نەمدەنێ، دەیشێوێنم!
بەختیار شاخی
دوای ڕاپەڕین، لە زستانی ١٩٩١، ڕێكخراوێك پەیدا ببوو، ناوی (كۆمەڵەی دڵدارانی كوردستان) بوو. ناسنامەشیان بۆ ئەندامانیان دروست كردبوو كە بەپێی ڕەگەزی خاوەنكارت، درووشمێكی لەسەربوو. بۆ كچان نووسرابوو: نەمدەنێ، خۆم دەسووتێنم! ھیی كوڕانیش: نەمدەنێ، دەیشێوێنم!
ھەندێ بەرپرسی ئێستای یەكێتی، دەڵێی ئەندامی ئەو كۆمەڵەیەن نەك حزبێكی گەورە و ٤٤ ساڵە. ھەر شتێكیان بەدڵ نەبێ، مایكێك بەدەستەوە دەگرن و دەڵێن: بەدڵی ئێمە نەبێ، دەیشێوێنین.
*
شازدەی ئۆكتۆبەر، پیلانێكی گەمژانە، كورتبینانە و (پارتینەناسانە) بوو. وایان دانابوو، پارتی و بنەماڵەی بارزانی ڕادەماڵن و خۆشیان دەبنە حەرەس حدود و بەنوێنەرایەتیی حەشد، دەبنە پۆلیسێكی موخلیسی بەغدا لە كوردستان.
كە پارتی لە پردێ و سحێلا و تلسقۆف ئەو پیلانەی لەگۆڕ نا، دەبووایە خەبەریان بێتەوە و چیدی بیر لە پیلانگێڕی و (گۆڵكردن) لە پارتی نەكەنەوە، كەچی وەك نە بایان دیبێ و نە باران، دیسان بە ھەمان عەقڵییەتەوە، بیریان بۆ لای پیلانگێڕی، یا بە قەولی خۆیان پلان B و پلان C، دەچێ.
ئەرێ ژیرێك لەناو یەكێتی پەیدا نابێ پێیان بڵێ:
١- مەگەر پێش شازدەی ئۆكتۆبەر، ئێوە فەرمانڕەوای كەركووك نەبوون؟ پارێزگار ھیی ئێوە نەبوو؟ بۆ واتان لەو شارە كرد كە ئێستا خۆتان بە (عدم تعرض) بچنەوە ناو شار؟
٢-مەگەر لە شازدەی ئۆكتۆبەردا كە (پیلانA بوو نەك پلانA)، ئێوە كەركووكتان بە پارتی فرۆشتووە كە ئێستا وا بە ڕووقایمییەوە داوا لە پارتی دەكەن پارێزگاری كەركووكتان بداتەوە؟
٣- سیاسەتی (سەد یا سفر) پێشتر چ خێرێكی بۆ ئێوە ھەبووە كە ھێشتا لەسەری دەڕۆن و ھەڕەشەی ئەوە دەكەن كە ئەگەر ھەموو شتێ بە دڵی یەكێتی نەبێ (تێكی دەدەین)؟
٤- ئەوانەی كەركووكیان بەم دەردە برد، ئەوانەیش كە دەیانەوێ لەسەر حیسابی كادیر و پێشمەرگە دڵسۆزەكانی یەكێتی، حەیا و حورمەتی تكاویان وەدەست بھێننەوە، باشتر وایە لەخەو ڕابن، بەم پیلانۆكە و گەمە ناشرینانەی ئەوان، پارتی و ماڵباتی بارزانی نەك ھەر لاواز نابن، بەڵكوو زیاتر لەناو خەڵكی كوردستاندا ڕەگ دادەكوتن. نموونەش كاریگەریی خراپی شازدەی ئۆكتۆبەر لەسەر دەنگەكانی یەكێتی و زیاتر بەھێزبوونی پارتی لەھەردوو ھەڵبژاردنی كوردستان و عێراقە.
٥- زیزبوون و ھەڕەشەی دووئیدارەیی و ناكۆكی، جگە لەزیان ھیچی لێ شین نابێ. دەبێ دوو سەركردەی عاقڵ لەناو یەكێتی ھەبن كە دەست ھەڵبڕن و بڵێن: ئیتر بەسە، پەنجاوپێنجساڵە ڕێی ناكۆكیمان گرتۆتەبەر، كەچی تەنھا ئەو چەند ساڵە ھەموو خەڵك خۆشحاڵ و وڵات ئارام بوو كە لەگەڵ پارتی تەبا و ھاوپەیمان بووین.
ئەگەر خزمەتی گەل و وڵاتتان دەوێ، بگەڕێنەوە بۆ ئیرادەی گەل وچیدی خۆپەرستی و خۆسەپاندن مەكەنە ڕێكاری خۆتان.
خەڵك ئارامی دەوێ، ژیانی دەوێ، سەقامگیریی ئابووری و بازاڕی بووژاوەی دەوێ. دوای ٢٨ ساڵ ئازادی، كەس نایەوێ ژێردەستە بێ.
PM:01:23:20/02/2019
ئهم بابهته 2412
جار خوێنراوهتهوه
هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی