حكومەت وەك سەرچاوەی بێ متمانەیی

‌ عارف قوربانی‌

خۆپیشاندانە جەماوەرییە بەرفراوانەكەی هەفتەی رابردوو لە پارێزگاكانی سلێمانی و هەڵەبجە، قسەوباسی گەرمی ناو تۆڕە كۆمەڵایەتییەكان، دیبەیت و دیدارە تەلەفزیۆنی و میدیاییەكان، دەرخەری ئاستی ناڕەزایەتی چین و توێژەكانی كۆمەڵگەن كە تا ئەندازەیەكی زۆر نیگەران و نائومێدن لە دەسەڵاتی خۆماڵیی كوردی. لە كۆڕ و كۆبوونەوە، لە مەجلیسی لاكۆڵان و ناو پاس و لەسەر كار، لە فەرمانگە و خوێندنگە، لەناو خوێندكارانی زانكۆ و مامۆستایان، لە میوانداری و لە مزگەوت و پرسە و تەنانەت لەكاتی سەردانی نەخۆشیش، گوێبیستی وشە رووشێنەرەكانی خەڵك دەبیت بەرامبەر بە ئەزموونی حوكمڕانی و بەرپرسە گەورە و بچووكەكانی. 

ئەم میللەتە قوربانیبەخشە، خۆنەویست و فیداكارە، بۆ بەو ئەندازەیە تووڕەو نیگەرانە كە بەگژ باش و خراپی حوكمڕانی وڵاتەكەیدا بچێتەوە؟ ئەو مامۆستایانەی لە رۆژگارێكی پڕ لە نەهامەتی و نەبوونی، بە دروشمی "سەری بەرز نەوی ناكەین بۆ مووچە" بەگژ بڕیارێكی بەعسدا چوونەوە كاتێ‌ دەزگا ئیدارییەكانی لە هەرێمی كوردستان كشاندەوە و دەرگای قوتابخانەكانی داخست، مامۆستایان بە زەنگی كردنەوەی قوتابخانەكان پەیامی سەركەوتنی چیرۆكی سەركەوتنی كوردیان دا بەگوێی دونیادا. ئەمڕۆ هەمان ئەو مامۆستایانە خۆیان دەرگای قوتابخانەكان دادەخەن. ئەو فەرمانبەرانەی بۆ لەسەرپێ راوەستانی كورد وەك تەحەدایەك بێ‌ مووچە چوون دەرگای فەرمانگەكانیان كردەوە و یەكەم هەنگاوی خۆبەڕێوەبەرێتی كوردیان دەستپێكرد، ئەمڕۆ ناچنە سەر كارەكانیان. ئەو هاووڵاتیانەی بە حەماسەوە دەستیان گرتبوو بە كۆڵەگەكانی بنیاتنانی حكومەتی كوردییەوە، ئەمڕۆ نەفرەت لەو مێژووە دەكەن. 

چی لە مەسەلەكە گۆڕاوە، ئایا هەمان میللەت و هەمان شۆڕش نین وا بەشی زۆری هاووڵاتیانی ئەم هەرێمە خۆزگە بە نغرۆبوونی دەخوازن؟ ئایا كەس هەڵوەستە لە ئاستی ئەو لێدوان و تەنز و نوكتە و خۆزگە خۆكوژیانەی ئەم میللەتە دەكات كە رۆژانە دەبیستین سەردەمی دیكتاتۆریەتی سەدامیان پێ‌ باشترە لە حوكمی خۆبەڕێوەبەرێتی كوردی؟ دەسەڵاتێك میللەتێك جینۆساید بكات، ئەنفال و هەڵەبجە و كوشتوبڕی فەیلییەكان و بەكۆمەڵكوشتنی هەشت هەزار بارزانی دەست و دیاریی بووبێت بۆ كورد، ئێستا خەڵكانێك بگەنە ئەو قەناعەتەی كورد ئەوكاتی باشتر بوو لە ئێستا. ئەمە چ لێكدانەوە و پێناسەیەك هەڵدەگرێت بۆ حیزب و دەسەڵاتدارانی كوردستان؟

ئایا بەرپرسانی ئەم وڵاتە كاتێ‌ گوێیان لە هاواری دایكی شەهیدێك دەبێت، یان زیندانیكراوێكی سەردەمی بەعس، یاخود هاووڵاتییەكی هەڵەبجە، یان كاتێ‌ ژنە رەشپۆشێكی كەسوكاری ئەنفال لە تەلەفزیۆنەوە پێیان دەڵێت (سەت خۆزگەمان بەو رۆژانەی دەچەوسێنراینەوە و خۆزگە ئێمەش دەمردین و ئەم رۆژەمان نەدەدیت)، هەست بەچی دەكەن؟ كەسیان بیریان لەوە كردووەتەوە كە ئەمە نیشاندانی خراپترین پێناسەیە لە مێژووی میللەتی ئێمەدا بۆ سەركردەكانی شۆڕشەكەی كرابێت.

ئەگەر خراپیی دەسەڵاتدارێتی جولەكە لە ئیسرائیل بگاتە ئەو ئاستەی خەڵكانێك لە نەوەی قوربانیەكان هاوار بكەن خۆزگەمان بە سەردەمی هۆلۆكۆست، وڵاتێك وێران دەبێت، حكومەت و دامودەزگاكانی خۆیان هەڵدەوەشێننەوە، رەنگە سەدانیان بدرێنە دادگا لەبەر كوشتنی ئومێد، لەبەر بێهیواكردن. بەڵام لەبەر ئەوەی هێشتا ئێمە نەبووین بە میللەت، هێشتا لە دەرەوەی مێژووین، ئەو حاڵەتانە روودەدەن و كەسی تێدا شەرمەزار نابێت.

بەدەر لەوەی حیزبەكان بە رەفتارێكی كۆمەڵایەتی خراپ، بە پەروەردەیەكی خراپ، بە عەقڵیەتێكی حوكمڕانیی خراپ ئەم دۆخەیان بەرهەم هێنا، بەڵام هۆكاری ئاستی نیگەرانی و بێ‌ هیوابوونی هاووڵاتیان، حكومەتی هەرێمی كوردستانە. 

ناعەدالەتی و سەروەرنەبوونی یاسا و زوڵم و چەوساندنەوە و گەندەڵی كە سەرچاوەی زۆربەی كێشەكانن، حكومەت بەرهەمی هێناوە. سەرچاوەی تێكچوونی شیرازەی خێزان و پەیوەندیی كۆمەڵایەتی، نەهامەتی و برسیكردنی خەڵك، دەستبەرداربوونی دایك لە كۆرپەكەی، فرۆشتنی منداڵ لەلایەن باوكەوە، پەیوەندی بە نەمانی هیوا و ئومێدەوە هەیە، حكومەت بەرپرسە لە كوشتنی ئومێدی خەڵك، ئومێد و هیوا پەیوەستن بە متمانەوە، حكومەت خۆی سەرچاوەی دروستكردنی ئەو بێ‌ متمانەییە كە ئێستا رووبەڕووی بووەتەوە و رۆژ لە دوای رۆژیش زیاتر پەرە دەسێنێت. بەشێك لە هۆكارەكانیشی پەیوەندی بە قەیرانی داراییەوە هەیە، تا ئەو قەیرانە قووڵتر بێتەوە، كاریگەری لەسەر بێ متمانەیی زیاتر دەبێت. 

دەبێت چ شتێك لەوە مەترسیدارتر بێت كە میللەتێك هیچ متمانەیەكی بە دەسەڵاتدارانی نەمێنێت، باوەڕ بە قسە و گفت و بەڵێنەكانی نەكات، هەرچی حكومەت بیڵێت ئەم لێی بە گومان بێت، چ ئاسۆیەك لەبەردەم حكومەتێكی لەم شێوەیەدا ماوەتەوە بۆ درێژەدان بە تەمەنی خۆی. درێژەدان بەم دۆخەش درز و كەلێنی گەورەتر لەنێوان دەسەڵات و هاووڵاتیان دروست دەكات، شێواز و وێنای حوكمڕانی لە حكومەتی خەڵكەوە دەگۆڕێت بۆ دەسەڵاتێكی سەپێنراو. میللەتی ئێمە شانازی ئەوەی هەبوو لە یەكەم بناغەی خۆبەڕێوەبەرێتییەوە بە هەڵبژاردن حكومەتی پێكهێناوە، سەرباری كەم ئەزموونی و هەزمنەكردنی دیموكراسی و حوكمی یاسا لەلایەن عەقڵیەتی زاڵی شاخەوە، وێڕای كەموكورتی و نەهامەتیەكانی شەڕی براكوژی، بەڵام جێی ئومێد و چاوتێبڕینی جیهان بووین بەوەی نموونەیەكی جیاواز لە دەسەڵاتی گەل و نەتەوە سەردەستەكانی ناوچە بەرهەم بهێنین. 

ئەمڕۆ سەرباری پاشەكشێكردنمان لە دیموكراسی و شەرعیەتی یاسایی دامەزراوە دەوڵەتییەكان، كە وەك مەترسیەك لەسەر وێنای كورد دەركەوتوون، نەمانی متمانەی هاوووڵاتیانیش بە دەسەڵات هەڕەشەیەكی تری ترسناكە لەسەر ناشرینبوونی سیما و ناسنامەی كوردی، ئەوەش كاریگەری لەسەر ئایندەی ئێمە لە ناوچەكە جێدەهێڵێت. بۆیە دەبێت بە وردی بیر لەوە بكرێتەوە متمانە لەنێوان حكومەت و هاووڵاتیان دروست بكرێتەوە. لە دۆخێكی وەك ئێستاشدا باشترین رێگە بۆ دروستبوونەوەی متمانە هەڵوەشاندنەوەی كابینەی حكومەت و پێكهێنانی حكومەتێكی راگوزەرە لەسەر بنەمای بەدەستهێنانی متمانەی خەڵك، بۆ تێپەڕاندنی ئەم قۆناغە مەترسیدارە.


AM:08:50:04/10/2016

ئه‌م بابه‌ته 4844 جار خوێنراوه‌ته‌وه‌‌



هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی