‫پەیامێکی کورت بۆ گۆڕان

بیانووەکانی خانەی راپەڕاندن بۆ دەرکردنی پەرلەمانتار ⁧‫مەسعود حەیدەر،‬⁩ پابەندنەبوونی ناوبراوە بە بەرنامەی کارەکانی گۆڕان.

بەڵام لە دوای ھێرشی یەکێتی نیشتیمانی کوردستان بۆسەر مەکۆی سەرەکی بزووتنەوەی گۆڕان لە گردی زەرگەتە و راگەیاندنی ئەنجامی ھەڵبژاردنەکەی ١٢ی ئایار، بەھۆی بانگەشەکردن بۆ دروستکردنی ھێزێکی چەکدار  لە لایەن سەرکردە و ھەڵسوڕاوەکانی، ئێستا گۆڕان پڕە لەو کەسانەی لە پەیڕەو و دەستووری بزووتنەوەکە بە شێوەیەکی بنچینەیی فیکری و سیاسی لایانداوە و دەخوازن بزووتنەوەی گۆڕان لە بزووتنەوەیەکی سیاسی مەدەنییەوە بکەن بە بزووتنەوەیەکی سیاسی چەکدار، ئەمەش بە پێچەوانەی بنەما دامەزراوەکانی بزووتنەوەکەیە لە دژی میلیشیای حیزبی و شەرعییەتی چەکداری و شۆڕشگێڕی.  

کەواتە گۆڕان لەبەردەم بڕیارێکی چارەنووسسازدایە، بەوەی:
ئایا دەستووری حیزبەکەی دەگۆڕێت بۆئەوەی خواستی چەکدارکردنی  سەرکردە عاشق بە چەکەکان بەدیبھێنێت تا ببن بە پارتی و یەکێتی-یەکی تر؟
یان دەست دەکات بە دەرکردنی ئەو سەرکردە و ھەڵسوڕاوانەی بەرنامەی بنچینەیی حیزبەکە جێبەجێ ناکەن؟

گۆڕان لە ئەگەری بەڵێی ھەردوو ھەنگاوەکەدا زیانی سیاسی لە رابردوو و ئێستا و داھاتووی خۆی و کۆی پرۆسەی سیاسی ھەرێم دەدات. بۆیە لەبری دەرکردنی وەزیر و پەرلەمانتار  و ئەندامانی تر لە ریزەکانی، باشترە کەسانی شیاو بۆ پێگەی شیاو ھەڵبژێرێت. لەبری بانگەشەکردن  بۆ خەباتی چەکداری بەرەی ئۆپۆزسیۆنی مەدەنی بەھێز بکات.

PM:01:47:29/05/2018

ئه‌م بابه‌ته 15509 جار خوێنراوه‌ته‌وه‌‌

هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی