پەیام بۆ عەبدوڵای كوێخا موبارەك

‌هيمداد شاهين

هەموو كاتێ، ئێستا و كاتی خۆیشی (سەردەمی كاك نەوشیروان) كە گۆران پرۆژەیەكی جدی و كاریگەری هەبوبێت، تۆ لە دەرەوەی گۆران قسەت كردووە و بە فیتی دەسەڵات پڕۆژەكەت تێكداوە، راستییەكەی ئێستاشی پێوەبێ كەس نازانێت سەر بە كوێیت. 

ئەوكاتەی سەرۆكی جوڵانەوەی نەوەی نوێ (كاك شاسوار) بانگەوازی بۆ خۆپیشاندان دەكرد، هەرئەوكاتە تۆ خەڵكت سارد دەكردەوە. ئەوسا و ئێستاش كە پێویستە هەموو هێز و كەسایەتییە نارازییەكان دژی دەسەڵات یەكبگرن، بەڵام ئێوە بە فیتی دەسەڵات ناكۆكیی لەنێو خەڵكانی نارازییدا دروست دەكەن تا ئاغاكانی دەسەڵات قازانج بكەن. بێگومان هەردووكمان باش لە فیكەی یەكتر تێدەگەین و خەڵكیش عاقڵن و دەزانن كار بۆ كێ دەكەیت.

باسی ئەوەت كردووە گوایە كاك شاسوار دەیەوێت خەڵك فریو بدات، جاری تۆ پێمان بڵێ خۆت تا ئێستا لە شەش حیزبدا كارت كردووە، بەشێوەیەك حیزبی كوردیی نییە پارەت لێ وەرنەگرتبێت و سودمەند نەبوبیت و دواتر جیانەبوبێتیتەوە و نەكەوتبێتیتە قسەكردن. ئایا بەڕاستیی ئێمە خەڵكمان فریوداوە كە راستگۆبووین لەگەڵ خەڵك و لەشەقام، خۆمان و سەرۆكی جوڵانەوەكەمان بەشداریی خۆپیشاندانەكان دەكەین و لە ناو پەرلەمان پەرلەمانتارە ئازاكانمان شەر دەكەن، یان تۆ و حیزبەكانت كە پێشتر كارت بۆ كردوون، خەڵكیان فریوداوە؟ 

ئادەی قارەمان پێمان بڵێ یەك دونیا پرۆژە و پارە و بازرگانیت هەیە چیت كردوە بۆ خەڵك؟ ئێ لایەنی كەم ئەم كاك شاسوارەی تۆ بەردەوام قسەی پێدەڵێیت میدیایەكی داناوە بۆ پشتیوانیی لە خەڵك و ١٠ ساڵە دژی دەسەڵاتە و ئێستاش وەك نەوەی نوێ بەردەوام خۆی و هاوڕێ و پەرلەمانتارەكانی لەگەڵ شەقام و خەڵكدان.

لەكۆتاییدا یەك شت هەیە پێویستە بیخەمەروو، پێویستە تۆ و نموونەكانی وەك تۆ بزانن ئەو گەمەناشیریینەی ئێوە دەیكەن دەمێكە كەشف بووە و هەموو خەڵكیش ئەو راستییە دەیزانن. 

ئێوە چوار ساڵ لەگەڵ حیزبەكانی دەسەڵات و بەشدار لە حكومەتدا دەلەوەرێن و دواتر چەند مانگێك پێش هەڵبژاردن دێن و هێرش دەكەنە سەر ئەو هێزە ئازایەی كە ئەوكاتەی تۆ لە سێ ساڵی رابردوودا دەنگت نەبوو و خەڵكت سارد دەكردەوە، ئەو هێزە لە پەرلەمان و لە شەقام شەری ژیان و ئازادیی و قوتی خەڵكی دەكرد.
 

نەوەی نوێ هێزێكی خاوەن ئەخلاقە و تاكە هێزە پێش و پاش هەڵبژاردن هەمان هەڵوێست و خیتابی هەبووە و ملی نەداوە بۆ پارە و پۆست و پرۆژەی بازرگانیی، ئێستاش سوپاس بۆخودا رۆژ دوای رۆژ لە ناو خەڵكدا خۆشەویستتر دەبێت و لە هەڵبژاردنی داهاتووشدا دڵنیابە میللەتە ئازا و ئازیزەكەمان هەموو هەڵوێستەكانی رابردووی ئەم هێزەیان لەبەرچاوە و خەڵكانی هەلپەرست و ساختەچیی و ئەو سیاسییانەی كە چەندین ساڵە پێنج شەش حیزبیان گۆریوە و چەندین ساڵی دوای هەڵبژاردن بێدەنگ بوون، ئەو كەسانە و ئەو سیاسیانە نە دەنگ دەهێنن و نە جارێكی تر خەڵكیان پێ فریودەدرێ. 

سەردەمی ئێوە و ئەو سیاسییانە تەواو بووە كە هەر یەكێكتان تا ئێستا چەندین حیزبێكتان كردووە و چەندین جار سەنگەرتان گواستۆتەوە و ئێستا دەتانەوێت بچنە بەغداد. دەی زۆر روونە ئامانجتان پارە و موچەی پەرلەمانتاری بەغدادە، جا چ بۆ خودی خۆت یان بە نیاز بیت خەڵكانی تر بنێرن. 

ئێمە خەریكی كارێكی گەورەتریین، ئەویش گێڕانەوەی ئەخلاقە بۆ سیاسەت و راستگۆ بوونمانە لەگەڵ گەلەكەمان. تا دواهەناسەمان و بەردەوام لەبەرەی خەڵكدا دەبین، نەك لە ژێرەوە لەگەڵ بەرپرسانی یەكێتیی و پارتییدا هاونشین بین وەك جەنابتان، جا كاتی هەڵبژاردن خەڵك فریوبدەنەوە و دەنگی نارازیی كۆبكەنەوە و دواتر بیخەنە خزمەتی كەسانی بێحورمەت و هاوسەرۆكانی حیزبی دەسەڵات و جووت بنەماڵەی حوكمڕان.


PM:06:48:18/01/2021

ئه‌م بابه‌ته 1884 جار خوێنراوه‌ته‌وه‌‌



هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی