‌شەڕ بەرۆكمان بەرنادا
PM:05:08:20/10/2019
سەردار قادر

لە هەر پارچەیەكی كوردستان بێت، لە هەر زەمەنێكدا بێت، ئەم وڵاتەی ئێمە هەمیشە شوێنگەی شەڕە، داوای مافی رەوامان بكەین چ دەوڵەت بێت یان ئۆتۆنۆمی هەر داوایەك بێت، وەڵام بۆ ئێمە شەڕە، جینۆ سایدكردنمانە.

لە زیهنی تاكی كورددا زاراوەكانی ئەنفال و كیمیایی و جینۆساید و رەو و شەڕ و تۆپباران و زۆری تر هەن، بەڵام رێكکەوتن و ئاوەدان كردنەوە كەمتر ئەبینرێ.

لەو كاتەوەی هەین ئێمە پڕۆسەی بەردەوامی لەناوبردنمان و دابەشكردن و داگیركاری بۆتە قەدەرمان.
كوردبون واتە لەناوبردن، واتە راكە وا دوژمن هات، شاخەكان فریامان كەون، ساڵی گرانی و ساڵی رەوەكە و هەمو ئەوانە زەمەن بە ئێمە ئەناسرێت.
زەمەن لای ئێمە هەمیشە ناسراوەتەوە بە كارەسات.

ئەوترێت سیاسەت بەرژەوەندییە، ئێمە هەرگیز نەبوینە بەرژەوەندیی بەردەوام نە خۆمان نە خاكمان نە سامانی سروشتی سەر زەوی و ژێر زەوییمان؟!
ئێمەی كورد شانازیمان هەمیشە بە قوربانیەكانمانەوەیە ؟؟؟

گێرانەوەكانمان بۆ نەوەكانی داهاتومان هەمیشە گێرانەوەی كارەسەتاكانە، قارەمانی چیرۆكەكانی ئێمە هەمیشە قوربانیی و سەرسەختی بینینە.

نەوەیەك بۆ نەوەیەك تەنیا ئازار و ماڵوێرانی بۆ جێ دێڵێ.
گەلی برادەران نەڵێن ئەمە روخانە ؟؟
نەڵێن ئەمە بێ ئومێدیە ؟؟؟
درێژترین لیستمان لیستی ناوی شەهیدەكانمانە !!!
یادەوەری شەڕ و داگیركاری شەوچەرەی ئێمە گەرم ئەكات

مە قسەدی كەلام بمانەوێت یان نا، پڕۆسەی لەناوبردن و جینۆسایدكردنمان بەردەوامە، شاخەكانمان دۆستی هەمیشەییمانە.
بەرگری و مقاوەمەت تاكە زامنمانە بۆ مانەوە.

مقاوەمەت بە هەر شێوازێك بێت، بە بەرگری ئەمێنین، بە سیاسەتی حەكیمانە بۆ بونە بەرژەوەندی بەردەوام.

چ گوتارێكمان پێویستە ؟؟
شەڕ چەند ماڵ وێرانیە، بەڵام تاكە رێگە بوە بۆ مانەوەمان، پێویستمان بە پڕۆسەیەكە بۆ پەروەدەیەكی درێژ خایەنی تاكی كورد و گێڕانەوە ی كەرامەت بۆ تاكی كوردی وشیار.

تاكی كورد پێویستی بە گوتارێكی مەدەنی هەیە، كە دەستەمۆی بەرژەوەندی خێڵ و كاریزمای سەركردە نەبێت . كە حیزب نەبێتە ئامانج، بەڵكو ئیتر تاكی كورد ببێتە ئامانج.

ئەمانە وەهم نیە ئەمە قەدەری ئێمەیە ، ئیتر كاتی ئەوە هاتوە كە تاكی كورد حاڵی خۆی باش بناسێت، كاتی ئەوە هاتوە حیزب و كاریزمای سەركردە و بنەماڵە كاڵ ببێتەوە ئیتر زەمەنی بەهادانە بە تاكی كورد.

زەمەنی مقاوەمەی گشتییە. زەمەنی گوتاری هاوبەشە بۆ هەڵوێستی هاوبەش.


هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی



Copyright 2018. westganews.net. All Rights Reserved.