هێرۆ ئیبراهیم ئەحمەد، خانمێکی خاکەڕا، تێکۆشەر

‌کوێستان محەمەد محێ الدین

پێچەوانەی سیساسییەکانی تری کوردستان زۆرکەم قسە دەکات، بەڵام کاتێ قسەدەکات  کاریگەر و یەکلاکەرەوەیە. هێرۆخان، لە هەشتاکان شانبەشانی پێشمەرگە لە شاخدا تێیدەکۆشا، دوای ڕاپەڕینیش بەردەوام بوو لە خەبات، بەڵام ئەمجارەیان لە بواری کلتووریی و فەرهەنگیی و ڕۆشنبیریدا، دەزگای خاک و کوردسات و چەندین پڕۆژەی فەرهەنگی تری خستە سەرشانی خۆی.

هیچ سیاسەتمەدارێکی کوردستان، ئەوەنەی هێرۆخان گرنگی بە بواری فەرهەنگیی و کلتووریی نەداوە...
دامەزراندنی ڕێکخراوی مناڵپارێزی کوردستان و  پشتگیرکردنی خانمان بۆ هاتنە ناوەوەی بواری سەقافیی و ڕێکخراوەیی، سەتان کاری تر، هێرۆخان دەسپێشخەر‌ بووە...

ژنێک نەک تەنیا لە کوردستان، بەلکو لە عێراق و ناوچەکەدا، وەک ڕێچکەشکێن و تێکۆشەرێک دەناسرێت.  کۆلەکەی مام جەلال، لەهەموو قۆناغەکانی شۆڕش و تێکۆشاندا، یەکەم خانمەسەرۆک، دوای ڕووخاندنی ڕژێمی گۆڕبەگۆڕی بەعس... 

ژنێک، وەک ڕەمز و سیبمولێک لە نێو خەباتی دوورودرێژی کورددا، لێوانلێو لە ژنی باڵا و تێکۆشەر، شابەشانی پیاوێکی شۆڕشگێڕی وەک مام جەلال. دوای 2010ەش، کە لە کۆنگرەدا زۆرترینی دەنگی بەدەستهێنا، گرنگترین کاری پاراستنی ناوماڵی کورد بووە...
پاڵپشتی هەموو بەرەوپێشچوونێکی هاوچەرخ بووە، لە بوارەکانی هونەر و کلتوورییدا، بۆ ئەوەی شانبەشانی نەتەوەکانی تر، خاوەن فەرهەنگ و ئەدەبیات و کلتووریی ڕەسەنی خۆمان بین...

چەند هێرۆخانێکی تر لە نێو وەسەتی سیاسیی کوردستانی باشووردا، هەبووبان، ئەمێستا چەند فەرسەخێکی تر، دەڕۆیشتنە پێشەوە، چەندین دەزگای و بڵاوکراوە و ڕێکخراوی ترمان هەبوو لە بواری ڕۆشنبیرییدا.

هێرۆخان، وەک خانمێ پڕپڕ لە غرووریی و خۆپێگەیاندنە لەناو ڕەوێک سیساسەتمەداری پیاودا، توانی ڕێچکەشکێن بێ بۆ ژنانی کورد، تا ئەوانیش بێنە پێشەوە، بڕوا و متمانە لەناو دڵییاندا ڕەگ داکوتن. ئێمەی کورد، دەبێ شانازی بە خانمێکی ئاوا بکەین، نەک لەبەرئەوەی هاوسەری مام و کچی ئیبراهیم ئەحمەدە، بەلکو لەبەر ئەو هەموو خزمەتەی بە خەلکی کوردستانی کردووە، پشتگیری زۆربەی خانمان و هونەرمەندان و نووسەرانی کوردی کردوە، ڕێگەخۆشکەر‌بوە تا بتوانن لەسەر قاچی خۆیان بوەستن و لەنێو بواری خۆیاندا بگەشێنەوە...

ئێمە چاوەڕێین، هێرۆیەکانی تریش بێنە مەیدان، بۆئەوەی بەردوام بن لە کارەکان و پڕۆژەکانی هێرۆخاندا. تەمەنی تولانی نوحت بۆ دەخوازین، خانمە تێکۆشەرەکە، بوونی تۆ بۆ هەموومان گرنگ و پێوستە.

 هەوڵ و خەبات و تێکۆشانی شاخ و شاری دادە هێرۆ، لە بابەتێکدا کۆتایی نایەت.
بەڵام نوسینی من بەکورتی و پوختی لەسەر بەسەلیقەیی و ئەزموونی ئەو خانمە  تێکۆشەرەیە، هەر کاری دەستی داوەتێ لە جێگەی خۆیدا بە ئەنجامی گەیاندووە. لە قورسیی خەباتی شاخەوە بۆ ئاڵۆزی و پڕ ئیشی شار.


PM:03:32:12/06/2019

ئه‌م بابه‌ته 3496 جار خوێنراوه‌ته‌وه‌‌



هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی