‌سەرۆکی هەرێم کۆمەڵگای نێودەوڵەتی دەکاتە دادوەر!
PM:02:55:17/11/2020
نووری بێخاڵی




هەرێمی کوردستان، کە لە سای بڕیاری ٦٨٨ی نەتەوە یەکگرتووەکاندا بووە دیفاکتۆیەکی سیاسی، وێڕای بەرژەوەندیی سیاسی و ئابووریی هاوپەیمانان لە ناوچەکە، بەشێکی زۆریشی پەیوەندیی بە ویست و ئیرادەی کوردستانیانەوە هەبوو بۆ بەرگری و مانەوە و پاراستنی دەسکەوتەکانی ڕاپەڕین.

هاوشێوەی ئەوە، دوای ڕووخاندنی بەعس، ئەو دەستوورەی کە بە چاودێری ئەمریکا و هاوپەیمانەکانی و نەتەوە یەکگرتووەکان، لەسەر بنەمای سییانەی (سازان، هاوبەشی و هاوسەنگی) عێراقی وەک دەوڵەتێکی فیدڕاڵی و کوردستانی وەک هەرێمێکی یاسایی و دەستووری چەسپاند، بەشێکی زۆری پەیوەندیی بە ویستی ئاشتیخوازانە و ئامادەیی دڵخوازانەی کوردەوە هەبوو، بۆ پێچانەوەی لاپەڕە ڕەشەکانی ڕابردوو و کردنەوەی ئاسۆیەکی نوێ لەبەردەم بەیەکەوەژیانی ئاشتی و دیموکراتیانەی نێوان پێکهاتەکانی عێراق. عێراقێک کە لە فۆڕمێکی دیکەی نوێدا دابڕێژرێتەوە. فۆڕمێک چیتر هەلی ستەمکاری و دیکتاتۆریەت بۆ هیچ هێز و پێکهاتەیەک نەڕەخسێت.

بۆیە هەر هەنگاوێک بۆ ئەوەی جارێکی دیکە کورد و هەرێمی کوردستان بگەڕێندرێتەوە پێش ساڵی نەوەد، هەوڵێکی مایەپووچە و لە خەونێکی نەزۆک زیاتر، هیچی دیکە نییە.

لەم گۆشەنیگایەوە، کاتێک سەرۆک نێچیرڤان بارزانی لە پرێس کۆنفڕانسەکەیدا نەتەوە یەکگرتووەکان دەکاتەوە دادوەر و ناوبژیوان، بۆ چارەسەرکردنی بنەبڕ و یاسایی و دەستوورییانەی کێشەکانی نێوان هەرێمی کوردستان و عێراق. دووبارە کۆمەڵگای نێودەوڵەتی دەخاتەوە بەردەم بەرپرسیارێتیی و خاوەندارێتیکردن لەو بەڵێنەیان، کە گوایە بڕیار بوو، عێراقی دوای بەعس، عێراقی ئاشتی و ئازادی و دیموکراسیەت بێت.

ڕاستییەکەی، تێپەڕاندنی ئەو یاسایە بە لۆژیکی هێزی (زۆرینەی پەرلەمانی!)، جگە لە مەترسییەکەی بۆسەر کورد، هاوکات هەڕەشەیشە بۆسەر ئاشتی، ئارامی، ئاسایش و سەقامگیریی عێراق خۆی. ئەمەش بە ڕۆڵی خۆی مەترسییە بۆسەر پڕۆژەی ئەمریکا و هاوپەیمانەکانی، کە بۆ ئاییندەی عێراق دایانڕشتووە. قورسایی ئەم هەڕەشە و مەترسیانەش، بە شێوەیەکی ناڕاستەوخۆ و لە میانی بەلاغەتی زمان و لەناو دێڕی قسەکانی سەرۆکی هەرێمدا، وەبیر عێراق و کۆمەڵگای نێودەوڵەتی هێنرایەوە.

بەهەرحاڵ، ئەگەرچی ئەم هەنگاوەی دەسەڵاتدارانی عێراق بۆ سزادانی کوردستانیان، کاریگەریی نەرێنی بەسەر دۆخی کۆمەڵگای کوردستانییەوە هەبوو، بەڵام بە دیوەکەی تردا وانە و پەندێکی گرنگی بیر هێناینەوە، بەوەی کۆدەنگی و یەکگرتوویی کورد، دەتوانێ هاوکێشەکان بە ئاقارێکی دیکەی تەندروستدا ببات.

بە واتایەکی تر، ئەگەرچی یاساکە بە عەقڵیەتێک تێپەڕێندرا، کە خەون بە بەکەڵەگاییکردنی عێراق و پەراوێزخستنی هەرێمی کوردستان دەبینێت و سڵ لە قۆستنەوەی هیچ دەرفەتێک ناکاتەوە بۆ سزادانی کوردستانیان و گەڕانەوە بۆ ناوەندێتی بڕیار، بەڵام ئەو یەکدەنگییەی نوێنەرانی کورد لە بەغدا و کاردانەوەی نیشتمانیانەیان لە بەرامبەر ئەم لۆژیکی سزادانەی کورددا، کە سەرۆکی هەرێمی کوردستان ڕاشکاوانە سوپاس و ستایشی کردن، موژدەبەخشە، بەتایبەتی ئەگەر بکرێتە سەرەتایەکی نوێ بۆ پتەوکردنەوەی ڕایەڵەکانی پەیوەندیی دروستی سیاسی لەناو هێزەکانی کوردستان و وازهێنان لە گوتاری تەخوین و بە شەیتانکردنی ئەوانی تری جیاواز لە دونیابینیی سیاسی.  

گەڕانەوە بۆ ئەم یەکدەنگی و یەک هەڵوێستییە کوردستانییە لە بەرامبەر عێراقدا، دەبێتە کارتێکی فشاریش بۆ ئەوەی ئێستێک بەو عەقڵیەتە پاوانخوازەی عێراق بکات، تا لەو ڕاستییە تێ بگات، کە گەڕاندنەوەی دەوڵەت بۆ سەردەمی تاریکیی و دیکتاتۆریەت، پاروێکی هەروا ئاسان نییە و لەبری ئەوەی ئاشتیی کۆمەڵایەتی و سەقامگیریی سیاسیی ئەو دەوڵەتە بخاتە مەترسی، پێویستە عەقڵیەت و فۆڕمی بیرکردنەوە و جۆری مامەڵەکردنی خۆی بگۆڕێت.

هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی



Copyright 2018. westganews.net. All Rights Reserved.