ئەزانن تەماتە بۆ وا گران بووە؟

‌چراخان ئاسۆ

لەم هەرێمە كەسانی ئاسایی ڕۆژێك نییە بە هەواڵی ‎خۆش خەبەری ببێتەوە یان مێشكی بە بابەتێكی بێماناوە سەرقاڵ نەكرابێت، وەک گران بوونی نرخی خۆراك،بەنزین و گۆشت، هەروەک چەند ڕۆژێك دوای تەواوبوونی هەڵبژاردن نرخی یەکێک لە سەوزە سەرەکییەکان کە ئەویش تەماتەیە گران بوو...

‎باشە خێرە ئەم هەموو دەرچووەی كشتوكاڵ لە ماڵەوەن و تەماتە لە كڕین نایەت؟ یان ئەبێت ئێمە بخەوین و خواردن و سەوزە پڕ لە دەرمان و خراپەكانی وڵاتانی داروسێ بكەینە گەدەمانەوە..

‎هەر ڕۆژێك ئێران و تورکیا سنور دابخەن ئیتر نان قات و قڕی تێ ئەكەوێت و ناكڕدرێت، ئاو ئەگیرێتەوە و هەڕەشەی خنكاندنمان لێ ئەكرێت، ئەمە تاكەی؟ ساڵانە ژمارەیەكی زۆر دەرچووی كۆلێج و پەیمانگا و ئامادەی كشتوكاڵ ئاهەنگی دەرچونیان بۆ ئەكرێت بۆ ئەوەی ئیتر بچن لە ماڵەوە بخەون، چونكە دوای دەرچونت لە بەشە كشتوکاڵییەکان ئیتر ئەبێت بە گاڵتەچی خەڵك و هەموان پێت ئەڵێن "ئینجا توخوا ئەوە شوێنە تا لێی بخوێنیت" و بۆ هەر كوێ بچیت بڵێی بەشی كشتوكاڵیم تەواو كردوە كارت نایەنێ و بەجۆرێك تەماشات دەكەن وەك ئەوەی لە تەمەڵ خانە دەرچوبێتی.

‎پسپۆڕانی كشتوكاڵ لەم كوردستانە دەڵێن" ئەگەر یەك بەرمیل ئاو بەشێوازێكی زانستی بۆ  كشتوكاڵكردن لە دەشتی شارەزوور بەكاربهێنرێت ئەوە ئەو بەرهەمەی دەست دەكەوێت نرخ و بەهاكەی ئەوەندەی سێ بەرمیل نەوت دەبێت و ئەگەر تەنها لە دەشتی شارەزوور كشتوكاڵ بكرێت ئەوە دەتوانرێت نەك تەنها بەشی كوردستان بەشی تەواوی عێراق بەرهەمی هەبێت و لەگەڵ ئەوانەشدا گونجاوترین شوێنە بۆ ڕواندنی بەرهەمی ڕوەكی نوێ".

‎من دەپرسم: ئەرێ كەسێك نییە ئەم بابەتە لە حكومەت بگەیەنێت؟ یان ئیتر خۆیان نایانەوێت تێ بگەن و مەبەستیان نییە؟ ئەگەر دەرچوانی بەشە كشتوكاڵیەكان هەر زۆر و بۆر دەبن و دوای ئاهەنگی دەرچونیان دەچنەوە ماڵەوە بەڕاستی چیتر كۆلێج و بەشە كشتوكاڵیەكان زیاددەن و ئیتر داهاتووی خەڵك مەسوتێنن.

چراخان ئاسۆ- ماستەر لە زانستی كشتوكاڵ


PM:07:57:08/10/2018

ئه‌م بابه‌ته 10002 جار خوێنراوه‌ته‌وه‌‌



هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی