قیافەت و قەڵەم

‌ئاشتی عەبدوڵا

ئەوەی دەیگێڕمەوە شتێکی نوێ نییە ، بەڵام بۆ ئەم مەبەستەی لەخوارەوە باسی دەکەم تەنھا بیرخستنەوەیە.

دەمەوێ لێرەوە بچمە سەربابەتێک و باسی ھەندێک لەنووسەرو قەڵەم بکەم، کە کاتێ نووسینێکیان دەبینین، چەندە دڵخۆش دەبین ، دەڵێین شوکرانەی دەوێت ھێشتا دونیابینی و مرۆڤ دۆستی وا لە چەند پەرەگرافێکدا کۆمەڵگە بەئاراستە دروستەکەدا دەبات، قەڵەمە درەوشاوەکانیان و فکری خۆیان رەنگدانەوەی خودیانە و چەند ئازاو ئازادن سەرسام دەبین پێیان، بەڵام ئەوەی تووشی شۆکت دەکات و راستیەکە بەدووچاوی گەش و عەقڵێکی کامڵ و واعی دەیانبینی لەنزیکەوە، ئەم ھەندێیەی باسم کرد لەناوەرۆکدا مرۆڤی بودەڵە و ترسنۆکن داردەستی ھەندێ عەزەڵاتی بێ ماریفەتن کە وەفایان بۆ سێبەرەکەی خۆشیان نییە، جا ئەم عەزەڵاتە چۆنی بوێت وا ھەڵیان دەسوڕێنێت  ، وتی بڵێن سەلام دەبێ بڵێن سەلام ! وتی بێ دەنگ بن دەبێ بێ دەنگ بن ! لەدەوری خڕدەبنەوە سەوداومامەڵە بە ھەمووشتەوە دەکەن (بەسیاسەتەوە بەکۆمەڵگەوە و بە بازرگانی و ئابووری وڵاتەوە)، ئەو نووسینانەی دەرخواردی خوێنەری دەدەن بۆ شاردنەوەی دیوە ھەقیقیەکەیانە ئیتر دوونیابینی چی و قەڵەمی چی ئەوان نەتوانن خۆیان بن چۆن دەتوانن میلەتێک ھۆشیاربکەنەوە، لێرەوە دەگەیتە ئەو یەقینەی ئەمەیە ھۆکاری نەگەیشتنی خیتابەکان بەمیلەت بونیادی پەروەردەیی و ھۆشیاری لەبازنەیەکدا گیربووە !؟؟ ھەر ئەمانە لەئاستی فەخامەتی عەزەڵاتدا چۆک دادەدەن،   ھەر ئەم ھەندەیە لەو نووسەرانە بەئەمری جەنابی عەزەڵات ھەر رۆژەی لەحزبێک و لایەک و کەسێک شەنو کەودەکەن !! چ شەرمە مرۆڤ خۆی نەبێت، زۆرجار کە سەیری ئەو کۆمەڵە قەڵەمە نایابەی ھەمە دەکەمەوە و رێکێیان دەخەمەوە کەھێشتا زۆربەیان وشەیەکی پێ نەنوسراوە، لەئاستیاندا یەک پارچە شەرم دامدەگرێت دەبێ بۆ ئەو غەدرە لەقەڵەم بکرێت، چۆن ترسنۆکەکان زاتی ئەوە دەکەن قەڵەم بگرنە دەست و خۆیان بکەنە پاڵەوانی وشەو ببنە رێنیشاندەری میلەتێک، دەی ئیتر چۆن و بەکێ بڕوادەکەیت  کە بەو جۆرە بەرووکەش غاندی بن و بە ناوەڕۆک ترسنۆک و بودەڵە..

دەیان جار مردن شەریفانەترە لەوەی ھێندە بچووک بیت و خۆت نەبیت.

زۆرجار دەبێ بڵێین خۆزگەم بەوەی بێ ئاگایە و ھەر رووکەش دەبینێ تا زەخت و شەکرەی وەک ئێمە بەرز نەبێتەوە ھەر ئەو دیوە ببینن کەنمایشی  جوان دەکەن!