سەردەمی ڕیسوا بوون!
ئارێز عه‌بدوڵا
ھەموو گەلانی دنیا شانازی بە سەروەری و سەرکەوتن و داب و
نەریت و زمان... خۆیانەوە دەکەن. ئێمەی کوردیش ئەگەر لەوان پتریش نەبێ کەمتر لەوان
بابەتی شانازیمان نییە.
خەبات، سەروەری، زمان، فەرھەنگ، نەریت، فۆلکلۆر، نیشتیمان،
مێژوویی نوسراو و نەنوسراو ھەموو بابەتە پێکھێنەرەکانی نەتەوەیەکی ڕەسەن و مرۆڤی
کوردن.
بەڵام لەھەموو شانازیەکان زیاتر ئێمە باسی شۆڕش و خەبات دەکەین، ئەویش چونکە
پرۆسێسی بەرگری کردن و مانەوە و پاراستنی شانازیەکانی ترو بنەماکانی گەلی
کوردستانن. لەم سەردەمەدا شۆڕشی نوێ و ڕاپەڕین گەلەکەمانیان لەسەر لێواری مردن و لە
ناوچوون گێڕایەوە. کەمنین ئەوانەی ڕۆڵێکی کاریگەریان ھەبوو لە شۆڕش و ڕاپەڕین، ھەندێک
لەوانە گیانی خۆیان کردە قوربانی و ھەندێکیش تامی ئازادی و دەسەڵاتمان چەشت.
ھەموو ئەو تێکۆشەرانەی ڕۆڵیان ھەبووە لە ڕۆژگارە سەختەکان
جێگای شانازین، بەڵام کاتێک کورسی و عیش و نۆشی ژیان دەبێتە ئامانج، پرسیارێک
دروست دەبێ ئایا ئەوانەی بەناھەق دەوڵەمەند دەبن، ئەوانەی بەناھەق دەست لە کورسی دەسەڵات
بەرنادەن، ئەوانەی بەناھەق جێگا بۆ توانا
و نەوەی نوێ چۆڵ ناکەن، ئەوانەی دەست لەگەڵ کۆمپانیاکان تێکەڵ دەکەن، ئەوانەی زەوی
و زاری شارەوانیەکان لەسەر خۆیان و کەس وکاریان تاپۆ دەکەن مافی ئەوەیان ھەیە
شانازی بە ڕابردووەکەیانەوە بکەن؟
ئایا دەستکەوتی دەسەڵاتداران بارتەقای ئەو چەند ساڵەی خەبات
و تێکۆشانەیە یان زۆر لەسەری قەرزدارن؟
دەستەبژێری خەبات و تێکۆشان لە ھەموو حزبە سیاسیەکانی
کوردستان مافی خۆیانە شانازی بە ڕابردووەکەیانەوە بکەن، بەڵام ئایا دەکرێ ئەو
شانازیە بۆ زیاتر دادۆشینی حکومەت و زیاتر خۆ دەوڵەمەندکردن و زیاتر خۆ بە کورسیەوە
گرساندن بێ؟ من پێم وایە سەردەمەکە گۆڕاوە
و گەل چاوی کراوەتەوە و تەکنەڵۆجیا و ھۆکارەکانی گەیاندنیش ھێندە بەھێز بوونە کەچی
تر چەواشەکاری بڕنەکا و بەری ڕۆژیش بە بێژینگ نەگیرێ.
ئەگەر سەردەمێک سەردەمی لە خۆبردوویی و شانازی بووبێ لێرە
بەدواوە سەردەمی ڕیسوابوونی چەواشەکاران و ھەڵپەرستان دەبێ. کێ دەیەوێ پارێزگاری لە
خەبات و شانازیەکانی بکا با دەست ھەڵبڕێ و کێش دەیەوێ تاسەر ھەر نان بەسەروەریەوە
بخوا و دەسەڵات بە پاداشتی خەباتی ڕابردووی خۆی و پسولەی لێبوردنی خوایی بزانێ بەدڵنیاییەوە تەنیا ریسوایی بۆ دەمێنێتەوە.
AM:10:01:19/03/2017
ئه‌م بابه‌ته 5820
جار خوێنراوه‌ته‌وه
هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی