دەست كێشانەوە لەهاووڵاتیبون

‌خاليد سلێمان


نامەكەی پارێزگاری سلێمانی كاك سەردار قادر-م خوێندەوە، دوای ئەوە سەرنجەكانی ئەندامی ئەنجومەنی پارێزگا كاك ڕێكەوت زەكی-شم خوێندەوە. هۆكارەكانی دەست كێشانەوەی پارێزگار لە كارەكانی، هیچ لێكدانەوەیەكی تر هەڵناگرن : نەبونی دەسەڵات و خەرجی بۆ پارێزگایەكی وەك سلێمانی، تاریكای ئەوپەڕی تونێلەكە دەردەخات.

ئەندامی ئەنجومەنی پارێزگا كاك ڕێكەوت لەسەرنجەكانیدا دەربارەی هۆكارەكانی دەست كێشانەوەكە ئەنوسێت : (نەبونی دەسەڵاتی پێویستی كارگێڕی و داراییە، بچوكی و پشتیوانی و كەمی كۆمەكە لەبەرامبەر تەحەدای قەیرانە زۆرەكاندا، گرفتی ئـاوی دوكان، پەروەردە، كارەبا، ڕێگاوبان، سەوزایی، تەجاوزات، تەندروستی، قەرزی بەڵێندەران، پۆلێك قەیرانی قەبەن).

دەستكێشانەوەی كاك سەردار قادر لە پۆستەكەی، ئەو بڕیارەیە كە ئەبوایە حكومەتی هەرێمی كوردستان بیدایەو هۆكاری زۆر بەهێزتر لەهۆكارەكانی پارێزگای سلێمانی هەبون. كوێربونی بونی هاووڵاتیان بەهۆی دەرزی و دەرمانی خراپەوە، دەست بڕینی مناڵێك بەهۆی سیستمێكی تەندروستی بێسەروبەر، پەككەوتنی خوێندنی ٢٠١٦-٢٠١٧ بۆ چەند مانگێك، بڕینی موچەی فەرمانبەران، نەبونی خزمەتگوزاری پێویست، داتەپینی ژێرخانی ئابوریی وڵات، توندوتیژی سیاسی بەهۆی بیروباوەڕی جیاوازەوە...و هەزارو یەك هۆكاری تر.

ئەمانە ئەگەر لەهەر وڵاتێكدا، تیایدا نزمترین ئیلتیزام بە پرانسیپەكانی حوكمڕانییەوە هەبێت، ڕوبدەن و هەبن، نەك تەنها حكومەتێك بەڵكو سیستمكی سیاسی دەگۆڕن. دیارە هێشتا لەكوردستاندا، حوكمڕانیی بەشێك نییە لەبەرپرسیارێتی و تەنها پڕكردنەوەی بۆشاییەكی یاساییە، ئەگینا چی ئەخلاقێكی سیاسی، ئەو هەموو نەهامەتی و ڕسواكردن و خراپەكارییەی پێ قبوڵە كە بەرامبەر هاهووڵاتیان پیادە دەكرێن؟

دور لەو لێكدانەوە سەرپێیانەی لەسەر دەست كێشانەوەكە دەكرێن، دەكرێ وەك پاشەكشێیەكی بەرچاوی سلێمانی تەماشا بكرێت. نەك تەنها وەك پارێزگایەك، بەڵكو وەك سەنتەری ڕوبەرێكی فراوانی جوگرافیای كۆمەڵایەتی و كولتوری، سیاسیش بە تەبیعەتی حاڵ كە گەرمیان و شارەزور و شارباژێر و بتوێن و زۆر شوێنی تر دەگرێتەوە. ئەو خاڵانەش كە كاك ڕێككەوت زەكی دەسنیشانی كردون بەسن بۆ ئەوەی ئەم جوگرافیا كۆمەڵا-كولتورییە توشی قەیرانێكی لەوە قورستر بێت كە تیایدا ئەژیت.

بێباكی دەسەڵاتی هەرێمی كوردستان، كە بوەتە قەڵایەكی خاوەن بەرژەوەندییەكان و هەوڵی پاراستنی لە توڕەبونی خەڵك دەدرێت، زیاتر و زیاتر بەم حاڵەی ڕازیەو باكی بە داتەپینی سەنتەرێكی گەورەی وەك سلێمانی نیە. وەك ئاستێكی بەرزی توڕەبون و ناڕەزایی، ئایا دەكرێ هاووڵاتیان دەست لە هاووڵاتیبونی خۆیان بكێشنەوە؟


PM:04:59:03/05/2017

ئه‌م بابه‌ته 3639 جار خوێنراوه‌ته‌وه‌‌



هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی