‌چۆن "شاسوار عەبدولواحید" زیندانیی كرا؟
PM:08:26:03/03/2019
مەم بورهان قانع

چەند سەعاتێك لەمەوبەر، من و چەند هاورێیەكم، لەگەڵ "شاسوار عەبدولواحید"دا، بە ئۆتۆمبێلێك بەرەو دادگای سلێمانی بەرێكەوتین و هۆكاری چونەكەیشمان بۆ دادگای ناوبراو، بەهۆی ئەوەوەبو كە "شاسوار" دو سكاڵای لەدژ تۆماركرابو و ئەویش وەكو رێزێك بۆ سەروەریی یاسا، چوە دادگا، بەڵام دادوەر بڕیاری دا بە حەپسكردنی.

حەپسكردنی "شاسوار عەبدولواحید" (كە تا نوسینی ئەم وتارە لە زیندانی سەربازگەی سەلام-ە لە راپەڕین-ی شاری سلێمانی)، بەهۆی شكاتێكەوەیە، كە بەپێی مادەی (434)ی یاسای سزاكانی عیراقیی ژمارە (111)ی ساڵی 1969، پێشتر لە دژی تۆماركرابو.

ئەم وتارە، ئیستێ‌ لەسەر رەهەندی بەسیاسیكردنی ئەم كەیسە یاساییە دەكات (كە ئەمە دوەمین جارە ئەم سیاسییە گەنجە، لە سایەی دەسەڵاتی كوردیی دا و لە ماوەی نزیكەی ساڵێكدا، زیندانیی دەكرێت):

ئەمڕۆ "شاسوار"، جیا لە سەركردەی هەر حزبێكی سیاسیی كوردیی لە باشوری كوردستان، رێزی دادگای گرت و بەپێی خۆی چوە بەردەمی دادگا. هەڵبەتە، ئەمە منەتكردن نییە، بەڵكو ئەمە هەڵوێستێكی مەدەنییانە و یاساییانەی سەركردەیەكی سیاسیی گەنجە، كە هەم متمانەی بەخۆی هەیە، هەروەها رێزی دادگایش دەگرێت. بەڵام، كاتێ‌ چوە بەردەمی دادگا، دوای زیاتر لە دو كاتژمێر هاتوچۆ لەنێوان بنكەی پۆلیسی دادگا و لێكۆڵەری دادبینیی و دواتر دادوەر و جارێكی دیكە رەوانەكردنەوەی بۆ لای لێكۆڵەری دادبینیی و دواجار بە بڕیاری دادوەر، بۆ ماوەی 24 كاتژمێر، بڕیاری حەپسكردنی بەسەردا سەپێنرا.

ئێستا قەناعەتێكی یەكلاكەرەوە لەئارادایە، كە هەڵوێستی فەرمیی جوڵانەوەی "نەوەی نوێ‌" و هەردو فراكسیۆنی ئەم جوڵانەوەیەیە لە ئەنجومەنی نوێنەرانی عیراق و پەرلەمانی كوردستان، ئەویش ئەمەیە: "ئەم كەیسەی "شاسوار عەبدولواحید" بە سیاسیكراوە" و هەیشن دەپرسن: چۆن بەسیاسیكراوە؟! ئەوەتا فەرمانبەرێكی فڕۆكەخانەی سلێمانی و كارمەندێكی كۆمپانیایەك سكاڵایان لەدژی ئەم پیاوە تۆماركردوە و بەو هۆیەوە زیندانیكراوە، نەك دەسەڵات سكاڵای لەدژ تۆماركردبێت!

بۆ ئەوەی بەرچاوی خوێنەران لەسەر ئەم قەناعەتە رونبكەمەوە، كە ئەم كەیسە یاساییە بەسیاسیكراوە، پێویستە بچینەوە بۆ دەقی ئەو مادە یاساییەی "شاسوار"ی پێ‌ حەپسكراوە، كە ئەویش مادەی (434)ی یاسای سزاكانی عیراقییە.

بەپێی مادەی (110) لە "یاسای ئوسوڵی دادبینیی سزایی"ی عیراقیی: "- ئەگەر كەسی دەستگیركراو بە تۆمەتێك كە حەپسكردن بێت بۆ ماوەیەك، كە كەمتر بێت لە سێ‌ ساڵ، یان بە غەرامەكردن، لەسەر دادوەرە پاڵپشت بە داخوازییەكی پێشكەشكراو بۆ كەفالەت، یان بێئەوەیش، ئازادی بكات، ئەگەر زانرا ئازادكردنەكەی زیان بە رێچكەی دادگاییكردنەكەی ناگەیەنێت، یان نابێتە هۆی راكردنی.
 
- كەسی دەستگیركراوی تۆمەتبار بە سەرپێچیكردن، نابێت دەستبەسەربكرێت، تەنها لەوكاتەدا نەبێت كە شوێنێكی دیاریكراوی نیشتەجێبونی نەبێت".

كەواتە:

پرسیارەكە ئەمەیە: ئایا دادوەر حوكمێكی دادوەرانەی داوە، یان لەم پرسەدا "دڵڕەقیی" و بەلارێدابردنی یاسا هەیە و یاسا وەكو خۆی جێبەجێنەكراوە؟

ئەگەر دیققەتی ئەم مادەیەی "یاسای ئوسوڵی دادبینیی سزایی"ی عیراقیی بدەین، بۆمان روندەبێتەوە:

1- بەهۆی ئەوەی مادەی 434ی یاسای سزاكانی عیراقیی، حوكمەكەی ناگاتە ساڵێك، یان غەرامەكردنی 100 دیناری عیراقییە، یاخود بە یەكێك لەو دو سزایە، ئەوا دەبو "شاسوار عەبدولواحید" دەستبەسەرنەكرایە، چونكە حوكمەكەی (ئەگەر تەنانەت تۆمەتەكەیشی بەسەردا ساغبكرێتەوە و تەنانەت قورسترین سزایش بدرێت)، حوكمەكەی ناگاتە ساڵێك و ئەمەیش كەمترە لەو ماوەیە، كە لە مادەی 110ی یاسای "ئوسوڵی دادبینیی سزایی"ی عیراقیی دا هاتوە.

2- بەوپێیەی شوێنی نیشتەجێبونی تۆمەتبار رون و ئاشكرایە، ئەمەیش جەخت لەسەر ئەو خاڵەی دیكەی مادەی 110 دەكاتەوە، كە ناكرێت تۆمەتبارەكە دەستبەسەر بكرێت و بخرێتە زیندانەوە.

كەواتە:

1- لە زیندانیكردنەكەی "شاسوار عەبدولواحید"دا، هیچ حسابێك بۆ بڕگەی یەكەمی مادەی 110ی یاسای "ئوسوڵی دادبینیی سزایی"ی عیراقیی نەكراوە و دەبو "رەبتی كەفیل" بكرایە. بۆیە، ئەم حسابنەكردنە، ئەو بۆچونە زیاتر تۆخدەكاتەوە كە ئەم كەیسە بە سیاسیكراوە.

2- لە زیندانیكردنەكەی "شاسوار عەبدولواحید"دا، هیچ حسابێك بۆ بڕگەی دوەمی مادەی 110ی یاسای ناوبراو نەكراوە، كە شوێنی نیشتەجێبونی تۆمەتبار زانراو و ئاشكرایە. ئەمەیش ئاماژەیەكی دیكەیە كە ئەم كەیسە بەسیاسیكراوە، یان لانیكەم یاسا وەكو خۆی جێبەجێنەكراوە.

بۆیە:

سەرەڕای تۆخبونەوەی ئەو قەناعەتە كە ئەم كەیسە بەسیاسیكراوە، لەوەیش تێدەگەین كە:

1- كاتێ‌ "شاسوار" دەچێتە بەردەمی دادگا، ئەمە جێگای منەت نییە بەسەر یاسا و دادگاوە، چ لەلایەن ناوبراوەوە بێت، یان لەلایەن جوڵانەوەی "نەوەی نوێ‌"وە، بەڵكو ئەمە جێی دەستخۆشییە كە هاوڵاتییەكی ئەم هەرێمە، كە سەرۆكی جوڵانەوەیەكی سیاسییە، رێزی یاسا و دادگا دەگرێت و بەپێی خۆی دەچێتە بەردەمی دادگا (كە پێویستە هەموان وابن)، بەڵام سەرەنجام بەمشێوەیە مامەڵە لەگەڵ ئەم كەیسەدا دەكرێت.

2- دیسانەوە ئەمە جێی منەت نییە، كە سكاڵالێكراوێك بچێتە بەردەم دادگا، تەنانەت ئەگەر سەرۆكی جوڵانەوەیەكی سیاسیی بێت و هەشت كورسیی لە پەرلەمانی كوردستان و چوار كورسیی لە پەرلەمانی عیراقیی دا هەبێت و سەرەڕای ئەو تەزویرانەی لە هەڵبژاردنەكانی رابردودا بەرانبەر بە دەنگەكانی جوڵانەوەكەی كرا و ئێستا هێزی چوارەمە و دەچێتە بەردەمی دادگا، ئێ‌ خۆ دەبێت دادگایش ئەمە وا لێكنەداتەوە كە جێگای منەت نییە (وەكچۆن چ "شاسوار" و چ جوڵانەوەكەیش بە منەتی نازانن)، بەڵام ئەی ئەم دادگایە و دادگاكانی دیكەی هەرێم و دەسەڵاتی "دادوەریی!" لە هەرێمی كوردستان دا، چی دەڵێن بەرانبەر بەو سەدان بكوژ و تاوانبارانەی فەرمانی دەستگیركردنیان هەیە و خەڵكانی بێتاوانیان شەهیدكردوە و تەنانەت كارەكتەری پلە هەزاری حزبەكانی دەسەڵاتیش نین، كەچی حزبەكانیان رادەستی دادگایان ناكەن، ئەی دەسەڵاتی قەزایی چی دەڵێت بۆ ئەم ریسواكردنە قەزاییە لە هەرێمی كوردستان؟!

ئاخر دەسەڵاتێكی كوردیی لە ماوەی 28 ساڵی حكومڕانیكردنی دا، ئامادەنەبێت سەدان تاوانبار بە كوشتن و هەزاران بازرگانی ناشەرعیی نەوت و سامانی ئەم وڵاتە و ریسواكردنی دامەزراوە دەوڵەتییەكانی هەرێم رادەستی دادگا بكات، بەڵام سەرۆكی جوڵانەوەیەكی سیاسیی (تۆ بڵێ‌ هاوڵاتییەكی ئاسایی)، بەپێی خۆی بچێتە بەردەمی دادگا و بەپێی حوكمی یاسایی مافی ئەوەی هەبێت "رەبتی كەفیل" بكرێت، بەڵام بخرێتە زیندانەوە، ئەوا لە ساڵرۆژی راپەڕینی خەڵكی كوردستان دا، چی بە شەهیدانی راپەڕین و خەڵكی بەویژدان و بەشەرەفی كوردستان دەڵێت؟!

 بەم بڕیارەی ئەمڕۆی دادگا، پەڵەیەكی دیكەی دزێو و رەش خرایە سەر 28 ساڵەی ئەزمونی حكومڕانیی كوردیی و دادگاكانی ئەم حكومڕانییە.

دەستگیركردنی "شاسوار عەبدولواحید"، تەنها یەك لایەن هەڵدەگرێت و دوەمیان نیە، كە ئەویش بە سیاسیكردنی ئەم كەیسە و بەلارێدابردنی دادگایە لە كوردستان و ناشیرینتركردنی دەسەڵاتی مافیاییە لە هەرێمی كوردستان.

هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی



Copyright 2018. westganews.net. All Rights Reserved.