‌بەغدادی چی و بەكوێ دەگات
PM:03:30:26/12/2020
عوسمان گوڵپی


بە ئۆتۆمبێلێك چووینە كەلار و لەوێشەوە بۆ بەغداد،(لێرەدا باسی فراوانی ئەو خاكە ناكەم كە بەهۆی هەڵەی ئەم سیاسیانەوە هەرێم لەدەستیداوە، ئەوە بابەتێكیترە) بە هەرحاڵ لە سنوری هەرێم دەردەچیت و ڕوو بە بەغداد ڕێگا دەبڕیت، من بۆ خۆم هەستێكی غەریبم هەبوو، چونكە یەكەم جار بوو بچمە ئەو ناوچانە و هیچ كاتیش بەغدام نەدیبوو.

لەگەڵ ئەوەی كە هەستێكی سەیرت لا دروست دەبێت، بەبێ ئەوەی بیرت لای سیاسەت و دوو حكومەتی و جیاوازیەكانیتربێت، شتێك لە ناخەوە پێت دەڵێ تۆ لە خاك و وڵاتی خۆتدا نیت، هەست ناكەی وڵاتی تۆیە، پاڵنەرێكی سەیرە هەست بەدۆستایەتی ناكەیت. 

بە نێو چەندین شارۆچكەی بچوكدا تێدەپەڕیت كە یەكپارچە بێ خزمەتگوزاری سەرەتایین، هیچ سیمایەكی ئاوەدانیان پێوە دیار نیە، هەست دەكەی بە ئاوەدانیەكانی وڵاتێكی فەقیردا ڕێ دەكەیت، لەولاشەوە با ئەو هەموو بازگە وئاڵایە بوەستێ، سور و ڕەش و زەرد و سەوز و سپی، كەمێك ورد تەماشا بكەی هەست دەكەی لە عێراق هێزە لاوازەكە دەوڵەتە، گروپە چەكدارەكان، بەپێی هەر ناوچەیەك حاكمی یەكەمن.

بەر لەوەی بگەینە بەغداد لە بەر خۆمەوە دەموت عێراقێك بەو دەوڵەمەندیەوە كەچی شارۆچكەكانی وێرانەن، ئاخر ناكرێت عەقڵێك حوكمڕانی بكات تەنها پایتەختی لا گرنگ بێت(پێش گەشتن بە بەغداد)، بەڵام كە چووینە نێو بەغداد ئەوەی من وێنەكەیم لە خەیاڵما كێشا بوو پێچەوانە بوویەوە، هەستم دەكرد كتێبەكانی قۆناغی سەرەتاییشم ڕاستیان لەگەڵ نەكردووم، كوا ئەو بەغدادە جوانەی وێنەكانیمان دەبینی لە نێو كتێبەكاندا؟ ئایا پایتەختی ولاتێكی دەوڵەمەند ئەبێ وابێ؟ 

پایتەختێكی پیس و نا خاوێن، شەقام و ترافیك و شۆستە و ڕووناكیەكانی نەك هی پایتەخت نین بۆ قەزایەكیش كافی نین، هەست دەكەین ئەم پایتەختە هی وڵاتێكە بە زەكات دروستكرابێت و بەسەدەقە بچێت بەڕێوە، تەنانەت لە ڕووی بیناو باڵەخانەكانیشەوە.

من زۆر ناوچەیم نەدی، بەڵام پرسیم هەر بەراست ئێرە بەغدادە؟ وتیان بەڵێ، بەڵام هەموی وا نیە، دو سێ گەرەكی خۆشترن لێرە، ئاخر ئەوەش عەیبەیەكی ترە كە پایتەختێكی گەورە و گرانی وەك بەغداد چەند گەڕەكێكی كەمی بۆ ژیانێكی شایستە بشێن، ڕەفیقكم بە پێكەنینەوە وتی ئەم پایتەختە سواڵی پێ دەشێ پارەی چی و نەوتی چی؟!

بەغداد ببینە تێدەگەیت ئەوانەی حكومڕانی عێراق دەكەن چ بەڵایەكی گەورەن، چ مافیایەكن بۆ قوتدانی سەروەتی وڵات، دەبینی چ عەقڵێك بەڕێوەی دەبات، عێراقێك یەكێك لە دەوڵەمەندترینەكانی دنیایە، كەچی سەروەتەكەی و ملیاران بەرمیلی نەوت نەیتوانیوە شەقامەكانی لە زبڵ و خاشاك پاك بكاتەوە، ئەو همو سەروەتە نەیتوانیوە تەنانەت پایتەختەكەی بكاتە شارێك كە ئاوات بخوازی تێیدا بژیت، لە ڕووی ئەمنیشەوە من شارەزای بواری ئەمنی نیم بەڵام بە ڕاگرە كۆنكرێتیەكانی ماڵی بەرپرسان و پاسەوان و توندوتۆڵی پرسگە و خۆپارێزیان، تێگەشتم كە ئەو پایتەختە ئەمنیەتەكەی بەشی ئەوە ناكات بەرپرسێك لە كۆڵانێكی ئاسایدا بتوانێ بژیێت وەك هاوڵاتیان.

ئەوەی عێراقی گەیاندە ئەمڕۆ، نزمی نرخی نەوت و وڵاتان و كێشە ئابوریە گەورەكان نین، بەڵكو هۆكاری سەرەكی نەبوونی دڵسۆزی وعەقڵی ئیدارەدانە، تاكە شتێك عێراق پێویستی بێت گۆڕانكاریە لە عەقڵی بەڕێوبردن و ئەوانەیە حكومڕانی دەكەن(حكومڕانی مەبەستم دەسەڵاتە نەك پۆست)وەزیرێك لە بەغداد بە ئەندازەی ئامر كەتیبەیەك دەسەڵاتی نیە. 

بەداخەوە ئێستای عێراق دەریدەخات كە زۆربەی ئەوانەی ئۆپۆزسیۆنی عێراق بوون بەرلە ڕووخانی دیكتاتۆریەت، نە عەقڵی حكومڕانیان هەبوە و نە نیەتێكی باش بۆ وڵات، ئەوان چاویان لە عێراق نەبوە بەڵكو چاویان لە سەروەتی عێراق بوە، بەتەنگ ئاوەدانی و دەوڵەتداریەوە نەبوون بەڵكو بەتەنگ گیرفان پڕكردنەوە بوون، ئەگەرچی خەڵكیان هەبوە دڵسۆزبوە بەڵام كەم بوە.

عێراق تا نەكەوێتە دەست نەوەیەكی عەرەبی عێراقی دڵسۆز كە پارەو سەروەتەكەی نەنێرنە دەرەوە، دۆخی لەمە باشتر نابێ، چونكە ئێستا بۆ ئەو باڵەخانە و تاوەر و هۆتێل و مۆتێلانەی كە بە پارەی عێراق دروست كراون دەبێت ئەردەن و ئیمارات و ئەستەنبوڵ و لەندەن و پاریس و ئەمریكاو تاران بگەڕێی، نەك بەغداد؟! سەروەتی عێراق لەسەر بانقی بەرپرسە دەستڕۆیشتوەكانیەتی لە وڵاتانی دەرەوە بۆ خۆیان و خێزانەكانیان، چونكە ئەوان دەزانن عێراق ناكەوێتەوە سەر سكە

من دەزانم عێراق زۆر داهاتی بۆ ئەمریكیەكان بوە و دۆشیویانە، دەشزانم ئێرانی لە كەوتن پاراستوە و ئەنقەرەش سودمەند بوە، بەڵام هێندە سەروەتەكەی زۆرە تەنها خاوەنێكی دڵسۆزی هەبوایە دەیتوانی زۆر باشتربێت لە ئێستا، لانیكەم دەیانتوانی شەقامەكان لە زبڵ خاوێن بكەنەوە.

بەداخەوە بۆ یەكەم جار چومە بەغدادێك كە هەموو ئەو وێنانەی پێچەوانە كردەوە كە بۆ بەغداد لە زیهنمدا كێشابونم، هەر بۆیە من پێموایە عێراق لە فەوزا و كەوتنەوە نزیكترە تاكو لە بەدامەزراوە بوون و دەوڵەتداریەوە، عێراق پێویستی بە نەشتەرگەریەكی موعجیزە ئاسایە تا بتوانێ لە كەوتنی تەواو ڕزگاری بكات، ئەوەش بۆ وڵاتێك چاوی زلهێزان و دراوسێكانی لەسەربێ زۆر زەحمەتە بەڵام مەحاڵ نیە، من دەزانم ئەمریكاو زلێهزان و دراوسێكان، ئاشتی خۆیان لە جەنگی وڵاتانیتردا دەبیننەوە، سەقامگیری ئابووری خۆیان لە تێكدانی سەقامگیری ئابووری بەرامبەردا دەدۆزنەوە، بۆیە عێراق پێویستی بە عێراقیەكی دڵسۆزە، كە ئێستا نیە گەر هەشبێ دەنگێكی لاوازە. 

نوقتە سەری دێڕ...



هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی



Copyright 2018. westganews.net. All Rights Reserved.