چەند خەم ساردین لە ئاستی یەکتر

‌زمناکۆ ئیسماعیل

دەبێت ناونیشانی پەڕتۆکە شیعرییەکەی مەحمود دەروێش لەئاستی یەکدا بڵێنەوە " لەبیر دەچیتەوە، وەک ئەوەی کە هەرگیز نەبوبیت". ئەو ناونیشانە بۆ کۆمەڵگایەک تەواوە کە کەس خەمی هونەرو رۆشنبیری و فەرهەنگی نەبێت، لەنێو ئەو کۆمەڵگایانەش بۆ ئێمەی کورد تا ئاستێک ئەو ناونیشانە دروستەو دەتوانین بڵێین، ئامانجی خۆی پێکاوە.

نزیک بە ٣٠ خولەک لە (گۆگڵ) بەدوای ژیاننامەو فۆتۆیەکی حوسێن میسڕیدا گەڕام، بەڵام بەردەستم نەکەوت، ئەمەش لەکاتێکدایە کە دەبوو، ئەم پیاوە لاپەڕەیەکی تایبەتی (وویکی پیدیای) بۆ بکرایەتەوەو ژیان و کارە هونەرییەکانی ئەم پیاوەی تیادا بڵاو بکرایەتەوە.

سەیری کۆمەڵگای زیندوی دونیا بکەن، لیوناردۆ داڤێنشی لە ١٤٥٢ لەدایکبوەو لە ١٥١٩ کۆچی دوایی کردوە، بەڵام لاپەڕەی تایبەت بەخۆی لە وویکیپیدیا و سۆسیال میدیا هەیە، تاوەکو خەڵک زانیاری لەبارەوە بزانن، هەریەکە لە ڤان کوخ لە ١٨٥٣ لەدایکبوە، ١٨٩٠ کۆچی دواییکردوە، ئەرینستۆ همینگوای رۆماننوس ١٨٩٩ لەدایکبوە، ١٩٦١ کۆچی دوایی کردوە، سلڤادۆر داڵی ١٩٠٤ لەدایکبوە ١٩٨٩ کۆچی دوایکردوە، مۆزارت ١٧٥٦ لەدایکبوە، ١٧٩١ کۆچی دوایکردوە، هەریەکە لەم کەسایەتییانە لەبەر ئەوەی کۆمەڵگای زیندوو خاوەنییەتی، لە تۆڕە کۆمەڵایەتییەکان و وویکی پیدیا، لاپەڕەی تایبەت بەکارو پڕۆژەکانیانی کراوەتەوە، چ لە سۆسیال میدیاو تۆڕە کۆمەڵایەتییەکان بێت، چ لە وویکیپیدیا، ئەوەش بۆ یەوەیە کە نەوەی داهاتوو بەئاسانی ئەو کەسانە لەبیر نەکەن و لەهەمانکاتدا هەریەکە لەوانە بە زیندووی لەنێو خەڵکدا بمێننەوەو بەڵام ئەوەتا دەبینین، پیاویکی وەک حسێن میسڕی، کەمی نەکرد بۆ سینەماو درامای کوردی، کەچی یەک لاپەڕە نابینم بەناوییەوە، ٣٠ خولەکم وویست تاوەکو فۆتۆیەکیم دەستکەوت. 

حسێن میسڕی دەرهێنەرو ئەکتەرو نوسەرو سیناریستە، ناوی تەواوی حسێن رەحیم محەمەد ئەمین، لە ساڵی 1957 لە گەڕەكی شوان لە كەركوك لەدایكبوە، بەهۆی کێشەی سیاسییەوە نەیتوانیوە بخوێنێت، بۆیە خۆی فێری نووسین و خوێندنەوە كردوەو لە ماوەیەكی زۆر كەمدا بووەتە خوێنەرێكی زۆر باشی دەقە شانۆییە عەرەبی و بیانییەكان، زمانی عەرەبی، توركی، هیندی بەباشی زانیوە.

ساڵی 1977 كە بۆ خوێندنی كۆرسی شانۆیی دەچێتە میسرو لە گەڕانەوەی نازناوی میسری وەردەگرێت.

ساڵی 1973 بۆ یەكەمجار لە شاری موسڵ لە شانۆیی (من الژی قتل الوحش) وەكو ئەكتەر بەشداری كردوە، لە نوسینی عەلی سالم و عەدنان جویدجاتیز

ساڵی 1979 پەیوەندیكردوە بە تیپی شانۆیی ئەزمونگەری كەركوكەوە، هەر لەو تیپە دەستی بە ئەزمونی شانۆیی كردوەو بەشداری چەند شانۆیەكی تری كردوەو بیروڕای پێشكەوتووانەی هەبووە لە تیپەكەدا.

ساڵی 1979 نواندن - لە شانۆیی (باڵندەو رێوی) – دەرهێنانی (جەعفەر موسا) – نووسینی (ناتق خلوسی).

ساڵی 1979 نواندن – لە شانۆیی (الدراویش یبحپون عن الحقیقە) – دەرهێنانی (عبدالرزاق محەمەد عەزیز) – ئەم شانۆییە بە گەورەترین نمایش ئەژماركرا لەسەر ئاستی عیراق و چەندەها نووسینی لەسەر نوسرا.

ساڵی 1979 وانەی هونەری بۆدی تەكنیكی وتۆتەوە لە تیپەكەی.

ساڵی 1980 یاریدەدەری دەرهێنەری شانۆیی (دوا گۆرانی) – دەرهێنانی (عبدوالرزاق محەمەد عەزیز).

ساڵی 1981 – یاریدەدەری دەرهێنەری شانۆیی (بەسەرهاتی دۆستی ئاژەڵ) – دەرهێنانی (عبدوالرزاق محەمەد عەزیز).

ساڵی 1981 – نواندن لە شانۆگەری (گەمەی سوڵتان و وەزیر) – دەرهێنانی (عبدوالرزاق محەمەد عەزیز).

ساڵی 1982 - نواندن لە شانۆیی (دارستانی یوتوبیا) – دەرهێنانی (ئیسماعیل هەورامی) سەرپەرشتیاری گشتی (دەرهێنان)ـەكە بووە.

ساڵی 1983 – نواندن لە شانۆیی (حب ابیكاك و موتە) – ئامادەكردنی (جەلال پۆڵا) و ساڵی 1984 لە فێستیڤاڵی ساڵانەی (المنتدی المسرح) لە بەغدا نمایشكراو خەڵاتی باشترین ئەكتەری گەنجی پێبەخشرا.

لەم شانۆگەرییەدا بەسەركەوتوویی سەرنجی هونەرمەندە گەورەكانی بەغدای راكێشا.

ساڵی 1991 ئەندامی دامەزرێنەری تیپی شانۆی قەڵا بووە لە كەركوك، هەرچەندە دووربووە لە شارەكەی، هەمیشە دەستی یارمەتی بۆ هەموو هونەرمەندانی دوای خۆی بەهەموو كەمینەكانەوە درێژكردووەو بەتایبەتی تیپی قەڵا كە تائێستاش بەردەوامن لە كاركردن – لەڕێگەی هەردوو كەناڵی خاك TV و كەناڵی ئاسمانی كوردسات-ـەوە.

ساڵی 1985 هاتوەتە شاری سلێمانی و ئەندامێكی چالاكی تیپی نواندنی سلێمانی بووە.

ساڵی 1985 دەرهێنانی شانۆگەری (گوڵی بەهار هات) – نوسینی (جەلیل القیسی) لە فێستیڤاڵی لاوانی سلێمانی – خەڵاتی یەكەمی دەرهێنان و بەرهەمی پێبەخشرا.

ساڵی 1987 دەرهێنانی شانۆیی (هەڵهاتنی مانگ) – نوسینی (لیدی گریگۆری).

ساڵی 1988 نواندن لە شانۆیی (سێتای ئاسنین) – دەرهێنانی (جیهاد دڵپاك).

ساڵی 1989 نواندن و ئامادەكردن و دەرهێنانی شانۆیی (ئەو پیاوەی خۆی بە بارمتە دانا) نووسینی (مەهدی ئەلسماوی).

یەكەمین هونەرمەندی كورد بوو كە هونەری پانتومایمی هێنایە هونەری شانۆی كوردی، بە سازدانی كۆڕو سیمینار تایبەت بەم هونەرە لە شارەكانی سلێمانی، هەولێر، دهۆك، كەركوك، بەغدادو پێشكەشكردنی كاری هونەری.

ساڵی 1990 نواندن و ئامادەكردن و دەرهێنانی شانۆیی (نجنسكی ساتی زەماوەند) كارێكی پانتومایم لە فێستیڤاڵی ساڵانەی (المنتدی المسرح) لە بەغدا، خەڵاتی رێزلێنانی (نواندن و دەرهێنانی) پێبەخشرا.

ساڵی 1991 نواندن و سیناریۆو دەرهێنانی (سەمایەكی بێ ناونیشان) كارێكی پانتۆمایم.

یەكەمین هونەرمەندی كوردە كە كاری شانۆیی هێنایە سەر شەقام و شوێنە گشتییەكان بەشێوەی كەرنەڤاڵ و هەمیشە كارەساتی (هەڵەبجەو ئەنفال) پانتاییەكی گەورەی هەبوو لەكارەكانیدا.

ساڵی 1992 سیناریۆو دەرهێنانی (كەرنەڤاڵی هەڵەبجە) لە شەقامی مەولەوی تا بەردەركی سەرا.

ساڵی 1992 سیناریۆو دەرهێنانی (كەرنەڤاڵی ئاشتی) لە ئەمنە سورەكە.

ساڵی 1992 سیناریۆو دەرهێنانی (تابلۆی رامان بۆ 1ی ئایار)، كەرنەڤاڵی زیندانە سیاسییەكان (كەرنەڤاڵی منداڵانی ئەنفال).

ساڵی 1992 نواندن لە فیلمی (مەرگی ئەرخەوانی) دەرهێنانی (كامەران رەئوف).

ساڵی 1993 نواندن لە فیلمی (فرمێسكی رەش) دەرهێنانی (كامەران رەئوف).

ساڵی 1993 ئامادەكردن و دەرهێنانی شانۆیی (دەروێشەكان بەدوای راستیدا وێڵن)، نووسینی (مستەفا حەڵاج) لە یەكەم فێستیڤاڵی شانۆیی سلێمانیدا خەڵاتی یەكەم دەرهێنان و باشترین بەرهەمی پێبەخشرا.

ساڵی 1994 (ئەلف و بێی تەواوكەری جەستەكان) - ئامادەكردن و دەرهێنانی شانۆیی (گەمەی چاوەڕوانی).

ساڵی 1994 سیناریۆو دەرهێنانی شانۆیی (مەرگی كورسییەك) لە فێستیڤاڵی دووەمی شانۆیی سلێمانی – خەڵاتی باشترین دەرهێنان و بەرهەمی وەرگرتووە.

ساڵی 1995 تولیف و دەرهێنانی شانۆیی (كەرنەڤاڵی دەمامكەكان).

ساڵی 1995 بەشداری لە پێشانگای (ئاوارەبوون) لە وێرانەی (حەسیب ساڵح) لەگەڵ هونەرمەندان (مدحت كاكەیی، چیمەن ئیسماعیل، ئاری بابان، سهاد ستار).

ساڵی 1995 ئامادەكردن و دەرهێنانی شانۆیی (چیرۆكی خۆشەویستی) نوسینی (فەلاح شاكر) لە فێستیڤاڵی سێیەمی شانۆیی سلێمانی خەڵاتی یەكەمی وەرگرتووە.

ساڵی 1996 تەولیف و سەرپەرشتیاری گەمەكە – شانۆیی (دوای سەدەیەك شەڕ ساتێك بۆ گەمە).

ساڵی 1996 ئامادەكردن و دەرهێنانی شانۆیی (پاسەوان) – نوسینی (هارول پینتەر).

ساڵی 1997 نواندن و ئامادەكردن و دەرهێنانی شانۆیی (دیفز – دیفز) دەقی (هارولد پینتەر) لە چوارەمین فێستیڤاڵی شانۆیی سلێمانی – خەڵاتی پێش مەندی كاری تەكنیكی جەستەی لەبواری نواندن پێبەخشرا.

ساڵی 1997 زێوانی گۆڕستان – ئامادەكردن و دەرهێنانی شانۆیی (گۆڕستانێكی نوێ) لە نوسینی (شێرزاد حەسەن).

ساڵی 1997 سیناریۆو دەرهێنانی كەرنەڤاڵی (ناپاڵم و سەمای گوڵەبەڕۆژەكان) لە شەقامی مەولەوی بۆ بارەگای UN تایبەتبوو بە ناڕەزایی دەربڕین بەرامبەر هاتنە ژوورەوەی سوپای توركیا بۆ خاكی كوردستان.

ساڵی 1998 ئامادەكردن و دەرهێنانی شانۆیی (لە تەنتوومانێكدا).

ساڵی 1998 سیناریۆو دەرهێنانی (نمایشی شەختە فرمێسكەكانی ئەنفال) لە شەقامی مەولەوی بۆ بەردەم بارەگای UN.

ساڵی 1999 ئامادەكردن و دەرهێنانی شانۆیی (سزاو تاوان). نوسینی (فەلاح شاكر)

كارە هونەرییەكانی لە بەشی درامای خاك ساڵی 1997 – 2009
ساڵی 1997-1998 ئامادەكردن و دەرهێنانی كورتەدرامای (تەمەر هنیدی، بۆ خۆم ناگریم، سێ دزەكە، خەنەكەی مام حەسەن، مانگ گیران، پلەو چاو ماسی، سەعە درۆزنەیان...، بەناو نەقاش، فەرەجی، پینەچی، پاشاو سێ پرسیار، ملكەڕێوی، دیدەنی، زنجیرە درامای (كەریم تاك دینار، شەش ئەڵقە).

بەرنامەیەكی هونەری تایبەت بە مانگی رەمەزان.

ساڵی 1999 سیناریۆو دەرهێنانی درامای (خۆرنەوازان) بەشی یەكەم (15) ئەڵقە، بیرۆكەی خاتوو هێرۆ ئیبراهیم ئەحمەد.

ساڵی2001 نوسین و سیناریۆو دەرهێنانی درامای (خەمی چۆلەكەكان) (29) ئەڵقە.

ساڵی 2000 نوسین و سیناریۆو دەرهێنانی درامای (خۆرنەوازان) بەشی دووەم (17) ئەڵقە

ساڵی 2002 نوسین و سیناریۆو دەرهێنانی درامای تەلەفزیۆنی (رەشەی پۆلیس) (31) ئەڵقە.

ساڵی 2003 نوسین و سیناریۆو دەرهێنانی درامای (حەسەنە فەنی) (19) ئەڵقە.

ساڵی 2004 سیناریۆو دەرهێنانی تابلۆی (سوێند) لە چلەی شەهیدانی كارەساتی 1ی شوباتی 2004 – هەولێر.

ساڵی 2004 سیناریۆو نوسین و دەرهێنانی درامای (جومعە) (27) ئەڵقە.

ساڵی 2005 رێپۆرتاژێك بۆ پەیمانگای هونەرە جوانەكانی – كفری.

ساڵی 2005 نوسین و سیناریۆو دەرهێنانی درامای (گوڵە بێ رۆژەكان) (15) ئەڵقە

ساڵی 2007 نوسین و سیناریۆو دەرهێنانی درامای (نیشتمان) (15) ئەڵقە.

یەكەمین هونەرمەندە كە شانۆگەری لە مزگەوتدا پێشكەشبكات.

ساڵی 2008 ئامادەكردن و دەرهێنانی شانۆیی.

(بێم لەوێیت) شیعری قوبادی جەلیل زادە، نمایشكردنی لە مزگەوتی قازی محەمەد.


ساڵی 2009 ئامادەكردن و دەرهێنانی شانۆیی (هارون) لە نوسینی رۆمانی (هارون ئەلرەشید)ی محەمەد موكری، نوسین و سیناریۆی (رەزاو رەمەزان).

هەتا ئەو شوێنەی زانیاریتان خوێندەوە لەسەر ژیاننامەی حوسێن میسڕی، لە پەیجێکی نافەرمی 
(مه ڵبه ندی گۆرانی و ئاوازی ره سه نی كوردی)، زانیارییەکانم دەرهێناو کەدەبوو ئەو زانیارییانە لە وویکیپیدیا و لەلاپەڕەیەکی تایبەت بەو پیاوە بەدەست بهاتنایە، بەڵام لەبەر ئەوەی ئێمەی کورد خەمساردین بەراوبەر بەیەکتر، ناتوانین وەک پێویست رێز لەکارو ماندوو بونی یەکتر بگرین، ناتوانین وەک پێویست رێز لەهونەر و سینەماو نوسین و فەرهەنگ بگرین، چونکە بەتەنها سیاسەت و کوشتن و بڕین ژیانی هەمومانی داگیرکردوە.

حوسەین میسڕی  لە ئێوارەی 31ی ئایاری ٢٠٠٩ دا بەهۆی نەخۆشی دڵەوە ژیانی لەدەستداو بەجێی هێشتین، بەڵام ئەوەی کە ماوەتەوە لە رابردوی ئێمە، ئەو هەموو دراماو کارە هونەریی و سینەماییەیە کە دەبێت شانازی پێوە بکەین، نەک کارەکان و خاوەنەکەی لەبیر بکەین و تەنانەت نەتوانین پەیککارێک، مۆنۆمێنتێک، یان لاپەڕەیەکی وویکی پیدیا، و کارێکی باش لەدوای خۆی بۆ ئەم کەسایەتییە دروست بکەین و بەجێ بهێڵین


PM:07:00:31/05/2019

ئه‌م بابه‌ته 5144 جار خوێنراوه‌ته‌وه‌‌



هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی