕوانكراوەكەی پاپای فاتیكان، تەئكید كردنەوەیەی پابەندیی خەڵكی كوردستانە بە
كولتوری پێكەوەژیان و لێبوردەیی ئاینیەوە، گوزارشتە لە تێگەیشتنی میانڕە و
سەردەمیانەی موسڵمانانی كوردستان لە ئایینەكەیان، دووپاتكردنەوەی پەیامی
ئاشتیخوازیی گەلی كوردستان و نیشاندانەوەی رووی شارستانییانەی ئەم هەرێمەیە بە
جیهان.
ئاریان فرەج
AM:11:03:04/03/2021
ئه‌م بابه‌ته 2368
جار خوێنراوه‌ته‌وه
هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی