جەژن و خەمی من

‌عەتا سەراوی

لە ھەموو کۆمەڵگەو نەتەوەو ووڵاتێک چەند بۆنەیەک ھەن، کە کراون بە جەژن و رۆژی پشوی ھاونیشتیمانیان و ووڵات، لە کوردستانیش بۆنە ئاینی و نەتەوەەیی نیشتیمانیەکان دیارن و لە نێوانیاندا ھەردوو جەژنی رەمەزان و قوربان و ھتد.....، بەندە چەند جارێک بیروڕای خۆم دەربارەی جەژن باسکردوە. لێرەدا کە جەژنی قوربانە، مەبەستم بوو بێدەنگ نەبم و شتێک بۆ ئەم بۆنە ئاینییە و ئەو بارە قورسە ناھەموارییەی کە خەڵکیان تێخستوە بڵێم!!!!

٣١-٧-٢٠٢٠ کە یەکەم رۆژی جەژن و رۆژی ھەینی ئەکات رۆژی، مێژووی ئەم جەژنە بۆ شارەزایانی مێژووی و ئاینی جێ دێڵم، بەڵام ھەموان گرنگی و پیرۆزی ئەم جەژنە دەزانین. بۆیە من لێرەوە دەچمە ناو بابەتەکەم.

ئەم میللەتە دەیان ساڵە قوربانی ئەدات، تا بوو بە خاوەنی حکومەت و پەرلەمانی خۆی و ٢٩ ساڵ پێش ئێستا،وە بەداخەوە وێڕای شەری ناوخۆ و دوو ئیدارەیی و شەری تیرۆستانی ئەنسارو جوندو داعش و قەیرانی سیاسی و لێکەوتەکانی دوای ریفرادۆم و قەیرانی دارایی، ھەڵچون و داچونی پەیوەندییەکان و تێپەراندنی زۆربەی قەیرانە مەترسیدارەکان بە پشتیوانی کۆمەڵانی خەڵکی کوردستان و ھێزی پێشمەرگەو ھێزەکانی ناوخۆ و تا رادەیەک لێکنزیبونەوەی ھێزە سیاسییەکان وە لە دوا ھەڵبژادنی ٣٠-٩- ٢٠١٨ ، و لە پێکھێنانی کابینەی نوێ (پارتی، یەکێتی، گۆران)، وە ھەندێک لایەنی تر بەداخەوە دوای ساڵێک و دە مانگ لە دوای ھەڵبژاردن و پێکھێنانی حکومەتیش وە داھێنانێک کە لە ھیچ شوێنێکی دونیا وێنەی نییە برینی نیوەی موچە و دواتر برینی لە ٢١% ی مووچەو قووتی خەڵک.

بێ متمانەیەکی زۆری نێوان خەڵک و دەسەڵات وە دەست شکاندەنەوەو پاشقول گرتن و پلانی گڵاوی ھێزە سەرەکییەکەی پێکھێنەری حکومەت دژ بە یەکێتی و لایەنەکانی تر وە بێخەمی و بێ منەتی ئەم دەسەڵاتە گەندەڵ و دزو نا بەرپرسە لەو قەیرانە قوڵە سیاسی و ئابورییەی کە بەرۆکی ئەم ھەرێمەی گرتووە، لەلایەک لەشکری داگیرکەری تورک لە قوڵای ئەم نیشتیمانە ھاووڵاتیانی سڤیل شەھید دەکات و بە چاو ساغی و بێدەنگ بوونی لایەنێکی سیاسی بەشێک لەم نیشتیمانە داگیر ئەکات وە ساڵانەش لە پاشەکشەین لە بەرامبەر حکومەتی ناوەندی ئەوەی جێگەی سەرسورمان ھەڵوێستە کردنە لە رۆژانی پێشوو، پەرلەمانی کوردستان کۆبویەوە کە گوایە میوانداری سەرۆکایەتی حکومەت و وەزیران دەکات بۆ گوێلێگرتن و لێپرسینەوەیان کە بۆ دۆزینەوەی چارەسەرێک لە باری ئابوری ھەرەس پێھێنراو مووچەو قووتی خەڵک، کەچی ئەوەی جێگەی گاڵتەجاری و پێکەنینە عەوامێکی بە ناو پەرلەمانتارو ئەندامی حیزب و پاراستن بە بەرنامەو ئیعازی حیزب، جورئەتی ئەوەی کرد کەپەلاماری گەورە خەلیفەی موسوڵمانان عوسمانی کوری عەفان بدات و ئەو گێلە پیاوە بۆ بنەبرکردنی گەندەڵی و سەرھەڵدانی نادادپەروەری و گەندەڵی خەلیفەی موسوڵمانانی بە نمونە ھێنایەوە، کە جورئەتی ئەوەی نەبوو باسی سەرۆکی ھەرێمی پێشوو و سەرۆکی ھەرێمی ئێستاو سەرۆکی حکومەتی ئێستای حیزبەکەیی و وە ھەندێک لە بەرپرسانی پێشوو ئێستای بەشدار بووی حکومەتی پێشوو ئێستایی حیزبەکەی من و گۆرانیش بە ئیسلامییەکانیشەوە لە گەندەڵی و دزی و فەسادی ئەخلاقی کۆمەڵایەتی سیاسی دارایی و دزی و داھێنان ێکیان کردووە کە شەیتانیش پەی پێ نەئەبرد.

ئەو دان و داوەی کە پاراستن دایرشتبوو زۆر بە ئاسانی ھێزە بە ناو ئۆپۆزسیۆن و عەلمانی و ئیسلامییەکانی تێکەوت وەک ئەوەی کە خەلیفەی موسوڵمانان پێویستی بەمان بێت داکۆکی لێبکەن کەوتنە ھاتوھاوارو جێھێشتنی ھۆڵی پەرلەمان و بە داوایاندا مامۆستایانی ئاینی کە لە بنەرەتدا کادری حیزبین کەوتنە بەستنی کۆنگرەی رۆژنامەوانی وەک بەرزەکی بانان حکومەتیان لە برینی مووچەو قوتی خەڵک دەرباز کرد، ئەوانەی کە داکۆکیان کە لە کادرو ئەندامی حیزبەکەی خۆیان پێ ناکرێت کەوتنە داکۆکی کردن لە خەلیفەی موسوڵمانان.

لێرەوە روودەکەمە ھەر چوار سەرۆکایەتیەکەی ھەرێم و حکومەت و پەرلەمان و دادوەری، ئەرێ ئێوە بەشێکی زۆرتان بێ جیاوازی بونەتە مایەی شەرمەزاری و ئابروچون بۆ ئەم گەل و نیشتیمانە، کە پێکھاتوون لە کەسانی ئاست نزمی قێزەونی کۆمەڵایەتی و سیاسی و بە ناو پەرلەمانتارو بەرپرس و وەزیر کە جگە لە چەپڵە لێدەرە و کەسانی خاڵی لە ھەموو جۆرە زانست عەقڵ و عیلم و مەعریفەیەک ئەتانەوێت تاکەی ئاوا بەردەوام بن، بۆیە لێرەوە داوا لە سەرۆکایەتی و مەکتەبی سیاسی و ئەنجومەنی سەرکردایەتی حیزبەکەم ئەکەم کە چۆن لە کۆنگرەی چوار بەڵێنماندا کە یەکێتی و حکومەتەکەشمان بکەینەوە بە خزمەتکارو خزمەتگوزاری خەڵک و وەک ھەمیشە لە بەرەی گەل بین، نوێبونەوەو بنبرکردنی گەندەڵی و دادپەروەری و خزمەتکردنی کۆمەڵانی خەڵکی کوردستان ئەرکی بنەرەتیمان بێت، وە لە کۆبونەوەی ٢٧-٦ -٢٠٢٠ لە قەلاچۆلان، بریارماندا بە چەند خاڵێک کە لەگەڵ پارتی بگەینە دوا بریاری چاکسازی و سەرلەنۆێ رێکخستنەوەو بنیانەوەی شێوازی حوکمرانی لە سەر ئەساسی خاڵە پێشنییازکراوەکانی کۆبونەوەی سەرکردایەتی.

لێرەوە بە ھەموو ھەڤاڵ و ھاورێکانم ئەڵێم لە ئەنجومەنی سەرکردایەتی ئەگەر پابەند نەبین بەو بەڵێن و بریارانەی کە لە کۆنگرەی چوارو کۆبونەوەی ناوبراو داومانە دڵنیابن بەر نەفرەتی خەڵک و خوا ئەکەوین و ھەرگیزیش شایستەی ئەوە نابین کە جێگرەوەی رێبەرمان مام جەلال و مێژوووی پر سەروەری یەکێتی نیشتیمانی کوردستان بین، وە دەسە وەسانی و بێ چارەیی ھەرسێ سەرۆکایەتی ھەرێم لە دوا کۆبونەوەیان نیشانەی ئەوەن کە دەبێ ئێمە بریاری جدیمان ھەبێ بۆ گۆرانکاری، ئەم چوار سەرۆکایەتی ھەرێمە بە ھیچ جۆرێک ئەھلی ئەم ئەرکە قورسەی حوکمرانی و نیشتیمانیە نیین و دەبێ بریارێک بدەین کە وەک ھەمیشە(ی،ن،ک) لە بەرەی گەل بێت،ئەوان کەسانی شکستخواردوی حوکمرانین و من شەرم دەکەم ئەوانە فەرمانرەوام بن، وە جوانترین پیرۆزبایش بۆ ئەم جەژنە لە کۆمەڵانی خەڵکی کوردستان ھەڵوەشانەوەی حکومەت و پەرلەمان و ھەڵبژاردنی پێشوەختە.
عەتا سەراوی
ئەندامی ئەنجومەنی سەرکردایەتی یەکێتی
٣١-٧- ٢٠٢٠

PM:03:47:31/07/2020

ئه‌م بابه‌ته 1736 جار خوێنراوه‌ته‌وه‌‌

هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی